مەملەكەتتىك ءتىل تاقىرىبىنداعى بايقاۋدا Kazinform ءتىلشىسى جۇلدەگەر اتاندى
استانا. قازاقپارات - Kazinform حالىقارالىق اقپارات اگەنتتىگىنىڭ اناليتيكالىق شولۋشىسى ءمولدىر قالىمبەت «مەملەكەتتىك ءتىل جانە ب ا ق» رەسپۋبليكالىق بايقاۋىندا جۇلدەلى III ورىنعا يە بولدى.
بايقاۋدى ق ر عىلىم جانە جوعارى ءبىلىم مينيسترلىگىنىڭ ءتىل ساياساتى كوميتەتى ۇيىمداستىردى. جەڭىمپازدارعا جۇلدەمەن قاتار قارجىلاي سىيلىق تابىستالدى.
بيىل بايقاۋعا كاسىبي جۋرناليستەر، تەلەۆيزيا جانە راديو قىزمەتكەرلەرى، گازەت-جۋرنالدار مەن ينتەرنەت-باسىلىمداردىڭ وكىلدەرى، سونداي-اق مەملەكەتتىك ءتىل تاقىرىبىندا ماتەريال ازىرلەگەن ماماندار قاتىستى. قازىلار القاسىنا 150 دەن استام جۇمىس ۇسىنىلدى.
بايقاۋ «ۇزدىك ماقالا» جانە «ۇزدىك تەلە/راديوباعدارلاما» نوميناتسيالارى بويىنشا ءوتتى. قاتىسۋشىلار مەملەكەتتىك ءتىلدىڭ قوعامداعى ءرولى، قازاق ءتىلىنىڭ قولدانىس اياسىن كەڭەيتۋ، زاماناۋي مەدياتەحنولوگيالار، مۋلتيمەديالىق ستوريتەللينگ، اناليتيكالىق جۋرناليستيكا جانە يننوۆاتسيالىق مەديا شەشىمدەرگە ارنالعان قازاق جانە ورىس تىلدەرىندەگى جۇمىستارىن ۇسىندى.
جەڭىمپازداردى انىقتاۋ كەزىندە ماتەريالداردىڭ مازمۇندىق ساپاسىمەن قاتار، مۋلتيمەديالىق مۇمكىندىكتەردى پايدالانۋ، داتا-جۋرناليستيكا ەلەمەنتتەرى، زاماناۋي مەدياتاسىلدەر، تاقىرىپتى اشۋ دەڭگەيى جانە اۋديتورياعا ىقپالى ەسكەرىلدى.
ايتا كەتەيىك، «مەملەكەتتىك ءتىل جانە ب ا ق» رەسپۋبليكالىق بايقاۋى بيىل 21-رەت ۇيىمداستىرىلدى.
