مەملەكەت باسشىسى دانيانىڭ سىرتقى ىستەر ءمينيسترى لارس لەككە راسمۋسسەندى قابىلدادى

مەملەكەت باسشىسى دانيانى قازاقستاننىڭ سولتۇستىك ەۋروپا مەن ەۋروپالىق وداقتاعى سەنىمدى سەرىكتەسى دەپ اتادى. كەلەسى جىلى ەكى ەل اراسىندا ديپلوماتيالىق قارىم-قاتىناس ورناعانىنا 35 جىل تولادى.

- ءبىز دانيانى ەۋروپانىڭ بەدەلدى جانە ىقپالدى مەملەكەتى جانە سەنىمدى سەرىكتەس رەتىندە قاراستىرامىز. ەكىجاقتى ىنتىماقتاستىعىمىزدىڭ الەۋەتى زور ەكەنىنە سەنىمدىمىن. اتالعان مۇمكىندىكتەردى تولىق پايدالانۋ ءۇشىن تاراپتار وسى باعىتتا بەلسەندى ءارى ماقساتتى تۇردە جۇمىس ىستەۋى قاجەت،- دەدى قاسىم-جومارت توقايەۆ.

كەزدەسۋدە ساۋدا-ەكونوميكالىق جانە ينۆەستيتسيالىق بايلانىستاردى دامىتۋدىڭ وڭ ديناميكاسى اتاپ ءوتىلدى.

بۇل رەتتە، پرەزيدەنتتىڭ ايتۋىنشا، ءوزارا ىقپالداستىقتى تەرەڭدەتۋ مۇمكىندىگى جەتكىلىكتى.

مەملەكەت باسشىسى Carlsberg كومپانياسىنىڭ الماتى وبلىسىندا ماڭدايالدى ينۆەستيتسيالىق جوبانى قولعا العانىن قۇپتاپ، كاسىپورىننىڭ قازاقستاندا تاماق ونەركاسىبىن ىلگەرىلەتۋگە قوسقان ۇلەسىن جوعارى باعالادى.

دانيا سىرتقى ساياسات ۆەدومستۆوسىنىڭ باسشىسى الداعى قازاقستان تاۋەلسىزدىگىنىڭ 35 جىلدىعىمەن قۇتتىقتاپ، وسى جىلدار ىشىندە ەلىمىزدىڭ ايتارلىقتاي تابىستارعا قول جەتكىزگەنىنە توقتالدى،

بۇدان بولەك، ول دانيانىڭ قازاقستانمەن ساياسي ديالوگتى ودان ءارى نىعايتۋعا جانە ساۋدا-ەكونوميكالىق ىنتىماقتاستىقتى جانداندىرۋعا نيەتتى ەكەنىن راستادى.

- قازاقستان ورتالىق ازياداعى ەكونوميكاسى ءىرى ەل سانالادى. مۇندا دانيانىڭ كوپتەگەن كومپانياسى جۇمىس ىستەيدى. ولار وسى سەرىكتەستىكتى الداعى ۋاقىتتا كەڭەيتە تۇسۋگە قىزىعۋشىلىق تانىتىپ وتىر،-دەدى دانيا سىرتقى ىستەر ءمينيسترى.

بۇدان بولەك، قاسىم-جومارت توقايەۆ پەن لارس لەككە راسمۋسسەن كولىك-لوگيستيكا، سيفرلىق ترانسفورماتسيا، جاساندى ينتەللەكت، اسا ماڭىزدى مينەرالدار، اۋىل شارۋاشىلىعى جانە سۋ قاۋىپسىزدىگى سالالارىنداعى ىقپالداستىقتى نىعايتۋ پەرسپەكتيۆاسى جونىندە پىكىر الماستى.

ايتا كەتەيىك، وسىعان دەيىن قازاقستانعا رەسمي ساپارمەن كەلگەن دانيا سىرتقى ىستەر ءمينيسترى لارس لەككە راسمۋسسەنمەن ەلىمىزدىڭ سىرتقى ىستەر ءمينيسترى مۇحتار تىلەۋبەردى كەزدەستى.