ەلدىڭ شىعىسىنان جىلقى ۇرلاپ، وڭتۇستىككە ساتۋمەن اينالىسقان قارۋلى توپ ۇستالدى
وسكەمەن. KAZINFORM - شىعىس قازاقستان وبلىسىندا مال ۇرلىعىمەن اينالىسقان قارۋلى توپ ۇستالدى.
ءوڭىر پوليتسەيلەرى مال ۇرلىعىمەن اينالىسقانداردى قولعا ءتۇسىردى. ولاردىڭ 70 تەن استام رەت جىلقى ۇرلاعانى، مال ەتىن ەلدىڭ وڭتۇستىگىنە اپارىپ ساتقانى انىقتالدى. سونىڭ سالدارىنان كەلتىرىلگەن شىعىن كولەمى 47 ميلليون تەڭگەدەن اسادى.
«ءتارتىپ ساقشىلارى كۇدىكتىلەردى جەدەل ىزدەستىرۋ شارالارى بارىسىندا ۇستادى. ءتورت كۇدىكتى بىرلەسە ارەكەت ەتكەن. مال باسىنىڭ ءبىر بولىگى تاركىلەندى. تەرگەۋ بارىسىندا مال ۇرلاۋشىلاردىڭ يەسىز جىلقىلاردى ىزدەگەنى، كەيىن مال ۇستاۋ ورىندارىنا جەتكىزىپ، ارى قاراي جۇك كولىكتەرىمەن باسقا ايماقتاعى بازارلارعا تاسىمالدانعانى انىقتالدى»، - دەپ حابارلادى ش ق و پوليتسيا دەپارتامەنتىنەن.
سونىمەن قاتار ۇستالعانداردان اتىس قارۋىنىڭ بىرنەشە ءتۇرى جانە 60 تان استام پاترون تاركىلەندى. قازىرگى ۋاقىتتا ولار بويىنشا ساراپتاما تاعايىندالدى.
«ايىپتالۋشىلار سوت سانكتسياسىمەن قامالدى. تەرگەۋ امالدارى جالعاسىپ جاتىر. كۇدىكتىلەردىڭ وسىعان ۇقساس باسقا دا قىلمىستارعا قاتىسى بار-جاعى تەكسەرىلىپ جاتىر»، - دەلىنگەن اقپاراتتا.
