ەلدىڭ ءدىني تانىمىن ەمەس، ءدىني بىرلەستىكتەردىڭ جۇمىسىن رەتتەۋ كەرەك - تامارا دۇيسەنوۆا

 ۆيتسە-پرەمەردىڭ ايتۋىنشا، مادەنيەت جانە اقپارات مينيسترلىگى ءدىن ماسەلەسىنە رەسمي تۇسىنىك بەرەدى، دەپ حابارلايدى Kazinform.   

«ءدىن - وتە نازىك ماسەلە. ول - ءار ادامنىڭ ءوز تاڭداۋى. بۇل جەردە نەگىزگى ماسەلە - ءدىني بىرلەستىكتەردىڭ جۇمىسىن مەملەكەتتىك تۇرعىدان رەتتەۋ. ازاماتتاردىڭ ءدىني تانىمىن ەمەس، ءدىني بىرلەستىكتەردى جۇمىسىن رەتتەۋ كەرەك»، - دەدى پرەمەر-ءمينيستردىڭ ورىنباسارى تامارا دۇيسەنوۆا ءماجىلىس وتىرىسىنان كەيىن ب ا ق وكىلدەرىنىڭ ساۋالىنا.

ونىڭ ايتۋىنشا، تەولوگتار، ءدىني بىرلەستىك وكىلدەرىمەن كەزدەسۋدە 3 ماسەلە كوتەرىلگەن.

«الدىمەن الەۋمەتتىك جەلىلەردەگى، اسىرەسە شەتەلدىك كونتەنتتىڭ الدىنداعى قاۋقارسىزدىعىمىز. ياعني ءارتۇرلى دىندەردى، باعىتتاردى ۋاعىزداۋ ماسەلەسىندە بىرگە جۇمىس ىستەۋىمىز كەرەك. ودان كەيىن قوعامدا ءدىني ساۋاتتى كوتەرۋ دە وزەكتى. وسى ماسەلە بويىنشا مادەنيەت جانە اقپارات مينيسترلىگى تۇسىنىك بەرەتىن بولادى»، - دەيدى ۇكىمەت باسشىسىنىڭ ورىنباسارى.