ەلدەگى ەڭبەك نارىعى وزگەرەدى: 10 جىلدا 14 كاسىپ جويىلادى
استانا. KAZINFORM - ەڭبەك نارىعىنىڭ 44 پايىزى جاساندى ينتەللەكتىنىڭ ىقپالىمەن وزگەرەدى. بۇل تۋرالى ءماجىلىس ءتوراعاسىنىڭ ورىنباسارى دانيا ەسپايەۆا ءمالىم ەتتى.
- ەڭبەك مينيسترلىگىنىڭ مالىمەتىنشە، 2035 -جىلعا قاراي قازاقستاندا 562 كاسىپ نەمەسە ەڭبەك نارىعىنىڭ %44 ى (شامامەن 4 ميلليون ادام) جاساندى ينتەللەكتىنىڭ ىقپالىمەن وزگەرەدى، 46 كاسىپ (362 مىڭ ادام، %4) قىسقارادى، ال 14 كاسىپ (49 مىڭ ادام) مۇلدەم جوعالادى. سونىمەن قاتار، جاساندى ينتەللەكت پەن ەكونوميكا سالالارىنىڭ قيىلىسىندا جاڭا ماماندىقتار قالىپتاسۋدا، ولارعا سۇرانىس الداعى جىلدارى وسە باستايدى. ەكونوميكانىڭ نەگىزگى سالالارىنا جاساندى ينتەللەكتىنى جەدەل ەنگىزۋ جوعارى ءبىلىم بەرۋ جۇيەسىنەن سيفرلاندىرۋ جانە اۆتوماتتاندىرۋ جاعدايلارى ءۇشىن ماماندار دايارلاۋ قابىلەتىن تالاپ ەتەدى، - دەدى دانيا ەسپايەۆا پارلامەنت ماجىلىسىندە جوعارى ءبىلىمدى كادرلاردى دايارلاۋ تاقىرىبىنا ارنالعان ۇكىمەت ساعاتىندا.
ونىڭ ايتۋىنشا، وسى ماقساتتا جوعارى ءبىلىمنىڭ قولجەتىمدىلىگى ايتارلىقتاي كەڭەيتىلىپ، مەملەكەتتىك قولداۋ كۇشەيتىلدى. اتاپ ايتقاندا:
- سوڭعى بەس جىل ىشىندە بۇل سالاعا بولىنەتىن قارجى كولەمى 246 ميلليارد تەڭگەدەن 472 ميلليارد تەڭگەگە دەيىن ارتتى.
- جىل سايىن مەملەكەتتىك ءبىلىم بەرۋ گرانتتارىنىڭ سانى ارتىپ كەلەدى، بيىل ولاردىڭ سانى 77 مىڭ بولدى (ونىڭ ىشىندە 18,8 مىڭى - ينجەنەرلىك باعىتتار بويىنشا)؛
- ستيپەنديا مولشەرى كەزەڭ-كەزەڭىمەن ۇلعايتىلىپ، كەيىنگى بەس جىلدا شامامەن 2 ەسەگە ءوستى.
بۇدان بۇرىن حابارلانعانداي، ەڭبەك جانە حالىقتى الەۋمەتتىك قورعاۋ مينيسترلىگى الداعى ۋاقىتتا جاساندى ينتەللەكت ەلىمىزدە قاي ماماندىقتارعا ەرەكشە اسەر ەتەتىنى جايىندا تۇسىنىك بەردى.
