ەلدىڭ باتىسىنداعى گاز پروبلەماسى: اقتاۋدا دا ۇزىن-سونار كەزەك
اقتاۋ. KAZINFORM - قالادا سۇيىتىلعان گازدىڭ جەتىسپەۋشىلىگى بايقالادى. كولىك جۇرگىزۋشىلەر بۇل پروبلەمانىڭ ءبىر اپتا بۇرىن باستالعانىن ايتۋدا.
- گاز قۇيۋ بەكەتتەرىنىڭ باسىم بولىگىندە گاز جوق. سوندىقتان گاز بار بەكەتتەردە ۇزىن-سونار كەزەك،-دەيدى ولار.
ماڭعىستاۋ وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى بەردىبەك قارتبايەۆتىڭ مالىمەتىنشە، گاز جەتىسپەۋشىلىگىنە اتىراۋ مۇناي وڭدەۋ زاۋىتىنداعى جوندەۋ جۇمىستارى سەبەپ بولعان.
«ماڭعىستاۋ وبلىسىنا اي سايىن 18000 توننا سۇيىتىلعان گاز جەتكىزىلەدى. ونىڭ 16000 تونناسى جاڭاوزەندەگى «قازاقگازوڭدەۋ» زاۋىتىنان جانە قوسىمشا 2000 تونناسى اتىراۋ مۇناي وڭدەۋ زاۋىتىنان (ا م ءو ز) كەلەدى. قازان ايىنداعى جوندەۋ جۇمىستارىنا بايلانىستى اتىراۋ مۇناي وڭدەۋ زاۋىتىنان گاز جەتكىزۋدە ءۇزىلىس بولىپ، وبلىسقا تەك 17000 توننا جەتكىزىلدى. بۇل كەيبىر اۆتوگازقۇيۋ ستانتسيالارىندا (ا گ ق س) ۋاقىتشا كەزەكتىڭ تۋىنداۋىنا سەبەپشى بولدى»، - دەيدى باسقارما باسشىسى.
ايتا كەتەيىك، قازىرگى تاڭدا اتىراۋ زاۋىتىنداعى جوندەۋ جۇمىستارى اياقتالعان. قاراشا ايىندا ايماققا قاجەتتى كولەمدەگى سۇيىتىلعان گاز جەتكىزىلەدى دەپ كۇتىلۋدە.
باسقارما باسشىسىنىڭ ايتۋىنشا، وبلىس اكىمدىگى جاعدايدى باقىلاۋدا ۇستاپ، گاز قۇيۋ بەكەتتەرىندەگى كەزەك پەن كوگىلدىر وتىندى تاسىمالداۋ بارىسىنا مونيتورينگ جاسالۋدا. باعانى تۇراقتى ۇستاۋ بويىنشا شارالار قابىلدانىپ، وبلىس ورتالىعىندا كوتەرمە باعا 1 ليتر ءۇشىن 59 تەڭگە دەڭگەيىندە، ال شالعاي اۋدانداردا 64 تەڭگە دەڭگەيىندە ساقتالعان.
ماڭعىستاۋ وبلىسىندا 462 اۆتوگازقۇيۋ ستانتسياسى جانە 4 گاز جەلىسى ۇيىمى جۇمىس ىستەيدى.
ەسكە سالا كەتەيىك، بۇگىن عانا باتىس قازاقستان وبلىسىندا دا گاز تاپشىلىعى تۋىنداپ، گاز قۇيۋ ستانسالارىندا ۇزىنسونار كەزەك پايدا بولعانىن حابارلاعان ەدىك.
