ەلدەگى 4 قالادا اۋە جۇگىن جيناقتاپ، تاراتاتىن ورتالىق اشىلادى

орталық
Фото: istockphoto.com

كولىك مينيسترلىگى ەلدەگى 4 ءىرى اۋەجايدىڭ بازاسىندا اۋە جۇگىن جيناقتاپ، تاراتاتىن ورتالىق اشىلاتىنىن ءمالىم ەتتى، دەپ حابارلايدى Kazinform.

ۇكىمەتتىڭ جوسپارى بويىنشا، اتالعان حابتار استانا، الماتى، شىمكەنت جانە اقتوبە قالالارىنىڭ اۋەجايلارىندا اشىلادى. مينيسترلىك ماماندارى بۇل اۋەجايلاردىڭ جالپى ينفراقۇرىلىمىن جاڭارتۋ كوزدەلىپ وتىرعانىن، ول جوبالارعا ينۆەستيتسيا تارتىلاتىنىن ايتىپ وتىر. بۇل ينۆەستيتسيالارعا اۆياوتىنمەن ۇزدىكسىز قامتاماسىز ەتۋ، كەدەن پروتسەدۋرالارىن قاعازباستىلىقتان ارىلتۋ، قۇجات رەسىمدەۋ جۇمىستارىن اۆتوماتتاندىرۋ باعىتىندا جوبالاردى ىسكە اسىرۋ كوزدەلگەن.

«استانادا بىرىككەن اراب امىرلىكتەرىنىڭ Terminal Holding كاسىپورنىمەن بەلسەندى جۇمىس جولعا قويىلدى. بۇل جوبا اياسىندا ەلوردا اۋەجايىنىڭ ۇشۋ- قونۋ جولاعىن كۇردەلى جوندەۋدەن وتكىزىپ، جولاۋشىلار تەرمينالىنىڭ وتكىزۋ قابىلەتىن 8,5 ميلليون ادامنان 14 ميلليون ادامعا جەتكىزۋ جوسپارلانعان. سونداي- اق جۇك تەرمينالىن كەڭەيتىپ، جاھاندىق دەڭگەيدەگى لوگيستيكالىق وپەراتورلارمەن ارىپتەستىك ورناتۋ كوزدەلىپ وتىر. جانارماي قۇياتىن كەشەن دە كۇردەلى جوندەۋدەن ءوتىپ، كولىك قاڭتاراتىن اۋماق ۇلكەيتىلەدى. قاجەتتى ينۆەستيتسيا كولەمى ءالى ەسەپتەلىپ جاتىر»، - دەلىنگەن مينيسترلىك ۇسىنعان مالىمەتتە.

ال الماتى اۋەجايىندا تۇركيالىق TAV airports Holding كومپانياسى 2025 -جىلعا قاراي كارگو- تەرمينال الدىنداعى پەرروندى جاڭارتىپ، جۇك تيەۋ، جونەلتۋ پروتسەدۋرالارىن تۇگەلدەي اۆتوماتتاندىرماقشى.

«قازىرگى تاڭدا بۇل حولدينگ 200 ميلليون دوللاردان استام قاراجاتقا جاڭا جولاۋشىلار تەرمينالىن سالىپ جاتىر. ول 2024 -جىلدىڭ جازىندا قولدانىسقا بەرىلۋ كەرەك. بىلتىر بۇل اۋەجايداعى جولاۋشى اعىنى 7 ميلليون ادامعا جەتكەن. بۇل نىساننىڭ قازىرگى الەۋەتىنەن 2,5 كوپ دەگەن ءسوز. جوبا اياقتالعاندا جولاۋشىلار اعىنى 14 ميلليون ادامعا دەيىن ارتادى دەگەن ەسەپ بار.

شىمكەنتتە SCAT اۋە كومپانياسى جاڭا تەرمينال سالىپ جاتىر. سونىڭ ارقاسىندا ونىڭ اۋدانى 3,8 مىڭ شارشى مەتردەن 35 مىڭ شارشى مەترگە دەيىن كەڭەيىپ، جولاۋشى وتكىزۋ قابىلەتى ساعاتىنا 150 ادامنان 2 مىڭ ادامعا جەتەدى. قارجىلاندىرۋ كولەمى - 23 ميلليارد تەڭگە. سونداي- اق اۋە ايلاعىنىڭ ترانزيتتىك الەۋەتى ارتقانىن ەسكەرىپ، نىسان بازاسىندا ۇشاقتارعا تەحنيكالىق قىزمەت كورسەتەتىن جانە وقىتۋ ورتالىعى بار حاب قۇرۋ جوسپارلانعان»، - دەلىنگەن مينيسترلىك اقپاراتىندا.

ال اقتوبە اۋەجايىنىڭ جۇك تاسىمالىنداعى ۇلەسىن ارتتىرۋعا «قازپوشتا» مەن «قازمۇنايگاز» كومپانيالارى اتسالىسپاق.

«قازپوشتا كومپانياسى 2023-2024 -جىلدارى اۋدانى 3,2 گەكتار بولاتىن يننوۆاتسيالىق پوشتا حابىن سالادى. وعان تارتىلاتىن ينۆەستيتسيا كولەمى 4 ميلليارد تەڭگە دەپ ەسەپتەلگەن. ال «قازمۇنايگاز- اەرو» كومپانياسى 2023-2026 -جىلدارى جانارماي ساقتايتىن قازان شۇڭقىردى كەڭەيتىپ، جانارماي قۇيۋ كەشەنىن جاڭارتپاقشى. قازىرگى تاڭدا الەۋەتتى ينۆەستورلارمەن كەلىسسوز ءجۇرىپ جاتىر»، - دەيدى مينيسترلىك ماماندارى.

سوڭعى جاڭالىقتار