ەلدوس سمەتوۆ وليمپيادا كەزىندەگى ەرەكشە ءساتتى ەسىنە الدى

استانا. KAZINFORM – پاريج وليمپياداسىنىڭ چەمپيونى «قىزىق Times» باعدارلاماسىندا قوناقتا بولعاندا وليمپيادا كەزىندە ەستە قالعان ساتتەرى تۋرالى ايتىپ بەردى.

سپورتشى وليمپيادا كەزىندە شەت ءتىلىن بىلمەگەنى ءۇشىن نامىستانىپ، قاتتى ۇيالعانىن جاسىرمادى.

«نامىستانعان ءبىر جاعداي بولدى. وليمپياداعى جەڭىستەن كەيىن كەشكە باسشىلىق پەن وليمپيادا چەمپيوندارى باس قوسقان مەرەكەلىك كەشكى اس بولدى. مۇندا بارلىعى ءبىر-ءبىرىن قۇتتىقتاۋعا كەلەدى. مەن تەك congratulations دەگەن ءسوزدى تۇسىنەمىن، بارلىعىنا «thank you» دەپ جاۋاپ بەرەمىن. ولار بىردەڭە ايتىپ جاتتى، مەن تەك قاراپ تۇردىم. وسى ساتتە ءتىل بىلمەگەنىم ءۇشىن قاتتى ۇيالدىم. مەن ءبارىن تۇسىنگەندەي كەيىپ تانىتىپ، العىس ايتتىم، ءبىراق ولاردىڭ نە ايتقانىن تۇسىنبەدىم. سويلەپ جاتقاندارىنا قاراپ، مەنى ماقتاپ جاتقانىن سەزدىم»، - دەپ اعىنان جارىلدى ول.

ايتا كەتەيىك، جاقىندا ەلدوس سمەتوۆ نۇرلان قويانبايەۆتىڭ «تۇنگى ستۋديا» باعدارلاماسىنا دا قوناققا بارعان بولاتىن.