«گۇلدەر» انسامبلىنىڭ 55 جىلدىق مەرەيتويىنا ارنالعان گالا-كونسەرت ءوتتى
استانا. KAZINFORM - روزا باعلانوۆا اتىنداعى «قازاق كونسەرت» مەملەكەتتىك اكادەميالىق كونسەرتتىك ۇيىمى «گۇلدەر» انسامبلىنىڭ 55 جىلدىق مەرەيتويىنا ارنالعان گالا-كونسەرت بولدى.
مادەنيەت جانە اقپارات مينيسترلىگى باسپا ءسوز قىزمەتىنىڭ مالىمەتىنشە، كونسەرت باعدارلاماسىندا ارنايى ازىرلەنگەن ەكسكليۋزيۆتى اسپاپتىق- حورەوگرافيالىق قويىلىمدار مەن جاڭا حورەوگرافيالىق كومپوزيتسيانىڭ تۇساۋكەسەرى، اۆتورلىق اندەر، تانىمال ارتىستەر مەن ۇتىمدى كوللابوراتسيا جانە كلاسسيكالىق ونەردىڭ جاڭا ينتەرپرەتاتسياسى ۇسىنىلدى. سونداي-اق اڭىزعا اينالعان ارتىستەر مەن جاس تالانتتار ءبىر ساحنادا ونەر كورسەتتى.
ءىس-شارادا ق ر مادەنيەت جانە اقپارات ءمينيسترى ايدا بالايەۆانىڭ قۇتتىقتاۋ حاتى وقىلدى.
- جارتى عاسىردان استام ۋاقىت ىشىندە ونەر ۇجىمى قازاق مادەنيەتىنىڭ جارىق جۇلدىزىنا اينالىپ، ۇلتتىق ونەردى الەمگە تانىتۋدا ماڭىزدى ءرول اتقاردى. سىزدەر حالىقتىق بي ونەرىنىڭ ەڭ ۇزدىك داستۇرلەرىن ساقتاپ، ونى ۇرپاقتان-ۇرپاققا جەتكىزىپ كەلەسىزدەر. قازاق مادەنيەتىنىڭ اجىراماس بولىگى رەتىندە انسامبل قازاقستان ەستراداسىنىڭ دامۋىنا زور ۇلەس قوستى. بۇگىنگى تاڭدا «گۇلدەر» انسامبلى تەك قازاقستاندا عانا ەمەس، حالىقارالىق دەڭگەيدە دە كەڭىنەن تانىلىپ، ءوزىنىڭ ەرەكشە ورىنداۋشىلىق شەبەرلىگىمەن مويىندالۋدا. سىزدەردىڭ ساحناداعى ءاربىر ونەر كورسەتۋ ەرەكشەلىكتەرىڭىز كورەرمەندەرگە ەستەتيكالىق ءلاززات سىيلاپ، قازاق مادەنيەتىنىڭ باي مۇراسىن كورسەتىپ، ونىڭ ماڭىزدىلىعىن ايقىندايدى، - دەلىنگەن قۇتتىقتاۋ حاتتا.
ءىس-شاراعا قازاقستاننىڭ حالىق ءارتىسى، قازاق ەستراداسىنىڭ جارىق جۇلدىزى روزا رىمبايەۆا، قازاقستاننىڭ ەڭبەك سىڭىرگەن ءارتىسى ايجان نۇرماعامبەتوۆا، قازاقستاننىڭ ەڭبەك سىڭىرگەن قايراتكەرى ايگۇل ەلشىبايەۆا، «دارىن» مەملەكەتتىك جاستار سىيلىعىنىڭ لاۋرەاتتارى الىبەك الماديەۆ، ءادىلحان ماكين، رەسپۋبليكالىق جانە حالىقارالىق بايقاۋلاردىڭ لاۋرەاتتارى ءمادي رىمبايەۆ، قۋاندىق شالقار ۇلى، مەرۋەرت باحىت، «استانا سازى» قازاق مەملەكەتتىك فولكلورلىق انسامبلى، «Astana musical» مەملەكەتتىك تەاترى، «TURAN» ەتنو-فولكلورلىق انسامبلى، «سامعا» توبى جانە «Gulder» انسامبلى قاتىستى.
بەلگىلى قازاقستاندىق انشىلەر جانار دۇعالوۆا، ARO جانە تانىمال قازاقستاندىق قوبىزشى ولجاس قۇرمانبەك مەرەيتويلىق كونسەرتتە كورەرمەندەر ءۇشىن ارنايى ونەر كورسەتىپ، كەشىتىڭ كوركىن قىزدىردى. انسامبلدىڭ باس بالەتمەيستەرى - انۆارا سادىقوۆا، كوركەمدىك جەتەكشىسى - ابزال وسىمبايەۆ.
مادەنيەت جانە اقپارات مينيسترلىگىنىڭ اتىنان شىعارماشىلىق ۇجىمعا ىقىلاس گۇلى تارتۋ ەتىلدى.
