ەلدە «تىلگە بويلاۋ» قازاق ءتىلىنىڭ بىرەگەي جوباسى جۇزەگە اسىرىلىپ جاتىر

استانا. KAZINFORM - وقۋ-اعارتۋ ءمينيسترى عاني بەيسەمبايەۆ «قازاق ءتىلى» حالىقارالىق قوعامىنىڭ VIII قۇرىلتايىنا قاتىستى. ءوز سوزىندە ول مەملەكەت تاراپىنان قازاق ءتىلىن وقىتۋ ساپاسىن ارتتىرۋ جانە مەكتەپتەردە قولايلى تىلدىك ورتا قالىپتاستىرۋ ماقساتىندا جاسالىپ جاتقان شارالارعا توقتالدى.

وتكەن جىلدان باستاپ مەكتەپكە دەيىنگى ۇيىمداردا بالالارعا ەرتە جاستان مەملەكەتتىك ءتىلدى ۇيرەتۋگە باعىتتالعان «تىلگە بويلاۋ» باعدارلاماسى جۇزەگە اسىرىلىپ جاتىر. مينيستر اتاپ وتكەندەي، بۇل يننوۆاتسيالىق ءتاسىل حالىقارالىق تاجىريبەگە نەگىزدەلگەن، بالالارعا ءتىلدى تەزىرەك مەڭگەرۋگە كومەكتەسىپ قانا قويماي، ولاردىڭ وقۋعا دەگەن ۇمتىلىسىن، شىعارماشىلىق دامۋىن ىنتالاندىرادى. قازىرگى ۋاقىتتا جوبا ەلىمىزدىڭ بەس وڭىرىندە ءساتتى جۇرگىزىلىپ جاتىر.

- «تىلگە بويلاۋ» جوباسى اياسىندا وقۋلار كۇن سايىن ۇيىمداستىرىلادى جانە ءارتۇرلى ءادىس- تاسىلدەردى قامتيدى. ءادىستىڭ نەگىزگى ەرەكشەلىكتەرىنىڭ ءبىرى - بالالاردىڭ شىعارماشىلىق الەۋەتىن دامىتۋعا باعىتتالۋى. ول شەكتەمەيدى، كەرىسىنشە، ءار بالانىڭ قابىلەتتەرىن اشادى، بۇل سويلەۋى مەن اۋىزشا-لوگيكالىق ويلاۋىنا وڭ اسەر ەتەدى. جوبا اتا-انالاردىڭ سۇرانىستارىن ەسكەرە وتىرىپ جاسالدى. ول وسى جىلدان باستاپ مەكتەپ جۇيەسىنە كەزەڭ-كەزەڭىمەن ەنگىزىلە باستايدى، - دەدى وقۋ-اعارتۋ ءمينيسترى عاني بەيسەمبايەۆ.

ءبىلىم بەرۋ ۇيىمدارىندا قازاق ءتىلىن وقىتۋ ساپاسىنا ەرەكشە كوڭىل بولىنەدى. 2024 -جىلى 5,5 مىڭعا جۋىق قازاق ءتىلى مەن ادەبيەتى مۇعالىمدەرى بىلىكتىلىكتى ارتتىرۋ كۋرستارىنان ءوتتى. العاش رەت 5-8 جانە 10- سىنىپ وقۋشىلارى ءۇشىن قازاق تىلىنەن ەمتيحان تاپسىرۋ ەنگىزىلدى، ول وقۋ باعدارلاماسىن تەرەڭىرەك مەڭگەرۋگە جانە بەكىتۋگە باعىتتالعان.

ايتا كەتەلىك قازاق ءتىلى ءۇشىن جاڭا تسيفرلىق پلاتفورما جاسالاتىنى تۋرالى جازعان ەدىك.

اۆتور

نازىم بولەسوۆا