ەلدە قانشا ەكىنشى دۇنيەجۇزىلىك سوعىس ارداگەرى بار
استانا. KAZINFORM - ەلىمىزدە ەكىنشى دۇنيەجۇزىلىك سوعىس ارداگەرلەرىنە، الەۋمەتتىك تولەمدەرىنە قاراماستان، اي سايىن مەملەكەتتىك الەۋمەتتىك جاردەماقى تولەنەدى. بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس انافين ءمالىم ەتتى.
- 2025-جىلعى 1-ساۋىردەگى جاعداي بويىنشا قازاقستاندا ەكىنشى دۇنيەجۇزىلىك سوعىسىنىڭ 111 ارداگەرى، سونداي-اق ۇلى جەڭىسكە ۇلەس قوسقان باسقا ساناتتاعى 41468 ارداگەر تۇرادى، - دەدى ولجاس انافين ەلوردادا وتكەن ارداگەرلەر كەڭەسىنىڭ رەسپۋبليكالىق پلەنۋمىندا.
ولاردىڭ ىشىندە:
- كامەلەتكە تولماعان كونتسلاگەر تۇتقىندارى - 134 ادام؛
- قورشاۋداعى لەنينگراد تۇرعىندارى - 66 ادام؛
- ەكىنشى دۇنيەجۇزىلىك سوعىستا قازا تاپقان جاۋىنگەرلەردىڭ جەسىرلەرى - 2 ادام؛
- ەكىنشى دۇنيەجۇزىلىك سوعىستا مۇگەدەك بولىپ، ومىردەن وتكەن ارداگەرلەردىڭ جۇبايلارى - 1667 ادام؛
- تىل ارداگەرلەرى - 39588 ادام؛
- باسقا ساناتتا - 11 ادام.
- ەكىنشى دۇنيەجۇزىلىك سوعىس ارداگەرلەرىنە، الەۋمەتتىك تولەمدەرىنە قاراماستان، اي سايىن مەملەكەتتىك الەۋمەتتىك جاردەماقى تولەنەدى. ونىڭ مولشەرى – 16 ايلىق ەسەپتىك كورسەتكىش كولەمىندە، ياعني 62912 تەڭگە، - دەيدى ۆيتسە-مينيستر.
ايتا كەتسەك، بيىل ۇلى جەڭىستىڭ 80 جىلدىعىنا وراي ەل اۋماعىندا ەكى مىڭداي ءىس-شارا وتەدى.
ۇلى جەڭىستىڭ 80 جىلدىعىنا وراي ەلوردادا وتەتىن اسكەري شەرۋ بارلىق رەسپۋبليكالىق تەلەارنا مەن LED ەكرانداردان تىكەلەي كورسەتىلەدى.
بۇگىن ەلوردادا «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسىنىڭ III پلەنۋمى ءوتتى.
