ەلدە جاڭا الما سۇرپىن جەرسىندىرۋ جۇمىستارى ءجۇرىپ جاتىر
استانا. KAZINFORM - قازاقستانعا نيدەرلاندتان 7 مىڭنان استام الما تامىرساباعى (تەلىتۋشى) جەتكىزىلدى. كوشەت شارۋاشىلىعى دامىعان ەلدەن اكەلىنگەن بۇل وتىرعىزۋ ماتەريالى ۆيرۋستاردان تازا كوشەت جۇيەسىن قالىپتاستىرۋعا نەگىز بولادى. ول ونىمدىلىكتى ارتتىرىپ، جەمىس ساپاسىن جاقسارتۋعا مۇمكىندىك بەرەدى.
تەلىتۋشىلەردى ىرىكتەۋ مەن جەتكىزۋ تۇقىمدار مەن وتىرعىزۋ ماتەريالدارىن سەرتيفيكاتتاۋعا ماماندانعان Naktuinbouw حالىقارالىق ۇيىمىنىڭ ۇسىنىمدارىنا سايكەس جۇزەگە اسىرىلدى. جەتكىزۋشى - Vermeerderingstuinen Nederland كومپانياسى، ول basic ساناتىنداعى ءونىم ۇسىندى. بۇل ونىڭ جوعارى ساپاسىن جانە حالىقارالىق ستاندارتتارعا سايكەستىگىن قامتاماسىز ەتەدى.
قازاقستانعا M9 ،MM106 ،MM111 ،B9 ،M7 ،P16 جانە P22 سياقتى تانىمال سەرياداعى تەلىتۋشىلەر اكەلىندى.
سونىمەن قاتار، ەل ىشىندە دە بەلسەندى جۇمىس ىستەلىپ جاتىر. قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ بيوتەحنولوگيالىق زەرتحانالارىندا in vitro ءادىسى ارقىلى pre-basic جانە basic ساناتىنداعى شامامەن 3 مىڭ وسىمدىك ءوسىرىلدى. ولاردىڭ قاتارىندا وتاندىق سەلەكتسيانىڭ كلوندىق تۇرلەرى بار. بۇل ەلىمىزدىڭ عىلىمي بازاسىنىڭ دامىپ كەلە جاتقانىن جانە باۋ-باقشا سالاسىنداعى الەۋەتىنىڭ جوعارى ەكەنىن كورسەتەدى.
الماتى وبلىسىندا، «تالعار» فيليالى بازاسىندا، ۆيرۋستاردان تازا تەلىتۋشىلەردى وسىرۋگە ارنالعان ارنايى بازالىق ۋچاسكە قۇرىلدى. بۇل نىسان ساپالى وتىرعىزۋ ماتەريالدارىن ودان ءارى كوبەيتۋدىڭ نەگىزگى كوزىنە اينالادى. سونىمەن قاتار، مۇندا كولەمى 1,5 گەكتار بولاتىن انالىق-قالەمشەلىك باق قالىپتاستىرىلىپ جاتىر. بۇل ەل ىشىندە كوشەت ءوندىرۋ كولەمىن ەداۋىر ارتتىرۋعا جانە يمپورتقا تاۋەلدىلىكتى ازايتۋعا مۇمكىندىك بەرەدى.
جوبانىڭ ماڭىزدى باعىتىنىڭ ءبىرى - الما سۇرىپتارىنىڭ اسسورتيمەنتىن كەڭەيتۋ.
قازاقستانعا Gala ،Fuji ،Golden Delicious ،Granny Smith سياقتى سۇرانىسقا يە كوممەرتسيالىق سۇرىپپەن قاتار Rubinette, Topaz جانە Baya Marisa سەكىلدى زاماناۋي سەلەكتسيالىق جاڭالىقتار دا اكەلىندى. قازىرگى ۋاقىتتا ولار جەرگىلىكتى جاعدايدا سىناقتان ءوتىپ جاتىر.
جوبا اۋىل شارۋاشىلىعى مينيسترلىگىنىڭ قولداۋىمەن عىلىمي-تەحنيكالىق باعدارلاما اياسىندا جۇزەگە اسىرىلىپ جاتىر. ۆيرۋستاردان تازا وتىرعىزۋ ماتەريالدارىن ەنگىزۋ باۋ-باقشا سالاسىنداعى شىعىنداردى ازايتىپ، ونىمدىلىك پەن ساپانى ارتتىرۋعا، سونداي-اق اگرارلىق سەكتوردىڭ ەكسپورتتىق الەۋەتىن كۇشەيتۋگە مۇمكىندىك بەرەدى.
