فلاي ارىستان اۋە كومپانياسى ساۋدا مينيسترلىگىمەن سوتتاسىپ، جەڭىلىپ قالدى
استانا. KAZINFORM - الماتى سوتى FlyArystan اۋە كومپانياسىنا قاتىستى ساۋدا جانە ينتەگراتسيا مينيسترلىگى بەرگەن نۇسقامانىڭ زاڭدىلىعىن راستادى. تەكسەرۋ كەزىندە تاسىمالداۋشىنىڭ ىشكى قاعيدالارىنان جولاۋشىلاردىڭ قۇقىعىن شەكتەيتىن ءبىرقاتار تالاپ انىقتالعان.
اۋە كومپانياسىنا قاتىستى تەكسەرۋگە جولاۋشىنىڭ شاعىمى نەگىز بولعان. الماتى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى تۇتىنۋشىلاردىڭ قۇقىقتارىن قورعاۋ كوميتەتىمەن جانە استاناداعى اۋماقتىق دەپارتامەنتپەن بىرلەسىپ جوسپاردان تىس تەكسەرۋ جۇرگىزگەن.
تەكسەرۋ بارىسىندا FlyArystan كومپانياسىنىڭ ىشكى تاسىمالداۋ قاعيدالارىنان تۇتىنۋشىلاردىڭ قۇقىعىن شەكتەيتىن بىرنەشە تالاپ انىقتالدى. اتاپ ايتقاندا:
تاسىمالداۋ شارتتارىن ءبىرجاقتى وزگەرتۋ؛
اۋە تاسىمالداۋشىسىنىڭ جاۋاپكەرشىلىگىن شەكتەۋ؛
جەكەلەگەن الىمداردى زاڭسىز ءوندىرىپ الۋ؛
جولاۋشىلاردىڭ اقشاسىن قايتارۋ قۇقىعىن شەكتەۋ؛
تۇتىنۋشىلارعا اقپارات بەرۋ تالاپتارىن ساقتاماۋ؛
جازباشا نارازىلىق حات جولداۋ تاسىلدەرىن شەكتەۋ.
وسى بۇزۋشىلىقتارعا بايلانىستى اۋە كومپانياسىنا ولاردى جويۋ جانە ىشكى تاسىمالداۋ قاعيدالارىن قازاقستان زاڭناماسىنا سايكەستەندىرۋ تۋرالى نۇسقاما بەرىلگەن.
الايدا FlyArystan تەكسەرۋ ناتيجەلەرى مەن مينيسترلىك بەرگەن نۇسقامانىڭ زاڭدىلىعىنا سوتتا داۋ ايتقان.
2026 -جىلعى 21-شىلدەدە الماتىنىڭ مامانداندىرىلعان اۋدانارالىق اكىمشىلىك سوتى اۋە كومپانياسىنىڭ نۇسقامانىڭ كۇشىن جويۋ تۋرالى تالابىن قاناعاتتاندىرمادى. اپەللياتسيالىق ساتى دا ءبىرىنشى سوت شەشىمىن وزگەرىسسىز قالدىردى.
وسىلايشا، سوت تۇتىنۋشىلاردىڭ قۇقىقتارىن قورعاۋ ورگاندارىنىڭ اۆياتسيالىق قىزمەتتەر سالاسىندا مەملەكەتتىك باقىلاۋ جۇرگىزۋ وكىلەتتىگىن جانە كومپانياعا بەرىلگەن نۇسقامانىڭ زاڭدىلىعىن راستادى.
ساۋدا جانە ينتەگراتسيا مينيسترلىگى اۋە كومپانيالارىنىڭ ىشكى قاعيدالارى زاڭنامادا كەپىلدىك بەرىلگەن جولاۋشىلاردىڭ قۇقىقتارىن شەكتەمەۋگە ءتيىس ەكەنىن اتاپ ءوتتى. تاسىمالداۋ شارتتارى، اقشانى قايتارۋ ءتارتىبى، قوسىمشا الىمدار مەن شاعىمداردى قاراۋ ماسەلەلەرى تۇتىنۋشىلاردىڭ قۇقىقتارىن قورعاۋ تۋرالى زاڭ تالاپتارىنا ساي بولۋى قاجەت.
ەسكە سالايىق، بۇعان دەيىن Air Astana مەن FlyArystan اۆياوتىن كولەمى بويىنشا بۇرمالانعان مالىمەتتەر ءۇشىن جاۋاپقا تارتىلعانىن حابارلاعانبىز.