پلاستيكالىق حيرۋرگيا: نەلىكتەن قازاقستاندىقتار كورەيانى تاڭدايدى
سەۋلدەگى زاماناۋي سۇلۋلىقتىڭ ەڭ ءساندى ەپيتسەنترى - گانگنامدا قازاقستاندىقتار پلاستيكالىق حيرۋرگيا بويىنشا جەتەكشى ورتالىقتىڭ VIP پاتسيەنتتەرى بولىپ سانالادى.
ال، وڭتۇستىك كورەيانىڭ سۇلۋلىق ستاندارتى الەمگە بەلگىلى. جەرگىلىكتى پلاستيكالىق حيرۋرگتەر جوعارى بىلىكتىلىگىنىڭ ارقاسىندا ەڭ مىقتى ماماندار قاتارىنا جاتادى. بۇل سالا ەلگە ميللياردتاعان تابىس اكەلىپ وتىر.
Kazinform اگەنتتىگىنىڭ ءتىلشىسى داۋلەت ىزتىلەۋ كورەيانىڭ تانىمال پلاستيكالىق حيرۋرگى چجۋ كۆونمەن اڭگىمەلەسىپ قايتقان ەدى.
- دوكتور كۆون، كورەياداعى پلاستيكالىق حيرۋرگيا شەتەلدىكتەردى نەسىمەن قىزىقتىرادى؟
- كورەيا ءارقاشان ءوزىنىڭ جوعارى سۇلۋلىق ستاندارتتارىمەن تانىمال جانە پلاستيكالىق حيرۋرگيانىڭ ورتالىعى دەۋگە بولادى. مەديتسينالىق تۋريزم جانە پلاستيكالىق حيرۋرگيا كورەيلەردىڭ وزدەرى ءۇشىن عانا ەمەس، كوپتەگەن شەتەلدىك قوناقتار ءۇشىن دە باستى تارتىمدى فاكتورعا اينالدى. الدە دە كوپتەگەن شەتەلدىك كورەيانى ءوز دەنساۋلىعىمەن اينالىسىپ قانا قويماي، كوڭىل كوتەرۋ ءۇشىن تاڭدايدى.
الايدا، ءارتۇرلى كونتينەنتتەر مەن ەلدەردىڭ وزىندىك ەرەكشە سۇرانىستارى بار. مىسالى، ا ق ش ازاماتتارى ءۇشىن سەمىزدىك پروبلەماسى وزەكتى. ولار ارتىق سالماقتان ارىلۋ ءۇشىن كەلەدى. ازيا ەلدەرىندە قارتايۋعا قارسى پلاستيكالىق وتاعا سۇرانىس جوعارى. ءار پاتسيەنتتىڭ ءوز قالاۋى بار.
- بۇگىندە قانداي پلاستيكالىق وپەراتسيالار ەڭ تانىمال بولىپ سانالادى؟
- بۇرىن مۇرىن مەن كوزگە وپەراتسيا شەتەلدىكتەر اراسىندا دا، كورەيلەردە دە سۇرانىسقا يە بولدى. قازىر ادامدار ۇزاق ءومىر ءسۇرىپ، جاستىقتى ساقتاعىسى كەلەتىندىكتەن، ليفتينگ جانە بەتتى جاسارتۋ سياقتى، ياعني قارتايۋعا قارسى وپەراتسيالار جوعارى سۇرانىستا. كوبى مۇنداي پروتسەدۋرالارعا 40 جاسىندا جۇگىنەدى. بىردە 80 جاستان اسقان پاتسيەنت بەت الپەتىن تولىق كوتەرۋ ءۇشىن كەلدى.
ءبىزدىڭ كلينيكادا كەز كەلگەن پلاستيكالىق وتانى جاساۋ مۇمكىندىگى بار. بەت وپەراتسياسىنان دەنەنى تۇزەتۋگە دەيىن، سونىڭ ىشىندە كونتۋرلىق پلاستيكا دا جاسالادى. ويتكەنى، بىزدە ءبىر دارىگەر ەمەس، بىرنەشە جوعارى مامانداندىرىلعان مامان جۇمىس ىستەيدى. ولار بلەفاروپلاستيكا دا، رينوپلاستيكا دا جاسايدى.
پلاستيكالىق حيرۋرگيادان باسقا، ءبىز تىرتىقتاردى ەمدەۋگە ارنالعان ءدىڭ جاسۋشالارىنىڭ پروتسەدۋرالارىن ۇسىنامىز. ول يممۋنيتەتتى ىنتالاندىرۋ ءۇشىن كوكتامىر ىشىنە ەنگىزىلەدى.
- قانداي وپەراتسيالار ەڭ كۇردەلى بولىپ سانالادى جانە قانشا ۋاقىت الادى؟
- پلاستيكالىق حيرۋرگيادا قارتايۋعا قارسى وپەراتسيالار كۇردەلى. بەتتىڭ ءبىر بولىگىن قاراپايىم تارتۋدان ايىرماشىلىعى - ول پروتسەدۋرالار ماڭداي مەن مويىندى قوسا العاندا، بىرنەشە ايماققا كەشەندى اسەر ەتۋدى قاجەت ەتەدى. مۇنداي وپەراتسيالار ايتارلىقتاي ۋاقىتتى الادى جانە دارىگەر كۇنى بويى وپەراتسيا بولمەسىندە بولادى. ءار پاتسيەنتكە ءبىر كۇن بەرىلەدى. سول سياقتى، دەنە وپەراتسيالارى دا كوپ ۋاقىتتى قاجەت ەتەدى. ادەتتە، شەتەلدىك ازاماتتار بارلىق وپەراتسيانى ءبىر ساپاردا جاساعىسى كەلەدى. كەيبىر ناۋقاستار پروتسەدۋرالاردى ەكى بولىككە ءبولۋدى ءجون كورەدى، ءبىر اپتانى بەتكە، ال ءبىر اپتادان كەيىنگى ۋاقىتىن دەنەگە ارنايدى.
- پلاستيكالىق وتالاردىڭ قۇنى نەگە بايلانىستى؟
- وپەراتسيالاردىڭ ءارتۇرلى ادىستەرى بار. مىسالى، بەتتى كوتەرۋ وپەراتسياسىندا تەرىنى ءىشىنارا اشاتىن ءادىس بار جانە بۇكىل پروتسەسس 2-3 ساعاتتى الادى. دەگەنمەن، بۇل اسەر قىسقا مەرزىمدى بولۋى مۇمكىن. سونىمەن قاتار، 20-30 جىلعا جاسارۋعا قول جەتكىزۋگە باعىتتالعان، بەتتى تولىق تارتۋدى قاجەت ەتەتىن تاعى ءبىر ءادىس بار. بۇل - ەستەتيكالىق ادەمى ناتيجەگە جەتۋ ءۇشىن كوپ ۋاقىتتى قاجەت ەتەتىن پروتسەدۋرا، ياعني وپەراتسيانىڭ باعاسى دارىگەرگە، ونىڭ تاجىريبەسىنە جانە ول قولداناتىن تەحنولوگياعا بايلانىستى.
- ەر ادامدار پلاستيكالىق وتا جاساتۋعا جۇگىنە مە؟
- شىن مانىندە، قارتايۋعا قارسى وپەراتسيالار ءۇردىسى ارتىپ، ەر ادامدارعا جەتتى. بۇرىن ولار مۇرىندارى مەن كوزدەرىن ءجيى تۇزەتپەيتىن، ءبىراق قازىر جاس كورىنگىسى كەلەتىندەر كوپ.
- كورەيالىق جاس وسپىرىمدەر تۋرالى نە ايتۋعا بولادى؟ وقۋشىلار شىنىمەن پلاستيكالىق حيرۋرگياعا جۇگىنە مە؟
- بىزدە جاس وسپىرىمدەرگە وپەراتسيا جاساۋعا رەسمي تىيىم جوق. ءبىراق ءبىز ول قادامعا بارمايمىز. وپەراتسيانى مەكتەپتى بىتىرگەننەن كەيىن، ۋنيۆەرسيتەتكە تۇسكەندە، ياعني دەنە مۇشەلەرى تولىق قالىپتاسقاندا جاساعان ابزال. جاستارعا 20 جاستان كەيىن جۇگىنۋگە كەڭەس بەرەمىز.
- سىزدە ءساتسىز پلاستيكالىق وپەراتسيالار بولدى ما؟
- ماسەلەن، پاتسيەنت 20 جىلعا جاسارعىسى كەلدى، ءبىراق ناتيجە 15 جىلدىق بولىپ شىقتى. جالپى وتا ءساتتى ءوتتى، دەگەنمەن پاتسيەنتكە تاعى ءبىر مارتە جاساۋ كەرەك سياقتى. مۇنداي جاعدايلار بولىپ تۇرادى. ارينە، كلينيكا مۇنىڭ بارىنە تۇسىنىستىكپەن قارايدى جانە ءبىز تاعى ءبىر امالىن جاساۋعا بولا ما، جوق پا، سونى قاراستىرامىز. مۇنىڭ ءبارى ناۋقاستىڭ قالاۋىنا بايلانىستى.
- پلاستيكالىق وتادان كەيىن پاتسيەنتتىڭ قالپىنا كەلۋى قانشا ۋاقىتقا سوزىلادى؟
- كەز كەلگەن وپەراتسيادان سوڭ ەكى اپتادان كەيىن كورەيادان ۇشىپ كەتە الاسىز. وسى ۋاقىتقا دەيىن بارلىق تىگىستەر الىنىپ تاستالىپ، سودان سوڭ تەكسەرۋدەن وتەدى. تولىق قالىپتاسۋ ءۇشىن 3 ايدان 6 ايعا دەيىن، كەيدە ءبىر جىلعا دەيىن كۇتۋ كەرەك. بۇل - دەنە مەن بەتكە جاسالعان وپەراتسيالارعا قاتىستى ءتارتىپ.
- تابيعي سۇلۋلىقتى ساقتاۋ كەرەك دەپ، بۇل مەديتسينالىق پروتسەدۋراعا قارسى شىعاتىن بار. بۇعان قاتىستى ءسىزدىڭ پىكىرىڭىز...
- ءتىپتى، كورەيانىڭ وزىندە پلاستيكالىق حيرۋرگياعا قارسى ادام وتە كوپ. ءبىراق مەنىڭ ويىمشا، بۇل جەردە ورتاسىن تاڭداۋ ماڭىزدى. ادەتتە، قارسىلار - وزدەرىنە سەنىمدى ادامدار. سوندىقتان ولار وزدەرىنىڭ الدەبىر جەرىن تۇزەتۋدى قاجەت ەتپەيدى.
- قانداي پلاستيكالىق وتالار ءسىزدىڭ ەسىڭىزدە قالدى؟
- قايىرىمدىلىق شاراسى ارقىلى جاسالعان وپەراتسيالار. ءبىزدىڭ ورتالىققا ورتتەن زارداپ شەككەن، ياعني بەتتەرى كۇيىپ قالعان بالالار كەلدى. تۇرمىستىق زورلىق-زومبىلىقتان زارداپ شەككەن بالالار دا بولدى. ءبىر بالاعا اكەسى قىشقىل شاشىپ جىبەرگەن. ارينە، ولاردىڭ بەتتەرىن قايتارۋ مۇمكىن ەمەس، ءبىراق قولدان كەلگەندى جاسادىق.
- اڭگىمەڭىزگە راحمەت.
اۆتورداۋلەت ىزتىلەۋ
