لاۋازىمدى تۇلعالاردىڭ ءوز بەتىنشە شەشىم قابىلداۋ فۋنكسياسى جويىلدى

Лауазымды тұлғалардың өз бетінше шешім қабылдау функциясы жойылды
Фото: Kazinform

استانا. KAZINFORM - مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى سالاۋات مۇكسىموۆ مەملەكەتتىك قىزمەتتەگى لاۋازىمدى تۇلعالاردىڭ شەشىمدى ءوز بەتىنشە قابىلداۋىنا تىيىم سالۋ سەبەبىن ءتۇسىندىردى.

«سىبايلاس جەمقورلىققا قارسى ساياساتتى كۇشەيتۋ ماقساتىندا لاۋازىمدى تۇلعالاردى ءوز بەتىنشە شەشىم قابىلداۋ فۋنكتسياسىنان ايىردىق. قازىر شەشىمدەر كوميسسيا ارقىلى قابىلدانادى. ونىڭ قۇرامىندا ساراپشىلار بار. بۇل ءادىس شەنەۋنىكتەردىڭ وزىنە دە ءتيىمدى. ويتكەنى لاۋازىمدى تۇلعا جاۋاپكەرشىلىكتى جەكە باسىنا المايدى. ونىڭ ۇستىنە سىبايلاس جەمقورلىق جانە لاۋازىمدى تۇلعاعا سەنىمسىزدىك تانىتۋ ساياساتى جاعىنان دا ماڭىزدى»، - دەدى سالاۋات مۇكسىموۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سپيكەردىڭ مالىمدەۋىنشە، شەشىمدى كوميسسيانىڭ كومەگىمەن قابىلداۋ - ءتيىمدى قۇرال.

«كوميسسيا ءبىر شەشىمگە كەلمەگەننىڭ وزىندە، ول ميسسياسىن ورىنداپ تۇر. سەبەبى ونىڭ قۇرامىندا ءارتۇرلى ۆەدومستۆو مۇشەلەرى بار. جەر قاتىناستارى سالاسىندا وبلىستىق جەر ۋچاسكەلەرىن بەرۋ جونىندەگى كوميسسيالار تاراتىلدى. سەبەبى ول ميسسيا اقتالمادى جانە وعان كوپ ۋاقىت كەتتى»، - دەيدى اگەنتتىك وكىلى.

بۇعان دەيىن س. مۇكسىموۆ مەملەكەتتىك قىزمەتتەردى الۋدا بيۋروكراتيا فاكتىلەرى ءالى دە بارىن ايتقان ەدى.

سونداي-اق، بريفينگ بارىسىندا مەملەكەتتىك قىزمەتشى جەمقورلىق جاساسا، كىم وتستاۆكاعا كەتۋ كەرەكتىگىنە تۇسىنىك بەرىلدى.

سوڭعى جاڭالىقتار