ەل وڭىرلەرىندە مەكتەپ فورماسى قانشادان ساتىلىپ جاتىر
استانا. KAZINFORM - وقۋ جىلىنىڭ باستالۋىنا از ۋاقىت قالدى. قازىر اتا-انا دۇكەن، بازار ارالاپ بالالارىن مەكتەپكە دايىنداپ جاتىر. وقۋ قۇرالدارىنان بولەك، ءبىر وقۋشىنى كيىندىرۋ قانشا تۇرادى؟ اگەنتتىك ءتىلشىسى ەل وڭىرلەرىندەگى مەكتەپ فورماسى باعاسىنا شولۋ جاساعان ەدى.
ەلىمىزدە مەكتەپ فورماسىنىڭ ءبىرىڭعاي تالابى بار. وقۋشىلارعا ارنالعان كيىم ۇلگىسى كلاسسيكالىق بولۋى ءتيىس ءارى ۇشتەن ارتىق ءتۇس قولدانباعان ءجون.
ۇلدارعا ارنالعان مەكتەپ فورماسىنا - پيدجاك، كەۋدەشە، شالبار، مەرەكەلىك جانە كۇندەلىكتى كيەتىن جەيدە، پولو نەمەسە تەننيس جەيدەسى كىرەدى. شالبار توبىقتى جاۋىپ، كەڭ تۇرۋى كەرەك.
قىزدارعا ارنالعان مەكتەپ فورماسىنا - پيدجاك، كەۋدەشە، بەلدەمشە (يۋبكا)، شالبار، كلاسسيكالىق جەيدە نەمەسە توقىلعان جەمپىر نەمەسە كارديگان، پولو نەمەسە تەننيس جەيدەسى، سارافان كىرەدى.
مەكتەپ فورماسىنا وتە ۇنەمدەگەننىڭ وزىندە 30 مىڭ تەڭگە قاجەت. مۇنىڭ ءوزى ەڭ قاجەت دەگەن كيىمدەردى ءبىر دانادان العاندا، سەبەبى بالا وسەدى، كيىم ءبۇلىنۋى مۇمكىن نەمەسە ناشار ساپا ىقتيمال.
اقتوبە مەن سەمەيدە مەكتەپ فورماسىن 20-40 مىڭ تەڭگەگە ساتىپ الۋعا بولادى. وسكەمەندە 25-50 مىڭ تەڭگە، ال ورالدا 25-40 مىڭ تەڭگەدەن ساتىلىپ جاتىر.
كوكشەتاۋدا 35-50 مىڭ تەڭگەگە الا الاسىز، پەتروپاۆلدا بازالىق مەكتەپ فورماسى 20 مىڭ تەڭگەدەن باستالادى. قارا جانە كوك كوستيۋمدى 15 مىڭ تەڭگەگە، ال ۇلدارعا ارنالعان جەيدەنى 5 مىڭ تەڭگەگە ساتىپ الۋعا بولادى.
ايتپاقشى، وتاندىق جانە قىتاي تاۋارلارىنىڭ باعا ايىرماشىلىعى بارىن ەسكەرگەن ءجون. ارينە، باعاعا ماتا ساپاسىنىڭ اسەرى زور. س ق و- داعى مەكتەپ فورماسىن تىگەتىن ءوندىرىس كاتالوگىنا ۇڭىلسەك، ۇلدارعا ارنالعان شالبار 9000 تەڭگە، كەۋدەشە 9000-10000 تەڭگە، گالستۋك — 1300 تەڭگە، پيدجاك - 18000 - 20000 تەڭگە، جالپى سوماسى 40 مىڭ تەڭگە شىعادى. ودان بولەك، جەيدە الۋ قاجەت. قىزدارعا كەلسەك، جاكەت 15000 تەڭگە، كەۋدەشە 9600 تەڭگە، بەلدەمشە (يۋبكا) 8000 تەڭگە شاماسىندا، سارافان 16000 تەڭگە، پيدجاك 18000 تەڭگە، شالبار 13000 تەڭگە.
قوستانايدا وقۋشى فورماسىن كەم دەگەندە 25-30 مىڭ تەڭگەگە جيناي الاسىز. وڭىردەگى «بولشيەۆيچكا» جانە «ازۋريت» تىگىن فابريكاسى قولجەتىمدى باعاعا ۇسىنىپ وتىر. بەلدەمشە (يۋبكا) 3500 تەڭگەدەن 6000 تەڭگە ارالىعىندا، كەۋدەشە 15-20 مىڭ تەڭگە، ۇلدارعا ارنالعان شالبار 10000 تەڭگە جانە كوستيۋم 17-24 مىڭ تەڭگەدەن ساتىلىپ جاتىر.
جەرگىلىكتى بازارلاردا قىزدارعا ارنالعان جەيدەنى 4-10 مىڭ تەڭگەگە، ال ۇلدارعا ارنالعان جەيدەنى 5-10 مىڭ تەڭگە، ۇلدارعا ارنالعان شالبار 10000 تەڭگەدەن باستالادى، ۇلدارعا ارنالعان كوستيۋم 15000 تەڭگەدەن باستالادى، پيدجاك جانە بەلدەمشە (قىزدارعا ارنالعان) 12-22 مىڭ تەڭگە ارالىعىندا ساتىلىپ جاتىر. بانتيك 700 بەن 1500 تەڭگە، ال ۇزىن شۇلىق (گولف) 800 جانە 2500 تەڭگە ارالىعىن قۇرايدى.
ساۋدا ۇيلەرىندە باعا باسقاشا، ۇلدارعا ارنالعان كوستيۋم 34 مىڭ تەڭگەدەن باستالىپ، 65 مىڭ تەڭگەگە دەيىن جەتەدى، جەيدە 4 -11 مىڭ تەڭگە ارالىعى، بەلدەمشە- كويلەك 5 مىڭ جانە 15 مىڭ تەڭگە ارالىعىندا. ۇلدارعا ارنالعان شالبار 11 مىڭ تەڭگەدەن باستالىپ، 17 مىڭ تەڭگەگە دەيىن جەتەدى، ال جەيدەنى تاڭداۋعا قاراي 8-22 مىڭ تەڭگەگە ساتىپ الۋ مۇمكىندىگى بار.
اتىراۋدا مەكتەپ فورماسى 30-45 مىڭ تەڭگە تۇرادى. ۇلدارعا ارنالعان كوستيۋم 30-45 مىڭ، قىزدارعا ارنالعان جەيدە 6,5-10 مىڭ تەڭگە، قىزدارعا ارنالعان پيدجاك 17000 تەڭگە، بەلدەمشە (يۋبكا) 9-15 مىڭ تەڭگە تۇرادى.
قىزىلوردادا ءبىر بالاعا مەكتەپ فورماسىن كيىندىرۋ ءۇشىن 30-40 مىڭ تەڭگە جۇمسالادى. اتاپ ايتساق، سارافان 8-10 مىڭ تەڭگە، كويلەك - 4-20 مىڭ تەڭگە، كەۋدەشە - 11-14 مىڭ تەڭگە، ۇلدارعا ارنالعان كوستيۋم - 15-45 مىڭ تەڭگە، ال شالبار- 6-25 مىڭ تەڭگە ارالىعىندا.
قاراعاندىدا مەكتەپ فورماسىنا كەم دەگەندە 25000 تەڭگە قاجەت. سارافان 8000 تەڭگەدەن باستالادى، جەيدە - وت 3,5-20 مىڭ تەڭگە اراسىندا، كەۋدەشە - 13 مىڭ تەڭگەدەن باستالادى. ۇلدارعا ارنالعان كوستيۋم 18 مىڭنان 45 مىڭ تەڭگەگە دەيىن جەتەدى. شالبار 8 مىڭ تەڭگەدەن باستالىپ 20 مىڭعا جەتەدى. ودان بولەك، سپورتتىق كيىم جانە كروسسوۆكا تاعى بار.
جەزقازعاندا دا شامامەن وسى باعا، دەگەنمەن كەيبىر جەرلەردە %5-10- عا قىمبات. ءبىراق، ساپالى تاۋار از.
تۇركىستاندا مەكتەپ فورماسىن 30-50 مىڭ تەڭگەگە ساتىپ الا الاسىز. ۇلدارعا ارنالعان جەيدە 6000 تەڭگە، كوستيۋم ورتاشا 30-45 مىڭ تەڭگە، جەيدە 6-10 مىڭ تەڭگە، قىزدارعا ارنالعان پيدجاك 15-25 مىڭ تەڭگە، بەلدەمشە (يۋبكا) 6-10 مىڭنان ساتىلىپ جاتىر.
پاۆلوداردا وقۋشى فورماسىنىڭ باعاسى 35 مىڭ تەڭگەدەن باستالادى. قىزدارعا ارنالعان جەيدە 3-9,5 مىڭ تەڭگە، بەلدەمشە (يۋبكا) 4-10 مىڭ تەڭگە، قىزدارعا ارنالعان شالبار 5-11 مىڭ تەڭگە، پيدجاك -12-24 مىڭ تەڭگە، ۇلدارعا ارنالعان جەيدە - 4-8 مىڭ تەڭگە، كوستيۋم - 30000 تەڭگە، شالبار - 10-12 مىڭ تەڭگە.
تالدىقورعاندا مەكتەپ فورماسىنا كەمى 30 مىڭ تەڭگە قاجەت. قىزدارعا ارنالعان جەيدە مەن بەلدەمشە 8000 تەڭگە، ۇلداردىڭ كوستيۋمى 15-25 مىڭ تەڭگە ارالىعىندا ساتىلىپ جاتىر.
استانا مەن شىمكەنتتە تاڭداۋ كوپ، ءىرى تاۋار وندىرۋشىلەردىڭ دۇكەنىنەن تىكەلەي الۋعا بولادى. ىزدەسەڭىز ارزانعا تاباسىز، ءبىر بالانى كيىندىرۋگە شامامەن 25-40 مىڭ تەڭگە جۇمساۋ قاجەت.
مەكتەپ فورماسىن تاڭداعاندا باستىسى نەگە نازار اۋدارۋ كەرەك؟ وسى ورايدا دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتى ماماندارىنىڭ كەڭەسىنە قۇلاق اسساق.
«مەكتەپ فورماسىن تاڭداۋ - وقۋ جىلىنىڭ باسىندا اتا-انالار مەن بالالاردىڭ الدىندا تۇرعان ماڭىزدى مىندەت. كۇنى بويى وقۋشىنىڭ جايلىلىعى مەن كوڭىل-كۇيى فورمانىڭ قانشالىقتى ىڭعايلى ەكەنىنە بايلانىستى. مەكتەپ فورماسىن تاڭداعاندا نازار اۋدارۋ كەرەك نەگىزگى كريتەرييلەردى قاراستىرىڭىز. الدىمەن ماتەريال، ماتانىڭ ساپاسى شەشۋشى ءرول اتقارادى. ءپىشىن جايلىلىق پەن بەرىكتىكتى قامتاماسىز ەتەتىن تابيعي نەمەسە ارالاس ماتالاردان تىگىلۋى كەرەك. تەرىنى تىتىركەندىرەتىن جانە اۋا وتكىزبەيتىن تولىق سينتەتيكالىق ماتالاردان اۋلاق بولىڭىز. كيىم قوزعالىستى شەكتەمەۋى كەرەك. بالانىڭ قولىن ەركىن كوتەرىپ، وتىرا الاتىندىعىنا كوز جەتكىزىڭىز»، - دەيدى ماماندار.
جالپى سالىستىرمالى تۇردە الىپ قاراساق، مەكتەپ فورماسىن قولجەتىمدى باعاعا الۋعا بولادى. ءبىراق، نەگىزگى كيىمدەردەن بولەك، سپورتتىق كيىمدەر بار سول سياقتى ارتىق جەيدە مەن شالبار تاعى كەرەك. سونداي- اق، بالا ءسىز تاڭداعان كيىمدى العىسى كەلمەۋى مۇمكىن، بۇل جەردە باعا ايىرماشىلىعى بار. ەڭ باستىسى كيىم ىڭعايلى ءارى ءقاۋىپسىز بولعانى ابزال. ارينە، اتا-انانىڭ قالتاسى كوتەرسە، بالاسىن قىمبات ءارى ساپالى كيىندىرۋ مۇمكىندىگى بار.
تىلگە تيەك ەتسەك، «گەوستاتيستيكا» تەلەگرام كانالى قازاقستاندا مەكتەپ فورماسىنىڭ تمد ەلدەرى اراسىندا ەڭ قىمبات ەكەنىن حابارلادى. پورتالدىڭ مالىمەتىنشە، بالانى مەكتەپكە كيىندىرۋگە كەمى 70 مىڭ تەڭگە كەرەك، ال ەڭ ارزان مەكتەپ كيىمدەرى ءازىربايجاندا ەكەن.
ايتا كەتەيىك، وقۋ-اعارتۋ مينيسترلىگىنىڭ مالىمەتىنشە، بيىل ءبىرىنشى سىنىپقا 336000 نان استام بالا قابىلداندى.
