ەل وڭىرلەرى قانداي ونىمدەرىمەن ماقتانا الادى

استانا. KAZINFORM - ادىلەت مينيسترلىگىنىڭ رەسمي وكىلى تالعات ۋالي قازاقستان وڭىرلەرى قانداي ونىمدەرىمەن ماقتانا الاتىندىعىن ايتتى.

- ادىلەت مينيسترلىگىندە قازاقستاندىق كاسىپكەرلەردىڭ 100 دەن استام گەوگرافيالىق كورسەتكىشتەرى تىركەلدى. گەوگرافيالىق كورسەتكىش - بۇل بەلگىلى ءبىر گەوگرافيالىق ايماقتان شىققان جانە سول جەردىڭ ەرەكشەلىكتەرىنە بايلانىستى بىرەگەي قاسيەتتەرگە يە زياتكەرلىك مەنشىك نىسانى. ءار ءوڭىر ءوز ونىمدەرىمەن ماقتانا الادى.

مىسالى، جامبىل وبلىسىندا ونداعان جىلدار بويى ءوندىرىلىپ كەلە جاتقان بۋرنەن ىرىمشىكتەرى، مايى جانە ءسۇتى جوعارى باعالانادى.

ماڭعىستاۋ وبلىسى «مۇنايلى شۇجىعى»، «ماڭعىستاۋ قازىسى» سىندى ءداستۇرلى دەليكاتەستەرىمەن ەرەكشەلەنەدى.

ال شىعىس قازاقستان ءوزىنىڭ كاتونقاراعاي بالى ارقىلى تانىمال. ول ەلدەگى بال ەكسپورتىنىڭ 70 پايىزىن قۇرايدى.

سولتۇستىك قازاقستان «سەرگەيەۆ» مايى، ىرىمىشىگى، قۇرت جانە پەتروپاۆلدىڭ تاتتىلەرىمەن تانىمال، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، بۇگىندە قازاقستاندا «الماتىلىق اپورت»، «تۇركىستان» بالمۇزداعى، «تۇركىستان» شوكولادى، «قاراعاندى» بالمۇزداعى جانە باسقا دا ۇلتتىق گەوگرافيالىق كورسەتكىشتەر تىركەلگەن.

- گەوگرافيالىق كورسەتكىشتەردى دامىتۋ قازاقستاننىڭ ۇلتتىق برەندىن قالىپتاستىرۋعا، تاۋارلاردىڭ الەمدىك نارىقتا تانىلۋىنا جانە ينۆەستيتسيالار تارتۋعا، سونداي-اق تۋريزمدى دامىتۋعا ىقپال ەتەدى. قازاقستاندىق كاسىپكەرلەردى گەوگرافيالىق كورسەتكىشتەردى قورعاۋ مۇمكىندىكتەرىن بەلسەندى پايدالانۋعا، بىرەگەي مادەني جانە تابيعي مۇرانى ساقتاۋعا شاقىرامىز، - دەدى تالعات ءۋالي.

بۇعان دەيىن ەلىمىزدە تەك ءبىر جەردە عانا شىعارىلاتىن، وزىندىك تاريحى بار ءونىم زاڭمەن قورعالاتىنىن جازعان ەدىك.