ەلدە ەتتىڭ كۇرت قىمباتتاۋىنا نەگىز جوق - مينيسترلىك

اۋىل شارۋاشىلىعى ۆيتسە- ءمينيسترى نازگۇل حاتەپوۆانىڭ ايتۋىنشا، مينيسترلىك ەت باعاسىنا كۇن سايىن مونيتورينگ جۇرگىزەدى. استاناداعى ساۋدا ورىندارىندا باعا ءارتۇرلى قالىپتاسقان.

- مىسالى، شاپاعات بازارىندا سيىر ەتىنىڭ باعاسى شامامەن 3500 تەڭگە بولسا، ارتەمدە 4400-4500 تەڭگە كولەمىندە. جالپى رەسپۋبليكا بويىنشا سيىر ەتىنىڭ ورتاشا باعاسى - كەلىسىنە 3800 تەڭگە، - دەدى ن. حاتەپوۆا ۇكىمەت ۇيىندە وتكەن بريفينگتە.

ۆيتسە-مينيستر ەلدەگى ىشكى نارىقتىڭ سيىر ەتىمەن تولىق قامتاماسىز ەتىلىپ وتىرعانىن اتاپ ءوتتى.

- وتكەن جىلدىڭ قورىتىندىسى بويىنشا 434 مىڭ توننا سيىر ەتى ءوندىرىلدى. بيىل دا العاشقى 8 ايدا ءوندىرىس كولەمىنىڭ وسكەنىن كورىپ وتىرمىز. مال باسى دا ارتىپ كەلەدى. سوندىقتان سيىر ەتىنىڭ باعاسى كۇرت وسەدى دەپ بولجاۋعا ەش نەگىز جوق،- دەدى مينيسترلىك وكىلى.

بۇعان دەيىن نازگۇل حاتەپوۆا ەلدەگى كارتوپ ەگۋ القابى 5,5 مىڭ گەكتارعا كوبەيگەنىن، ولاردى ساقتايتىن قويمالار دا جەتكىلىكتى ەكەنىن ايتقان ەدى.

كولىك ۆيتسە-ءمينيسترى جانىبەك تايجانوۆ قازاقستان استىعى قاي ەلدەرگە كوبىرەك ەكسپورتتالاتىنىن باياندادى.