ەل قۇراماسىنىڭ قورجىنىندا ازىرگە 25 جولداما بار - ەلسيار قاناعاتوۆ

Парижге жолдама
Фото: Әділет Бірімқұлов / Kazinform

استانا. KAZINFORM - بۇگىن استانا قالاسىندا مەملەكەت باسشىسىنىڭ تاپسىرماسى بويىنشا قۇرىلعان وليمپيا ويىندارىنا دايىندىق شتابى كەزەكتى وتىرىسىن وتكىزىپ، 2024-جىلى پاريجدە وتەتىن ويىندارعا دايىندىق بارىسىن تالقىلاپ، مينيسترلىككە قاراستى مەكەلەمەلەرمەن كەڭەيتىلگەن جيىنىن وتكىزدى.

اتالعان جيىنعا قازاقستان رەسپۋبليكاسىنىڭ تۋريزم جانە سپورت ءمينيسترىنىڭ ورىنباسارى سەرىك جاراسپايەۆ، سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەربول مىرزابوسىنوۆ جانە اتالعان شتابتىڭ باسشىسى ەلسيار قاناعاتوۆ قاتىستى.

جيىن بارىسىندا ءبىرقاتار ماسەلە تالقىعا ءتۇستى. اتاپ ايتساق، پاريج وليمپياداسىنا جولدامالار سانىن بارىنشا ۇلعايتۋ، جولداما العان سپورتشىلاردىڭ ءتورت جىلدىقتىڭ باستى دوداسىنا دايىندالۋىنا ەرەكشە جاعداي جاساۋ، سپورتتىق مەديتسينا، ۇلتتىق قۇرامانىڭ سپورتتىق فورمالارىن دايىنداۋ بارىسى تالقىلاندى.

ءوز كەزەگىندە اتالعان شتاب باسشىسى ەلسيار قاناعاتوۆ سوڭعى كۇندەرى جولداماعا تالاسقان سپورتشىلارىمىزدىڭ جوعارى كورسەتكىشكە قول جەتكىزگەنىن باسا ايتتى.

«بوكستان يتاليادا وتكەن ليتسەنزيالىق تۋرنيردە قازاقستاندىق بىلعارى قولعاپ شەبەرلەرى وتە جوعارى كورسەتكىشكە قول جەتكىزدى. ءبىز 3-4 جولداما الامىز دەپ جوسپارلاعان ەدىك. وزدەرىڭىز كورگەندەي، 6 بوكسشى بارىپ، 5 جولداماعا قول جەتكىزدى. بۇل - ۇلكەن كورسەتكىش. مىنە، بۇگىن قىتايدىڭ تايان قالاسىندا تاەكۆوندودان ءوتىپ جاتقان ليتسەنزيالىق تۋرنيردە تاعى ءبىر وتانداسىمىز باتىرحان تولەۋعالي پاريج وليمپياداسىنا جولداما جەڭىپ الدى. جولدامالار سانى بۇنىمەن توقتامايدى»، - دەپ اتاپ ءوتتى ەلسيار قاناعاتوۆ.

سونىمەن قاتار ءوز كەزەگىندە تۋريزم جانە سپورت ءمينيسترىنىڭ ورىنباسارى سەرىك جاراسپايەۆ وليمپيادا ويىندارىنىڭ باستالۋىنا 134 كۇن عانا قالعانىن ايتا كەلە ەلىمىزدىڭ بارلىق وڭىرىندە ءساۋىر ايىندا سپورتشىلارىمىزدى قولداۋ ماقساتىندا «وليمپياداعا 100 كۇن» اياسىندا بۇقارالىق سپورتتان جارىس، ءار ءتۇرلى ءىس-شارالار ۇيىمداستىرىلاتىنى تۋرالى اتاپ ءوتتى.

«قازاقستان قۇراماسىنىڭ قورجىنىندا ازىرگە پاريج وليمپياداسىنا 25 جولداما بار. سپورتشىلارىمىز جالپى 90 عا جۋىق جولداماعا يەلىك ەتەدى دەپ جوسپارلاپ وتىرمىز. بارلىعىن ۋاقىت كورسەتەدى. سونداي-اق جۇلدەگە ۇمىتكەر 54 سپورتشىدان تۇراتىن ءتىزىم جاساقتالدى. قۇراما كوشباسشىلارى ءار سپورت ءتۇرىنىڭ ەرەكشەلىگىن ەسكەرە وتىرىپ، ارنايى جوسپارمەن دايىندالادى. وليمپيادا الدىنداعى تەستىلىك جارىستارعا قاتىسۋ دا ماڭىزدى ەكەنى تىلگە تيەك ەتىلدى. ءار سپورت ءتۇرىنىڭ جارىس كەستەسىنە سايكەس، كوماندالاردىڭ پاريجگە ۇشىپ بارۋ ۋاقىتى بەكىتىلەتىن بولدى»، - دەدى سەرىك جاراسپايەۆ.

ايتا كەتەيىك، ءتورتجىلدىقتىڭ باستى دوداسى 26- شىلدە مەن 11- تامىز ارالىعىندا فرانسيا استاناسى پاريجدە وتەدى. وعان الەمنىڭ 205 ەلىنەن 10 مىڭنان استام سپورتشى قاتىسىپ، 32 سپورت تۇرىنەن 329 مەدال جيىنتىعى ساراپقا سالىنادى.

اۆتور كۇنسۇلتان وتارباي

سوڭعى جاڭالىقتار