ەلدە قان اينالىمى دەرتىنە قانشا ادام شالدىققان

- جۇرەك-قانتامىر اۋرۋلارىنىڭ الدىن الۋ مەن ەمدەۋ - ادام ءومىرىن ساقتاۋدىڭ ماڭىزدى شارتى. بۇل ماسەلە حالىقتىڭ ءومىر ءسۇرۋ ۇزاقتىعى مەن ساپاسىنا دا تىكەلەي اسەر ەتەدى. سوندىقتان دامىعان ەلدەر اۋرۋدى ەرتە انىقتاۋعا، ءتيىمدى ەمدەۋگە جانە مەديتسينالىق كومەكتىڭ قولجەتىمدىلىگىن ارتتىرۋعا باسىمدىق بەرەدى. 2026 -جىلدىڭ باسىنداعى مالىمەتكە قاراعاندا، قان اينالىم جۇيەسى اۋرۋلارى بار 1,9 ميلليون پاتسيەنت مەديتسينالىق باقىلاۋدا تۇرعان. بۇل ەرەسەك تۇرعىنداردىڭ 14,4 پايىزىنا تەڭ. ونىڭ ىشىندە 114 مىڭ جاعداي العاش رەت انىقتالعان. سونىمەن قاتار پاتسيەنتتەردىڭ 90 پايىزى امبۋلاتوريالىق دەڭگەيدە ەم قابىلدايدى. دەگەنمەن، العاشقى مەديتسينالىق- سانيتارلىق كومەك جۇيەسىندە ءبىرقاتار وزەكتى ماسەلە بار، - دەدى جۇلدىز دانبايەۆا دەنساۋلىق ساقتاۋ ءمينيسترىنىڭ اتىنا جولداعان دەپۋتاتتىق ساۋالىندا.

ونىڭ ايتۋىنشا، كارديولوگيالىق قىزمەتتى دامىتۋدا كادر تاپشىلىعى دا وزەكتى ماسەلە بولىپ وتىر. قاجەتتىلىك 4014 ماماندى قۇراعانىمەن، ءىس جۇزىندە ەلىمىزدە 661 مامان عانا جۇمىس ىستەيدى. ماتەريالدىق- تەحنيكالىق بازانى دا جاڭارتۋ قاجەت. مەديتسينالىق جابدىقتاردىڭ توزۋى شامامەن 40 پايىزدى قۇرايدى. ال العاشقى مەديتسينالىق-سانيتاريالىق كومەك ۇيىمدارىندا باستاپقى كارديودياگنوستيكاعا قاجەتتى جابدىقتار تولىق ەمەس.

- سكرينينگتىڭ قامتۋ اۋقىمى دا شەكتەۋلى. قولدانىستاعى جۇيە 30 جاستان اسقان ازاماتتار مەن جەكەلەگەن توپتاردى عانا قامتيدى. بۇل اۋرۋدىڭ ءقاۋپىن ەرتە انىقتاۋدى تومەندەتەدى. ءدارى-دارمەكپەن قامتاماسىز ەتۋ دە تولىق شەشىلمەگەن. امبۋلاتوريالىق دارىلىك قامتاماسىز ەتۋ قاجەتتىلىكتىڭ 40-50 پايىزىن عانا وتەيدى. جەتكىزۋدەگى ىركىلىستەر سالدارىنان پرەپاراتتار جىلىنا 8-10 اي عانا قولجەتىمدى بولىپ، ەمنىڭ ۇزدىكسىزدىگىنە نۇقسان كەلەدى. ال جۇرەك-قانتامىر اۋرۋلارىن ءتيىمدى باقىلاۋ ءۇشىن ءدارىنى تۇراقتى قابىلداۋ اسا ماڭىزدى،-دەدى دەپۋتات.

وسىعان بايلانىستى «ادىلەت» پارتياسى فراكسياسى مينيسترلىككە مىناداي ۇسىنىستاردى ەنگىزدى:

- ءىرى العاشقى مەديتسينالىق-سانيتاريالىق كومەك ۇيىمدارى بازاسىندا ءار 150 مىڭ تۇرعىنعا ءبىر ينۆازيۆتى ەمەس دياگنوستيكا ورتالىعىن قۇرۋدى جانە تەراپيەۆتەر مەن جالپى پراكتيكا دارىگەرلەرىن قايتا دايارلاۋدى؛

- 18 جاستان باستاپ حالىقتى سكرينينگتەن وتكىزۋگە ارنالعان جاساندى ينتەللەكت باعدارلامالارىن جانە پاتسيەنتتەردىڭ جاعدايىن قاشىقتان مونيتورينگتەۋ جۇيەسىن ەنگىزۋدى؛

- كارديولوگيالىق قىزمەتتى جاڭعىرتۋ، كادرلىق الەۋەتتى ارتتىرۋ جانە مەديتسينالىق كومەكتىڭ قولجەتىمدىلىگىن جاقسارتۋ ماقساتىندا كەشەندى ترانسفورماتسيا باعدارلاماسىن ازىرلەۋدى ۇسىندى.

ايتا كاەتەيىك، جۇرەك-قان تامىرلارى اۋرۋلارىن، قانت ديابەتىن جانە گلاۋكومانى انىقتاۋعا ارنالعان سكرينينگتەن 40-76 جاس ارالىعىنداعى ەرلەر مەن ايەلدەر ەكى جىلدا ءبىر رەت وتەدى.