ەل مەكتەپتەرىندە سوڭعى قوڭىراۋدىڭ ورنىنا ءبىرىڭعاي سىنىپ ساعاتى وتەدى

мектеп
Фото: Жасанды интеллект фотоиллюстрациясы

استانا. KAZINFORM - قازاقستاندىق مەكتەپتەردە وقۋ جىلىنىڭ اياقتالۋىنا ارنالعان ءبىرىڭعاي سىنىپ ساعاتى وتەدى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى.

2023-2024 وقۋ جىلىن 3,8 ميلليوننان استام قازاقستاندىق وقۋشى اياقتايدى، ونىڭ 186 مىڭى مەكتەپ تۇلەكتەرى.

بيىلعى وقۋ جىلىنىڭ ۇزاقتىعى 34 اپتانى قۇرايدى، وقۋ 25-مامىردا اياقتالادى.

«سۋ تاسقىنىنان ورىن العان جاعدايعا جانە 25-مامىردىڭ دەمالىس كۇنىنە سايكەس كەلۋىنە بايلانىستى 24-مامىر كۇنى بارلىق مەكتەپتەردە ساباقتا 2023-2024 وقۋ جىلىنىڭ اياقتالۋىنا ارنالعان سىنىپ ساعاتى ۇيىمداستىرىلادى. وندا سىنىپ جەتەكشىلەرى وقۋشىلارمەن بىرگە وتكەن وقۋ جىلىن قورىتىندىلايدى»، - دەپ اتاپ ءوتتى تاربيە جۇمىسى جانە قوسىمشا ءبىلىم بەرۋ دەپارتامەنتى ديرەكتورىنىڭ ورىنباسارى قارلىعاش قۇرمانبەكوۆا.

11-(12) سىنىپ تۇلەكتەرىنە اتتەستات تاپسىرۋ جانە ەرەكشە ۇلگىدەگى «التىن بەلگىمەن» ماراپاتتاۋ 12-15-ماۋسىم ارالىعىندا مەكتەپتەردەگى بارلىق ەمتيحاندار اياقتالعاننان كەيىن وتەدى.

ايتا كەتەيىك، 9-11-سىنىپ تۇلەكتەرىنىڭ قاۋىپسىزدىگىن جانە ەمتيحاندارعا ساپالى دايىندىعىن قامتاماسىز ەتۋ ماقساتىندا اقشا جيناۋعا، سالتاناتتى ءىس-شارالار، بانكەتتەر ۇيىمداستىرۋعا جانە اۆتوموبيلدەرمەن شىعۋعا تىيىم سالىنادى.

سوڭعى جاڭالىقتار