ەل مەكتەپتەرىندە سوڭعى قوڭىراۋ 25-مامىردا سوعىلاتىن بولدى

استانا. KAZINFORM — بۇعان دەيىن ەلىمىزدەگى سۋ تاسقىنىنا بايلانىستى سوڭعى قوڭىراۋ سالتاناتى وتكىزىلمەيتىنى ايتىلعاندى. بۇل اقپارات قوعامدا ءبىراز تالقىعا ءتۇسىپ، كوپشىلىگى قارسىلىق تانىتتى.

بۇگىن ق ر وقۋ-اعارتۋ مينيسترلىگىنىڭ اپپاراتتىق وتىرىسىندا مينيستر عاني بەيسەمبايەۆ ەلىمىزدەگى 186 مىڭ مەكتەپ ءبىتىرۋشى ءۇشىن وقۋ جىلىنىڭ اياقتالۋىنا ارنالعان سوڭعى قوڭىراۋ شاراسىن 25-مامىردا وتكىزۋدى تاپسىردى.

«بيىلعى وقۋ جىلى 25-مامىردا اياقتالاتىنىن قاتاڭ ەسكەرتەمىن. وسىعان وراي وقۋ باعدارلاماسىن جىل بويىنا تابىستى مەڭگەرگەن 3,8 ميلليوننان استام وقۋشى كەلەسى سىنىپتارعا كوشىرىلسىن. مەكتەپتىڭ 1-10 سىنىپ وقۋشىلارىنا «ءبىلىمىم وتانىما» تاقىرىبىنداعى ءبىرىڭعاي سىنىپ ساعاتىن وتكىزۋ 24-مامىر جۇما كۇنىنە جوسپارلانسىن. بۇل بىلتىرعى جىلدىڭ قىركۇيەك ايىندا ەنگىزىلگەن «ءبىرتۇتاس تاربيە باعدارلاماسى» شەڭبەرىندە قابىلدانعان جوسپارعا سايكەس ۇيىمداستىرىلۋى ءتيىس. ارىپتەستەرىمىزدىڭ ۇسىنىسى بويىنشا ەلىمىزدە مامىر ايىندا «ىنتىماق ايى» ايلىعىن وتكىزۋ جوسپارلانعان. ونىڭ اياسىندا «تازا قازاقستان»، «يگى ىستەر»، «كانيكۋلدا كىتاپ وقيىق» جانە باسقا شارالار قاراستىرىلعان. سونىمەن قاتار، ەلىمىزدەگى 186 مىڭ مەكتەپ ءبىتىرۋشى ءۇشىن وقۋ جىلىنىڭ اياقتالۋىنا ارنالعان سوڭعى قوڭىراۋ شاراسىن 25-مامىردا وتكىزۋدى تاپسىرامىن»، - دەدى مينيستر.

جيىن بارىسىندا عاني بەيسەمبايەۆ توتەنشە جاعداي كەزىندە ەۆاكۋاتسيالىق پۋنكتە بالالار مەن تۇرعىندارعا پسيحولوگيالىق كومەك كورسەتكەن 400 دەن استام مەكتەپ پسيحولوگى، ءوز مىندەتىن اتقارا ءجۇرىپ، كەلگەن قيىندىقتى ەلمەن بىرگە ەڭسەرۋگە قاتىسقان 29 مىڭنان استام پەداگوگ پەن ءبىلىم سالاسى قىزمەتكەرلەرىنىڭ ولشەۋسىز ەڭبەگىن ەرەكشە اتاپ ءوتتى.