ەل مەكتەپتەرىندە ساداق اتۋدان تەگىن سەكسيالار ىسكە قوسىلادى

ق ر ۇلتتىق ساداق اتۋ فەدەراتسياسىنىڭ اتقارۋشى ديرەكتورى ەدىل تەمىربەكوۆتىڭ ايتۋىنشا، مەكتەپ - بالالاردى وسى سپورت تۇرىمەن تانىستىرۋ ءۇشىن ەڭ قولايلى الاڭ. ساداق اتۋ وقۋشىلاردىڭ زەيىنىن شوعىرلاندىرۋعا، سابىرلىققا، توزىمدىلىك پەن ءوزىن-ءوزى باقىلاۋ قابىلەتىن دامىتۋعا كومەكتەسەدى.

جوبا تۋريزم جانە سپورت مينيسترلىگىنىڭ، سپورتتى دامىتۋ ديرەكتسياسىنىڭ جانە وڭىرلىك اكىمدىكتەردىڭ بەلسەندى قولداۋىمەن جۇزەگە اسىرىلىپ جاتىر. مەملەكەتتىك قولداۋ وڭىرلەردى قاجەتتى قۇرال- جابدىقتارمەن قامتاماسىز ەتۋدەن باستاپ، بىلىكتى كادرلاردى دايارلاۋعا دەيىنگى نەگىزگى ماتەريالدىق- تەحنيكالىق ماسەلەلەردى شەشۋگە مۇمكىندىك بەرەدى. ساداق اتۋ - تەحنيكالىق تۇرعىدان كۇردەلى سپورت ءتۇرى، مۇندا جابدىقتار (ساداق، جەبەلەر) بالانىڭ جەكە فيزيكالىق كورسەتكىشتەرىنە قاراي تاڭدالادى. مەملەكەت قولداۋى جاس قازاقستاندىقتاردىڭ زاماناۋي ءارى قاۋىپسىز جابدىقتارمەن تەگىن جاتتىعۋى ءۇشىن ماتەريالدىق بازانى جاڭارتۋعا كومەكتەسەپەك.

مەكتەپ توپتارىن دامىتۋ - بۇل سپورتتىق رەزەرۆتى دايارلاۋدىڭ جۇيەسىن قۇرۋدىڭ ءبىرىنشى كەزەڭى. ەڭ قابىلەتتى وقۋشىلار بولاشاقتا ارنايى سپورت مەكتەپتەرى مەن سەكتسيالارىنا اۋىسا الادى. جاس ساداقشىلار تۇراقتى تاجىريبە جيناقتاۋى ءۇشىن ەلدە قازاقستان رەسپۋبليكاسىنىڭ جاستار ليگاسى بەلسەندى تۇردە دامىپ كەلەدى. U-15 جانە U-18 جاس ساناتتارىنا ارنالعان جارىستار بۇكىل ەلدەن كەلگەن جاستارعا سايىسقا ءتۇسىپ، بابىن ساقتاۋعا جانە ءوز جەتىستىكتەرىن شىنايى باعالاۋعا مۇمكىندىك بەرەدى.

- ءبىز ءبىرىزدى مودەلدى قالىپتاستىرۋعا ۇمتىلامىز: بالالارعا ارنالعان مەكتەپ سەكتسياسى، U-15 ليگاسى، U-18 جارىستارى، U-21 جاستار قۇراماسى جانە سوڭىندا ۇلتتىق كوماندا. ءاربىر تالانتتى بالا ءبىرىنشى جەبەسىنەن باستاپ ۇلكەن ارەنالارعا دەيىنگى ءوز جولىن ناقتى ءتۇسىنۋى ءتيىس، - دەپ اتاپ ءوتتى ەدىل تەمىربەكوۆ.

كادرلىق الەۋەتتى نىعايتۋداعى كەلەسى قادام استانا قالاسىنداعى قازاقستان ۇلتتىق سپورت ۋنيۆەرسيتەتىنىڭ بازاسىندا ساداق اتۋ ارنايى اكادەمياسىن اشۋ بولماق. بۇل ورتالىق جاڭا جاتتىقتىرۋشىلاردى، تورەشىلەردى جانە سالا ماماندارىن وقىتۋمەن اينالىسادى. قازىرگى ۋاقىتتا رەسپۋبليكانىڭ رەسمي تىزىلىمىندە 1207 سپورتشى مەن 95 ديپلوم العان جاتتىقتىرۋشى تىركەلگەن، ال مەكتەپ جوبالارى ارقىلى بۇل كورسەتكىشتەردى جۇيەلى تۇردە ارتتىرۋ جوسپارلانىپ وتىر.

ەسكە سالايىق، قازاقستان ازيا پارا ويىندارىندا ساداق اتۋدان العاش رەت كۇمىس مەدال ەنشىلەدى.