ەلدە جول ساپاسىنا قويىلاتىن تالاپتار وزگەرەدى

پرەزيدەنت قاسىم-جومارت توقايەۆ جول قۇرىلىسىنىڭ ساپاسىن باعالاۋ جۇيەسىن قايتا قاراۋ جانە قۇرىلىس جۇمىستارىنىڭ بارلىق كەزەڭىندە باقىلاۋدى كۇشەيتۋ قاجەتتىگىن اتاپ ءوتتى.

مەملەكەت باسشىسى ۇلتتىق جول اكتيۆتەرى ساپاسىنىڭ ورتالىعىنىڭ جۇمىسىن دا كۇشەيتۋدى تاپسىردى.

- جول ينفراقۇرىلىمىنىڭ ساپاسى جەكەلەگەن نىسانداردى تەكسەرۋمەن عانا شەكتەلمەيدى. جولدى جوبالاۋ، سالۋ، جوندەۋ جانە پايدالانۋ كەزەڭدەرىنىڭ بارلىعىندا ساپانى باعالاۋدىڭ ناقتى ءارى ءبىرىزدى تاسىلدەرى قاجەت، - دەيدى جول اكتيۆتەرى ساپاسىنىڭ ۇلتتىق ورتالىعى.

ورتالىق ماماندارى جول-قۇرىلىس ماتەريالدارىنىڭ ساپاسىن زەرتحانالىق سىناقتار ارقىلى باعالايدى، ورىندالعان جۇمىستاردىڭ بەلگىلەنگەن تالاپتارعا سايكەستىگىن تەكسەرەدى، تەحنولوگيالىق بۇزۋشىلىقتار مەن اقاۋلاردى انىقتايدى.

2026 -جىلدىڭ باسىنان بەرى جەرگىلىكتى جولداردا 15 مىڭنان استام جول-قۇرىلىس ماتەريالىنىڭ سىناماسى زەرتتەلدى. زەرتحانالىق زەرتتەۋلەر ناتيجەسىندە ولاردىڭ 32 پايىزى بەلگىلەنگەن تالاپتارعا سايكەس كەلمەگەن. سونىمەن قاتار جىل باسىنان بەرى جەرگىلىكتى جولداردا 1997 تەحنولوگيالىق بۇزۋشىلىق پەن اقاۋ انىقتالعان: ونىڭ 214 ى جويىلىپ، 1783 ى ءالى جويىلعان جوق.

بۇل كورسەتكىشتەر جول ساپاسىن باقىلاۋدىڭ ماڭىزىن عانا ەمەس، انىقتالعان سايكەسسىزدىكتەردى ۋاقتىلى جويۋدىڭ جانە ساپانى باعالاۋدا ناقتى ءارى ءبىرىزدى تالاپتاردىڭ بولۋىنىڭ قاجەتتىگىن كورسەتەدى.

- وسى تۇرعىدان العاندا، نورماتيۆتىك بازانى جەتىلدىرۋ جول سالاسىنداعى جۇيەلى وزگەرىستەردىڭ ماڭىزدى بولىگى سانالادى. JOLSAPA ءوز كەزەگىندە نورماتيۆتىك تالاپتاردى ازىرلەۋشى ورگان رەتىندە ەمەس، جول ساپاسىن باقىلاۋ بارىسىندا ناقتى تاجىريبەدە كەزدەسەتىن ماسەلەلەردى انىقتاپ، سالاداعى تالاپتار مەن ساپانى باعالاۋ تاسىلدەرىن جەتىلدىرۋ قاجەتتىگىن كورسەتەتىن كاسىبي بۋىن رەتىندە جۇمىس ىستەيدى، - دەلىنگەن رەسمي حابارلامادا.

وسى ماسەلە جاقىندا وتكەن «ساپالى جولدار: جوسپارلاۋدان پايدالانۋعا دەيىن» سەمينار- كەڭەسىندە دە تالقىلاندى. ءۇش كۇندىك ءىس-شارا بارىسىندا جولداردى جوسپارلاۋ، دياگنوستيكالاۋ، جوندەۋ جانە جوبالاۋ ماسەلەلەرىمەن قاتار، جول سالاسىندا قولدانىلاتىن نورماتيۆتىك تالاپتارعا دا ەرەكشە نازار اۋدارىلدى.

تالقىلاۋ كەزىندە قولدانىستاعى نورماتيۆتىك قۇجاتتارداعى تالاپتاردىڭ ءوزارا الشاقتىعى كوتەرىلىپ، ولاردى كەشەندى تۇردە قايتا قاراۋ قاجەتتىگى ايتىلدى. مۇنداي جۇمىس جول جۇمىستارىن جانە قولدانىلاتىن ماتەريالداردىڭ ساپاسىن باعالاۋدا ءبىرىڭعاي ءتاسىل قالىپتاستىرۋعا مۇمكىندىك بەرەدى.

ەسكە سالا كەتسەك، استانا-تەمىرتاۋ جولىنىڭ 16 شاقىرىمى جاڭارتىلدى: 9 كىرمە جول جاسالدى.

راحمان قاينارىنا اپاراتىن جول ەكى ساعاتقا قىسقاردى.