ەل بويىنشا ۇلتتىق دومبىرا كۇنىنە وراي 200 دەن استام ءىس-شارا ءوتتى

استانا. KAZINFORM - مەرەكە كۇندەرى قازاقستاننىڭ ءار وڭىرىندە ۇلتتىق دومبىرا كۇنىنە ارنالعان ءتۇرلى مادەني ءىس-شارالار ءوتتى.

ق ر مادەنيەت جانە اقپارات مينيسترلىگى باسپا ءسوز قىزمەتىنىڭ حابارلاۋىنشا، جىل سايىن ۇلتتىق اسپاپقا دەگەن قىزىعۋشىلىق ارتىپ كەلەدى.

ماسەلەن، اقمولا وبلىسىندا «دومبىرا، جۇرەگىممەن ۇندەس ەدىڭ...» اتتى مەرەكەلىك كونسەرت ءوتتى.

وڭتۇستىك استانانىڭ قوناقتارى مەن تۇرعىندارى «دومبىرا - اسىل قازىنا» كوشپەلى كورمەسىن تاماشالادى. كورمەدە اباي قۇنانبايەۆ، دينا نۇرپەيىسوۆا، جامبىل جابايەۆ، ماحامبەت وتەمىس ۇلى جانە ت. ب. كورنەكتى تۇلعالار دومبىراسىنىڭ كوشىرمەلەرى ۇسىنىلدى.

جامبىل وبلىسىندا «ناعىز قازاق قازاق ەمەس ناعىز قازاق - دومبىرا» اتتى مادەني ءىس-شارالار مەن مەرەكەلىك كونسەرتتەر ءوتتى.

قازاقستاننىڭ شىعىسىندا «ءانشى قالا» بايقاۋى باستالىپ، تاقىرىپتىق جارمەڭكەلەر ۇيىمداستىرىلدى.

ماڭعىستاۋ وبلىسىندا «كۇمبىرلە، قوڭىر دومبىرا» گالا-كونسەرت ءوتتى، سونداي-اق مادەنيەت قايراتكەرلەر قاتىسقان دوڭگەلەك ۇستەل ءوتتى.

قوستاناي وبلىسىندا دا «كۇمبىرلە، قوڭىر دومبىرا» ءىس-شاراسى ءوتتى. سونداي-اق، وبلىس دومبىراشىلارى اراسىندا مۋزىكالىق بايقاۋ ۇيىمداستىرىلدى.

اقتوبە وبلىسىندا وسكەلەڭ ۇرپاققا «دومبىرا - بابالاردان جەتكەن مۇرا» اتتى تانىمدىق ءىس-شارا وتكىزىلدى.

«قازاعىمنىڭ دومبىراسى كۇي تارتسا» ءىس-شاراسى اياسىندا شىمكەنت جاستارى ۇلتتىق مۋزىكالىق اسپاپتىڭ تاريحىمەن تانىستى.