ەل باسشىسى حوت-دوگ جەۋگە تىيىم سالىپ، اجىراسقانداردى تۇرمەگە جابۋعا بۇيرىق بەردى

استانا. قازاقپارات - ول 2011 -جىلدان بەرى سولتۇستىك كورەياعا كوپتەگەن ەرەكشە زاڭ ەنگىزگەن.

بۇل جولى ول ەلدە حوت-دوگ جەۋگە تۇبەگەيلى تىيىم سالىپ، اجىراسقانداردى تۇرمەگە جىبەرۋگە بۇيرىق بەردى، دەپ جازادى inbusiness.kz سايتى Dailymail.co.uk پورتالىنا سىلتەمە جاساپ.

40 جاستاعى ديكتاتوردىڭ پىكىرىنشە، بۇل - باتىستىق فاست-فۋد تاعامى. ال ونى دايىنداۋ مەن ساتۋ - مەملەكەتكە جاسالعان وپاسىزدىق.

الداعى ۋاقىتتا سولتۇستىك كورەيادا حوت-دوگ ساتقاندار مەن امەريكالىق تاعام جاساعاندار ەڭبەك لاگەرىنە جىبەرىلۋى ىقتيمال. The Sun باسىلىمىنا سۇحبات بەرگەن ساتۋشى مۇنداي تاعامداردىڭ ساتىلىمى توقتاعانىن ايتقان.

بۋداە-چيگە دەپ اتالاتىن كورەي جانە امەريكالىق اسحانالاردىڭ ۇيلەسىمىنەن ازىرلەنەتىن سورپا، كورەي بۇرىشى قوسىلعان پاستا، كيمچي، امەريكالىق شۇجىقتار مەن بۇرشاق قوسىلعان اشى تاعام 2017 -جىلى وڭتۇستىك كورەيادان اكەلىنگەن. سولتۇستىك كورەيا پوليتسياسى مەن نارىق باسشىلىعى بۇل تاعامدى ساتقان جانە دايىنداعان ادامداردى قاماۋعا الۋ تۋرالى ەسكەرتۋ جاساعان.

سونداي-اق، سولتۇستىك كورەيا پرەزيدەنتى كيم چەن ىن اجىراسقان جۇپتاردى ەڭبەك لاگەرىنە جىبەرۋدى بۇيىرىپ وتىر. ءتىپتى، اجىراسۋ كەزىندە ايەلدەرگە ەرلەرگە قاراعاندا ۇزاق مەرزىمگە قامالۋ قاۋپى ءتونىپ تۇر. بۇعان ەسكى زاڭداردىڭ كۇشەيۋى اسەر ەتكەن. سەبەبى، ەلدە تۇرمىستىق زورلىق-زومبىلىق جاعدايلارىندا دا تەك اجىراسۋدى تالاپ ەتكەن تاراپ قۋدالاناتىن ەدى.

RFA دەرەگىنشە، جاڭا ەرەجەدە اجىراسۋدان سوڭ ەرلى-زايىپتىلاردىڭ ەكەۋى دە تۇرمەگە قامالادى. ريانگان پروۆينسياسىنىڭ تۇرعىنى بيىلعى زاڭدا تالاپتار وزگەرگەنىن ايتادى.

- مەن كيمچونسۋك اۋدانىنىڭ حالىق سوتىنا جۇگىندىم. وندا 12 ادامعا اجىراسۋ تۋرالى شەشىم شىعارىلدى. سوت ۇكىمى شىققاننان كەيىن ولاردى بىردەن اۋداندىق ەڭبەك دايارلاۋ لاگەرىنە جىبەردى. وتكەن جىلى جۇپ اجىراسسا، ەڭبەك لاگەرىنە تەك ءبىرىنشى بولىپ اجىراسۋعا ارىز بەرگەن ادام عانا جىبەرىلەتىن، - دەدى تۇرعىن.

ەسكە سالايىق، ەلدە اجىراسۋ دەڭگەيى COVID-19 پاندەمياسىنداعى شەكتەۋلەردەن سوڭ، ياعني قارجىلىق قيىندىقتارعا بايلانىستى ارتقان بولاتىن.