ايدا بالايەۆا ل گ ب ت-عا قارسى پەتيتسيا تۋرالى قانداي شەشىم قابىلدانعانىن ايتتى

استانا. KAZINFORM - مادەنيەت جانە اقپارات ءمينيسترى ايدا بالايەۆا ل گ ب ت-نى اشىق جانە جاسىرىن تۇردە ناسيحاتتاۋعا تولىق تىيىم سالۋ تۋرالى پەتيتسياعا قاتىستى قازاقستاندىقتارعا ۇندەۋ جولدادى. پەتيتسيا بيىل 10-ماۋسىمدا جازىلعان.

«بۇل ماسەلە قوعامدا ۇلكەن رەزونانس تۋدىرىپ، قىزۋ پىكىرتالاسقا جالعاستى. ويتكەنى، قازىر مەملەكەت تاراپىنان ادام قۇقىقتارىنا كوپ كوڭىل ءبولىنىپ وتىر. سونداي-اق، قازاقستاندىقتار قوعامدىق ماڭىزدى تاقىرىپتاردى تالقىلاۋعا جانە مەملەكەتتىك ساياساتتى قالىپتاستىرۋعا بەلسەندى اتسالىسىپ جاتىر. قازاقستاندا پرەزيدەنتتىك رەفورمالار اياسىندا دەموكراتيالىق دامۋ، ادام قۇقىقتارىن قورعاۋ جانە زاڭ ۇستەمدىگىن نىعايتۋ ءۇشىن بارلىق قاجەتتى زاڭنامالىق جاعداي جاسالعان. سونىڭ ءبىرى - پەتيتسيا ينستيتۋتى. كونستيتۋتسيا نورمالارىنا جانە حالىقارالىق مىندەتتەمەلەرگە سايكەس قازاقستان كەمسىتۋگە قارسى ساياساتتى جۇزەگە اسىرادى. ول ساياسات نەگىزىندە قوعامدىق- كونستيتۋتسيالىق كەپىلدىك، جانجال تۋدىرماۋ جانە تولەرانتتىلىق ساقتاۋدى قامتاماسىز ەتۋ مىندەتتەلگەن»، - دەپ ۇندەۋ جاسادى ايدا بالايەۆا Facebook پاراقشاسىندا.

ءمينيستردىڭ ايتۋىنشا، ل گ ب ت-ى اشىق جانە جاسىرىن تۇردە ناسيحاتتاۋعا تولىق تىيىم سالۋ تۋرالى پەتيتسياعا قاتىستى قوعام پىكىرى ەكىگە بولىنگەن.

«جۇمىس توبىنا قوعامنىڭ ءتۇرلى توبى اراسىنان 45 ادام كىردى. اتاپ ايتقاندا، قۇزىرلى مەملەكەتتىك ورگان وكىلدەرى، پارلامەنت دەپۋتاتتارى، قوعامدىق بىرلەستىكتەر وكىلدەرى مەن ساراپشىلار جانە مۇددەلى تاراپتار قاتىستى. وسىلايشا قوعامدىق كوپ بولىگى ماسەلەنى تالقىلاۋعا بەلسەندى اتسالىستى. جۇمىس توبىنىڭ ەكى وتىرىسى جانە اۋقىمدى ساراپتامالىق تالقىلاۋلار وتكىزۋ كەزىندە ءوتىنىش بويىنشا كەلىپ تۇسكەن ەسكەرتۋلەر تالدانىپ، جۇيەلى جۇمىس جۇرگىزىلدى. ۇلتتىق جانە حالىقارالىق نورماتيۆتىك-قۇقىقتىق اكتىلەرگە سالىستىرمالى تالداۋ جاسالدى. پەتيتسيادا كوتەرىلگەن ماسەلەلەردى رەتتەۋدە حالىقارالىق تاجىريبە زەردەلەندى. جەتەكشى ۇلتتىق عىلىمي زەرتتەۋ ۇيىمدارىمەن جانە ساراپشىلارمەن كەڭەس وتكىزىلدى. پەتيتسيا تاقىرىبى بويىنشا حالىقارالىق جانە قازاقستاندىق ۇكىمەتتىك ەمەس ۇيىمداردىڭ ۇسىنعان پىكىرلەرى، ۇسىنىستار مەن دالەلدەرى، زەرتتەۋ ماتەريالدارى مەن ۇندەۋلەردىڭ بارلىعى نازارعا الىندى»، - دەيدى ول.

سونداي-اق، ۆەدومستۆو باسشىسى جوعارىدا اتقارىلعان جۇمىستاردىڭ پەتيتسيا بويىنشا تۇپكىلىكتى شەشىم قابىلداۋعا جەتكىلىكسىز ەكەندىگىن ايتتى.

«دەگەنمەن، بۇل جۇمىس پەتيتسيا بويىنشا تۇپكىلىكتى شەشىم قابىلداۋعا جەتكىلىكسىز. زەرتتەۋلەر مەن تالقىلاۋلار قازىرگى ۋاقىتتا بۇل باعىتتاعى اۋقىمدى جۇمىستاردى جالعاستىرىپ، ماسەلەنى جان- جاقتى زەردەلەپ، ونى رەتتەۋدىڭ ناقتى تەتىكتەرىن ازىرلەۋ كەرەكتىگىن كورسەتتى. بۇل ۋاقىتتى قاجەت ەتەدى. دەگەنمەن، مادەنيەت جانە اقپارات مينيسترلىگىنىڭ ۇستانىمى كامەلەتكە تولماعانداردىڭ قۇقىعىن قورعاۋ جانە قاۋىپسىزدىگىن قامتاماسىز ەتۋ تۇرعىسىنان، بالالارعا جىنىستىق قول سۇعۋعا قارسى قىلمىستاردىڭ ءوسۋى اياسىندا جاسوسپىرىمدەر مەن بالالاردى جىنىستىق قاتىناستاردى وتباسىنىڭ ىشىندە ءداستۇرلى ەمەس قاتىناستاردى ناسيحاتتاۋ مەن كۋلت جاساۋدان قورعاۋ تالابى وزەكتى ءارى قاجەت. بالالارىمىزدىڭ اقپاراتتىق قاۋىپسىز ورتادا ءوسىپ، دامۋى اسا ماڭىزدى. ءبىزدىڭ ۇرپاق الدىنداعى پارىزىمىز ولارعا دۇرىس رۋحاني، ادامگەرشىلىك باعىت-باعدار بەرىپ، ءداستۇرلى وتباسىلىق قۇندىلىقتاردى بويىنا ءسىڭىرۋ. سونداي-اق، ۇلتتىق مادەني مۇرانى ۇستانۋعا، گەنەتيكالىق كودتى ساقتاۋعا جاعداي جاساۋ وتە وزەكتى»، - دەيدى ا. بالايەۆا.

اۆتور

داۋلەت ىزتىلەۋ