ەلدە استىق رەكوردتىق دەڭگەيگە جەتتى: 24 ميلليون توننا ءونىم كۇتىلەدى

بيىل ەلىمىزدە 24 ميلليون تونناعا جۋىق ءداندى جانە بۇرشاق داقىلدارى جينالادى دەپ كۇتىلسە، وتاندىق ناۋبايحانالار سەگىز ايدا 325,5 مىڭ توننا نان ءوندىردى. بۇل تۋرالى ا ش م ءمالىم ەتتى.

16-قازان - دۇنيەجۇزىلىك نان كۇنى. نان - داستارقاننىڭ بەرەكەسى، ەڭبەكتىڭ وتەۋى، ىرىس پەن مولشىلىقتىڭ سيمۆولى. بۇل كۇن ادامزات ءۇشىن ايرىقشا ماڭىزى بار ازىق-تۇلىك ءونىمىنىڭ قادىرىن ۇعىندىرىپ قانا قويماي، ءداندى القاپتان باستاپ دايىن ونىمگە دەيىنگى ۇدەرىستە ماڭداي تەرىن توگەتىن ەڭبەك ادامدارىنىڭ ەڭبەگىن دارىپتەيدى. ال استىقتى القابى مەن ەگىنشىلىك ءداستۇرى قالىپتاسقان قازاقستان ءۇشىن نان ءوندىرىسى - اگروونەركاسىپتىك كەشەننىڭ ماڭىزدى باعىتتارىنىڭ ءبىرى.

- قازاقستاننىڭ استىق الەۋەتى جىل ساناپ ارتىپ كەلەدى. بيىل ەلىمىزدە ءداندى جانە بۇرشاق داقىلدارىنىڭ جالپى ءتۇسىمى شامامەن 24 ميلليون تونناعا جەتەدى دەپ كۇتىلۋدە. بۇل - سوڭعى 15 جىلداعى ەڭ جوعارى كورسەتكىشتەردىڭ ءبىرى ءارى كەيىنگى ەكى رەكوردتىق ماۋسىمدى ەسەپكە الماعاندا، وسى كەزەڭدەگى ەڭ مول ءونىم،- دەلىنگەن حابارلامادا.

استىق ءوندىرىسىنىڭ ارتۋى ەكسپورتتىق مۇمكىندىكتەردى دە كەڭەيتىپ وتىر. 2025- 2026 ماركەتينگتىك ماۋسىمدا قازاقستان شامامەن 16 ميلليون توننا استىق پەن ۇندى استىق بالاماسىندا ەكسپورتتادى. وتاندىق استىققا وزبەكستان، تاجىكستان، ازەربايجان، اۋعانستان، قىتاي جانە ەۋروپالىق وداق ەلدەرىندە سۇرانىس بار.

مول استىق - وتاندىق وڭدەۋ ونەركاسىبىنىڭ دە بەرىك نەگىزى. قازاقستاندا ۇن ءوندىرۋ كولەمى ىشكى قاجەتتىلىكتەن ەكى ەسە جوعارى. بۇل ەلىمىزدەگى نان ءپىسىرۋ كاسىپورىندارىن وتاندىق شيكىزاتپەن تۇراقتى قامتاماسىز ەتۋگە جانە استىقتى تەرەڭ وڭدەۋ سالاسىن دامىتۋعا مۇمكىندىك بەرەدى.

2026 -جىلدىڭ قاڭتار-تامىز ايلارىندا ەلىمىزدە 325,5 مىڭ توننا نان ءوندىرىلدى. ال جۇمىس ىستەپ تۇرعان نان ءپىسىرۋ كاسىپورىندارىنىڭ جالپى وندىرىستىك قۋاتى 502 مىڭ توننانى قۇرايدى.

كاسىپورىندار تۇتىنۋشىلار سۇرانىسىنا ساي ءونىم تۇرلەرىن كوبەيتىپ، كۇندەلىكتى تۇتىنۋعا ارنالعان نان-توقاش ونىمدەرىمەن قاتار، ۇزاق ساقتالاتىن ونىمدەر مەن ۇننان جاسالاتىن كونديتەرلىك تاعامدار ءوندىرىسىن دە دامىتىپ كەلەدى.

وڭدەۋ ونەركاسىبىنىڭ الەۋەتىن ارتتىرۋ ءۇشىن مەملەكەت تاراپىنان ءبىرقاتار قولداۋ شارالارى قاراستىرىلعان. اتاپ ايتقاندا، قازاقستان رەسپۋبليكاسىنىڭ اگروونەركاسىپتىك كەشەنىن دامىتۋدىڭ 2021-2030-جىلدارعا ارنالعان تۇجىرىمداماسى اياسىندا جىلىنا كەمىندە 2 مىڭ توننا نان-توقاش جانە/نەمەسە كونديتەرلىك ءونىم وندىرەتىن كاسىپورىنداردىڭ ينۆەستيتسيالىق شىعىندارىنىڭ 25 پايىزى وتەلەدى.

بۇدان بولەك، ۇن وندىرۋشىلەرگە سالىقتىق قولداۋ كورسەتىلەدى. قازاقستان رەسپۋبليكاسى سالىق كودەكسىنىڭ 490-بابىنا سايكەس، بۇل سالادا قوسىلعان قۇن سالىعى بويىنشا 80 پايىزدىق تومەندەتۋ قاراستىرىلعان.

دۇنيەجۇزىلىك نان كۇنى 2006-جىلى حالىقارالىق ناۋبايشىلار مەن كونديتەرلەر وداعىنىڭ باستاماسىمەن بەلگىلەنگەن. اتاۋلى كۇننىڭ 16-قازانعا سايكەس كەلۋى دە تەگىن ەمەس: ءدال وسى كۇنى، 1945-جىلى، بىرىككەن ۇلتتار ۇيىمىنىڭ ازىق- تۇلىك جانە اۋىل شارۋاشىلىعى ۇيىمى (ف ا و) قۇرىلعان.

بۇگىندە بۇل ۇيىم اۋىل شارۋاشىلىعىن دامىتۋ، حالىقتىڭ قۇنارلى تاعامعا قولجەتىمدىلىگىن ارتتىرۋ جانە جاھاندىق ازىق-تۇلىك قاۋىپسىزدىگىن قامتاماسىز ەتۋ باعىتىندا جۇمىس ىستەيدى.

ناننىڭ داستارقانعا كەلۋى - ديقاننىڭ ماڭداي تەرىنەن، ديىرمەنشىنىڭ ەڭبەگىنەن، ناۋبايشىنىڭ شەبەرلىگىنەن باستالاتىن ۇلكەن ۇدەرىس. سوندىقتان دۇنيەجۇزىلىك نان كۇنى - ەل ىرىسىن ەسەلەپ جۇرگەن بارشا ەڭبەك ادامىنا قۇرمەت بىلدىرەتىن ەرەكشە كۇن.

وتاندىق استىق ءوندىرىسىن دامىتۋ، ونى تەرەڭ وڭدەۋ، كاسىپورىنداردىڭ الەۋەتىن ارتتىرۋ جانە ەڭبەك ادامدارىنىڭ ەڭبەگىن باعالاۋ - ەلدىڭ ازىق تۇلىك قاۋىپسىزدىگىن نىعايتۋدىڭ ماڭىزدى كەپىلى.