كۇزگى كانيكۋلدا وقۋشىلار نەشە كۇن دەمالادى؟

 قازاقستاندىق مەكتەپتەردە ءبىرىنشى توقسان اياقتالۋدا. كۇزگى دەمالىس 2023 -جىلدىڭ 30-قازانى مەن 5-قاراشاسىن قوسا العاندا جەتى كۇنگە سوزىلادى، دەپ حابارلايدى ق ر وقۋ-اعارتۋ مينيسترلىگىنىڭ باسپا ءسوز قىزمەتى. 

وقۋ-اعارتۋ مينيسترلىگى مەكتەپ وقۋشىلارىنىڭ كۇزگى دەمالىستاعى بوس ۋاقىتىن ءتيىمدى وتكىزۋ جانە جەكە تۇلعالىق قاسيەتتەرىن دامىتۋ ماقساتىندا ءبىرتۇتاس تاربيە باعدارلاماسى اياسىندا ءىس- شارالار جوسپارىن ۇسىنۋدا.

ءىس-شارالار جوسپارىنا:

- جوعارى سىنىپ وقۋشىلارىمەن جانە ولاردىڭ اتا-انالارىمەن بىرلەسىپ عىلىمي جوبا جۇمىستارىنىڭ مازمۇنى بويىنشا اقپاراتتىق- تانىمدىق ساباقتار، ج و و-نىڭ وقىتۋشىلارىمەن كەزدەسۋلەر ۇيىمداستىرۋ، عىلىمي جوبالار تۋرالى سۇحباتتار وتكىزۋ؛

- «بالالار كىتاپحاناسى» جوباسىن ىسكە اسىرۋ اياسىندا وقىرماندارمەن كەزدەسۋ ۇيىمداستىرۋ جانە وقىلعان ادەبيەتتەردى تالقىلاۋ؛

- «وتباسىلىق داستۇرلەر» تاقىرىبىندا اتا-انالار جينالىسىن وتكىزۋ، «پەداگوگ- بالا- اتا- انا» بىرلەسۋىمەن وتباسىلىق داستۇرلەر تۋرالى اڭگىمە جۇرگىزۋ؛

- قوجا احمەت ياسساۋيدىڭ تۋعانىنا 930 جىل تولۋىنا وراي «قوجا احمەت ياسساۋي مۇرالارىن وقۋ» تاقىرىبىندا وقۋشىلار اراسىندا ەسسە مەن جوبالىق جۇمىستار جازۋ؛

- وقۋشىلار اراسىندا «ونەگەلى ءومىر» تاقىرىبىندا ەسسە جازۋدان بايقاۋ وتكىزۋ، بالالاردىڭ ۇزدىك جۇمىستارىن اتاپ ءوتۋ؛

- وقۋشىلارمەن جانە ولاردىڭ اتا-انالارىمەن بىرلەسىپ «دەنساۋلىق ساقتاۋدىڭ 6 شارتى - تازا اۋا، دۇرىس تاماقتانۋ، قوزعالىس، تىنىش ۇيقى، جاقسى كوڭىل- كۇي، كۇيزەلىسكە تۇسپەۋ» تاقىرىبىندا سالاۋاتتى ءومىر سالتىن قالىپتاستىرۋ بويىنشا ءىس- شارالار وتكىزۋ؛

- «اكەگە ىزەت، اناعا قۇرمەت» تاقىرىبىندا «جاس اقىندار ايتىسى» بايقاۋىن ۇيىمداستىرۋ، جەڭىمپازدارىن ماراپاتتاۋ ەنگىزىلدى.

ايتا كەتەيىك، بۇل ءىس-شارالار ءبىلىم بەرۋ ۇيىمدارىنا ادىستەمەلىك ۇسىنىم رەتىندە جىبەرىلەدى.