كۇزدە يممۋنيتەتتى قالاي نىعايتۋعا بولادى

بۇل كەزەڭدە يممۋندىق جۇيەنى قولداۋ ءۇشىن قىمبات دارۋمەندەر مەن ارنايى قوسپالارعا جۇگىرمەي-اق، كۇندەلىكتى ادەتتەردى رەتتەۋگە بولادى. مامانداردىڭ ايتۋىنشا، يممۋنيتەتتى بىردەن كۇشەيتەتىن تاڭعاجايىپ ءونىم جوق. ول ءۇشىن دۇرىس تاماقتانۋ، ۋاقىتىلى ۇيقى، تۇراقتى قوزعالىس كەرەك. ال تۇماۋ سياقتى ينفەكتسيالاردان قورعانۋ ءۇشىن ۆاكتسيناتسيانىڭ دا ماڭىزى زور.

1. اس مازىرىنە ءارتۇرلى تاعام قوسىڭىز

يممۋندىق جۇيەنىڭ قالىپتى جۇمىس ىستەۋى ءۇشىن اعزاعا اقۋىز، دارۋمەندەر مەن مينەرالدار قاجەت. سوندىقتان كۇندەلىكتى اس مازىرىندە كوكونىس پەن جەمىس- جيدەك، بۇرشاق تۇقىمداستار، جۇمىرتقا، بالىق، ەت، ءسۇت ونىمدەرى جانە تۇتاس ءداندى داقىلدار بولعانى ءجون.

مىسالى، كۇزدە ءسابىز، اسقاباق، قىرىققابات، قىزىلشا، الما سياقتى ماۋسىمدىق ونىمدەردى پايدالانۋعا بولادى. ءبىراق ءبىر عانا تاعام يممۋنيتەتتى كۇشەيتىپ، ينفەكتسيادان تولىق قورعاي المايدى. الماتىداعى №36 قالالىق ەمحانانىڭ يممۋنولوگ دارىگەرى اسەل ەرالى قىزى يممۋندىق جۇيەنى قولداۋ ءۇشىن تەڭگەرىمدى تاماقتانۋ، تۇراقتى دەنە بەلسەندىلىگى مەن جەتكىلىكتى دەمالىس ماڭىزدى ەكەنىن ايتادى.

2. ۇيقى رەجيمىن رەتتەڭىز

ۇيقىنىڭ جەتىسپەۋى يممۋندىق جۇيەنىڭ جۇمىسىنا كەرى اسەر ەتۋى مۇمكىن. ا ق ش اۋرۋلاردى باقىلاۋ جانە الدىن الۋ ورتالىعىنىڭ (CDC) مالىمەتىنشە، ەرەسەكتەردىڭ كوپشىلىگىنە تۇندە كەمىندە جەتى ساعات ۇيىقتاۋ قاجەت. ۇيقى ساپاسىن جاقسارتۋ ءۇشىن كۇن سايىن ءبىر ۋاقىتتا جاتىپ، ءبىر ۋاقىتتا تۇرۋعا تىرىسىڭىز. ۇيىقتار الدىندا تەلەفوندى ۇزاق پايدالانۋدى ازايتىپ، بولمەنى جەلدەتىپ، تىنىش ورتا قالىپتاستىرعان پايدالى.

3. كۇن سايىن قوزعالىستا بولىڭىز

جاياۋ ءجۇرۋ، ۆەلوسيپەد تەبۋ، ءجۇزۋ نەمەسە ۇيدە جەڭىل جاتتىعۋ جاساۋ جالپى دەنساۋلىقتى قولدايدى. يممۋنولوگ اسەل ەرالى قىزىنىڭ ايتۋىنشا، تۇراقتى دەنە بەلسەندىلىگى يممۋندىق جۇيەنىڭ قالىپتى جۇمىسىنا ىقپال ەتەدى. ال ساراپشىلار ەرەسەكتەرگە اپتاسىنا كەمىندە 150 مينۋت ورتاشا قارقىندى دەنە بەلسەندىلىگىن جانە ەكى كۇن بۇلشىقەتتى نىعايتاتىن جاتتىعۋلاردى ۇسىنادى. مۇنى بىردەن باستاۋ مىندەتتى ەمەس، كۇندەلىكتى سەرۋەن ۋاقىتىن بىرتىندەپ كوبەيتۋگە بولادى.

4. دارۋمەندەردى ءوز بەتىڭىزشە قابىلداماڭىز

سۋىق تۇسكەندە C دارۋمەنى، D دارۋمەنى نەمەسە مىرىش قوسپالارىن ءىشۋ كەرەك دەگەن پىكىر ءجيى ايتىلادى. الايدا قورەكتىك زاتتاردىڭ تاپشىلىعى بولماسا، قوسپالاردى قابىلداۋ يممۋنيتەتتى مىندەتتى تۇردە كۇشەيتەدى دەگەن سەنىمدى دالەل جوق. كەيبىر دارۋمەندەر مەن مينەرالداردى شامادان تىس قابىلداۋ دەنساۋلىققا زيان كەلتىرۋى مۇمكىن.

ەگەر السىزدىك ءجيى مازالاسا، تاماقتانۋ شەكتەۋلى بولسا نەمەسە بەلگىلى ءبىر دارۋمەن جەتىسپەيدى دەپ كۇماندانساڭىز، دارىگەرمەن كەڭەسكەن دۇرىس. قاجەت بولعان جاعدايدا مامان تەكسەرۋ تاعايىنداپ، قوسپانىڭ ءتۇرى مەن مولشەرىن انىقتايدى.

5. قول گيگيەناسىن ساقتاپ، بولمەنى جەلدەتىڭىز

يممۋنيتەتتى قولداۋمەن قاتار، ينفەكتسيا جۇقتىرۋ قاۋپىن دە ازايتۋ ماڭىزدى. قولدى سابىنمەن جۋۋ، جوتەلگەندە نەمەسە تۇشكىرگەندە اۋىز-مۇرىندى جابۋ، بولمەنى جۇيەلى جەلدەتۋ جانە ناۋقاس ادامدارمەن جاقىن قاتىناستى شەكتەۋ كومەكتەسەدى. ادام كوپ جينالاتىن نەمەسە جەلدەتۋى ناشار ورىنداردا جاعدايعا قاراي بەتپەردە قولدانۋعا بولادى.

6. تۇماۋعا قارسى ەكپە تۋرالى دارىگەرمەن سويلەسىڭىز

دۇرىس تاماقتانۋ مەن جەتكىلىكتى ۇيقى اعزانىڭ قالىپتى جۇمىس ىستەۋىنە كومەكتەسەدى. ال ۆاكتسينا اعزاعا ناقتى ينفەكتسياعا قارسى قورعانىس قالىپتاستىرۋعا كومەكتەسەدى. قازاقستاندىق دارىگەرلەر دە تۇماۋدىڭ الدىن الۋ ءۇشىن ۆاكتسينا سالدىرۋدىڭ ماڭىزىن اتاپ وتەدى. ەكپە الۋ قاجەتتىگىن ادامنىڭ جاسى مەن دەنساۋلىق جاعدايىنا قاراي دارىگەرمەن اقىلداسىپ شەشكەن ءجون.

ازامات سەرىكحان

kursiv.media