كۇزگە قاراي ينفلياتسيا بولا ما

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ بازالىق مولشەرلەمەنى ايقىنداۋ ماسەلەسىنە ارنالعان كەزەكتى باسپا ءسوز ءماسليحاتىندا كۇزگە قاراي قازاقستاندا ينفلياتسيا بولۋى مۇمكىن دەگەنگە ساياتىن بولجامدارعا جاۋاپ بەردى.

- ۇلتتىق بانك ۆاليۋتا باعامى بويىنشا بولجامدى ۇسىنبايدى. قارجى نارىعى مەن اقشا-نەسيە ساياساتىن رەتتەۋشى بولعاندىقتان ونداي سانداردى ايتا المايمىز. ديەۆالۆاتسيانىڭ ىقتيمالدىعىنا كەلسەك، وكىنىشكە قاراي، سەرپىندى ديەۆالۆاتسيالار جيناقتالىپ كەلىپ، ءبىر كۇنى ۆاليۋتا باعامىن وزگەرتىپ جىبەرەدى دەگەن تۇسىنىك قالىپتاسقان. ارينە، ولاي بولۋى مۇمكىن ەمەس. ويتكەنى ينفلياتسيانى ەركىن باعام اعىسىمەن تارگەتتەپ وتىرمىز. ءبىز بۇعان دەيىن دە باعامنىڭ قالاي قوزعالعانىن، ءبىراق سەرپىنمەن ءوسىپ كەتكەنىن كورگەن جوقپىز. ياعني، ۆاليۋتانىڭ تەڭگەگە شاققانداعى باعامى سىرتقى جانە ىشكى فاكتورلاردىڭ قىسىمىمەن ارتۋى دا مۇمكىن، السىرەۋى دە مۇمكىن، - دەدى ول جۋرناليست سۇراعىنا جاۋاپ بەرە وتىرىپ.

تيمۋر سۇلەيمەنوۆ ەلدەگى ديەۆالۆاتسيانىڭ ىقتيمالدىعىنا ەكسپورت مۇمكىندىكتەرىنەن بولەك يمپورتتىڭ كولەمى دە اسەر ەتەتىنىن ەسكە سالدى.

- ارينە، ءبىز ءۇشىن ۆاليۋتا باعامىنداعى نەگىزگى فاكتور مۇناي باعاسى ەكەنىن ايقىن. ەگەر مۇناي باعاسى ۇزاق ۋاقىت بويى تومەن كۇيىندە تۇرسا، قازاقستاننىڭ ەكسپورت مۇمكىندىكتەرىنە، تولەم بالانسىنا، ىشكى نارىقتاعى دوللاردىڭ كولەمىنە، اسەر ەتۋى مۇمكىن. ونىڭ ءبارى تەڭگەنىڭ باعامىنا اسەر ەتەدى. ال مۇناي مەن وزگە دە ەكسپورت تاۋارلارىنىڭ باعاسى بىزگە وڭتايلى دەڭگەيدە قالسا، سونىمەن بىرگە يمپورت كولەمى ازايسا، جاعداي الدەقايدا تۇراقتى بولاتىنى تۇسىنىكتى. سوندىقتان الەمدىك قارجى جانە ەنەرگەتيكا نارىعىندا نە بولاتىنىن ايتا الاتىن ءبىر دە ءبىر ەكونوميست جوق دەپ ويلايمىن. ويتكەنى بەلگىسىزدىك كوپ، - دەدى ۇلتتىق بانك ءتوراعاسى.

سونداي-اق، ول ۇلتتىق بانك پەن ۇلتتىق ەكونوميكا مينيسترلىگىنىڭ ساراپشىلارى الەمدەگى ەكونوميكالىق باسەكەنىڭ سالدارىن ەسەپتەپ جاتقانىن ايتتى.

- ا ق ش- تان كەلەتىن اقپاراتتاردى دا ەسەپكە الىپ وتىرمىز. ۇلتتىق ەكونوميكا مينيسترلىگىندەگى ارىپتەستەرىمىز بەن ءبىزدىڭ بولجاۋشىلار ەسەپتەپ جاتىر. بۇگىن تاڭعى ساعات 9.00 دە پرەمەر-مينيستر وسى ماسەلە بويىنشا ءماجىلىس وتكىزدى. ءبىز قانداي دا ءبىر بايبالام مەن دۇربەلەڭگە نەگىز بولاتىنداي ۇلكەن سەبەپ كورىپ وتىرعان جوقپىز. ەكونوميكالىق ءوسىم دە، مەملەكەتتىك قارجىنىڭ كورسەتكىشتەرى بولجامدى شەكتەردىڭ دەڭگەيىندە قالىپ وتىر. احۋال قازاقستانعا عانا بايلانىستى ەمەس، الەمدىك قارجى جانە ەنەرگەتيكا نارىعىنداعى وقيعالارعا دا بايلانىستى، - دەدى تيمۋر سۇلەيمەنوۆ.

ايتا كەتەيىك، بۇگىن ۇلتتىق بانك بازالىق مولشەرلەمە تۋرالى جاڭا شەشىم قابىلدادى.