كەيىنگى ءتورت جىل جەر تاريحىنداعى ەڭ ىستىق كەزەڭ بولدى
استانا. KAZINFORM - دۇنيەجۇزىلىك مەتەورولوگيالىق ۇيىم 2026-جىلعى جاھاندىق كليماتتىڭ جاي-كۇيى تۋرالى جاڭارتىلعان دەرەكتەردى جاريالادى.
دۇنيەجۇزىلىك مەتەورولوگيالىق ۇيىمنىڭ 2026-جىلعى كليماتتىڭ جاي-كۇيى تۋرالى جاڭارتىلعان بايانداماسىنا سايكەس، كەيىنگى 12 جىلدىڭ بارلىعى مەتەوباقىلاۋ تاريحىنداعى ەڭ ىستىق 12 جىلدىڭ قاتارىنا ەندى.
ونىڭ ىشىندە كەيىنگى ءتورت جىل تەمپەراتۋرا كورسەتكىشى بويىنشا العاشقى ءتورت ورىندى يەلەندى.
2026-جىلدىڭ قاڭتار-قىركۇيەك ايلارىنداعى جەر بەتىندەگى اۋانىڭ ورتاشا جاھاندىق تەمپەراتۋراسى يندۋسترياعا دەيىنگى كەزەڭدەگى كورسەتكىشتەن شامامەن 1,47 گرادۋس سەلسيگە جوعارى بولدى.
سونىمەن قاتار جەردىڭ ەنەرگەتيكالىق تەڭگەرىمسىزدىگى ارتىپ كەلەدى. پلانەتا جىلۋدى بۇرىنعىدان دا جىلدام جيناقتاپ جاتىر. بۇعان پارنيكتىك گازدار كونسەنتراتسياسىنىڭ رەكوردتىق دەڭگەيگە جەتۋى سەبەپ. ولار كۇننەن كەلەتىن ەنەرگيا مەن جەردەن تارايتىن جىلۋ اراسىنداعى تەپە-تەڭدىكتى بۇزادى.
ارتىق جىلۋدىڭ شامامەن 90 پايىزىن دۇنيەجۇزىلىك مۇحيت سىڭىرەدى.
قولدا بار دەرەكتەرگە قاراعاندا، 2026-جىل مۇحيتتاعى جىلۋ مولشەرى رەكوردتىق دەڭگەيگە جەتكەن ونىنشى جىل قاتارىنان بولۋى مۇمكىن.
مۇنداي جاعدايدا كليماتتى ۇزدىكسىز باقىلاپ، الدىن الا بولجام جاساۋ قوعام مەن ەكونوميكاعا تونەتىن قاتەرلەردى دەر كەزىندە انىقتاۋعا مۇمكىندىك بەرەدى.
ەسكە سالايىق، بۇعان دەيىن 2026-جىل مەتەورولوگيالىق باقىلاۋ تاريحىنداعى ەڭ ىستىق ەكىنشى جىل بولۋى مۇمكىن ەكەنىن جازعانبىز. مۇنداي مالىمەتتى ەۋروپالىق Copernicus كليماتتىق مونيتورينگ باعدارلاماسى كەلتىردى.