كەيىنگى بىرنەشە جىلدا ورتالىق ازياداعى مۇزدىقتاردىڭ 30 پايىزى ەرىپ كەتتى

تاشكەنت. KAZINFORM - كەيىنگى بىرنەشە جىلدا ورتالىق ازياداعى مۇزدىقتاردىڭ شامامەن 30 پايىزى ەرىپ كەتتى.

مۇنداي دەرەكتەردى تاشكەنتتە وتكەن «وزبەكستان-قىرعىزستان: ستراتەگيالىق ارىپتەستىك سينەرگياسى» كونفەرەنتسياسىندا ساراپشىلار كەلتىردى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

ورتالىق ازيا حالىقارالىق ينستيتۋتىندا وتكەن ءىس-شاراعا قىرعىزستان مەن وزبەكستاننىڭ جەتەكشى اناليتيكالىق ورتالىقتارى جانە عىلىمي-زەرتتەۋ ينستيتۋتتارىنىڭ ساراپشىلارى، مينيسترلىك پەن ۆەدومستۆولاردىڭ وكىلدەرى قاتىستى.

باسقوسۋ بارىسىندا وزبەكستان مەن قىرعىزستان اراسىنداعى ستراتەگيالىق ىنتىماقتاستىقتىڭ ماڭىزدى باعىتتارى تالقىلاندى. اتاپ ايتقاندا، ساراپشىلار ءوزارا تاۋار اينالىمىن ارتتىرۋ، ەنەرگەتيكا، كولىك-لوگيستيكالىق دالىزدەردى دامىتۋ جانە ورتالىق ازياداعى سۋ ماسەلەسىنە ەرەكشە توقتالدى.

«ورتالىق ازياداعى سۋدىڭ باسىم بولىگى مۇزدىقتاردان جينالادى. كەيىنگى بىرنەشە جىلدا مۇزدىقتاردىڭ شامامەن 30 پايىزى ەرىپ كەتتى. ەگەر بۇل ماسەلەگە دەن قويىپ، ونى شەشۋ بويىنشا جۇمىس اتقارماساق، وندا وسى عاسىردىڭ ورتا كەزەڭىندە مۇزدىقتاردىڭ جارتىسىنان كوبىنەن ايىرىلامىز. بۇگىندە ورتالىق ازياداعى مۇزدىقتاردىڭ 45 پايىزى قىرعىزستاننىڭ اۋماعىندا. جاھاندىق جىلىنۋ سالدارىنان ولار تەز ەرىپ، ەلمىزدىڭ ايماقتارىندا سەل ءجۇرۋ قاۋىپىن ۇدەتە ءتۇستى»، - دەدى قىرعىزستان پرەزيدەنتى جانىنداعى ۇلتتىق ستراتەگيالىق باستامالار ينستيتۋتىنىڭ عىلىمي قىزمەتكەرى ازامات ومۋركۋلوۆ.

ساراپشىنىڭ اتاپ وتۋىنشە، سۋ رەسۋرستارىن ءتيىمدى پايدالانۋ ءۇشىن ورتالىق ازيا ەلدەرىنە ورتاق ايماقتىق ستراتەگيا قاجەت. ياعني، ءار مەملەكەت جەكە دارا ەمەس، كەرىسىنشە بىرلەسىپ ارەكەت ەتۋى ءتيىس. كونفەرەنتسياعا قاتىسۋشىلار بۇل باعىتتاعى ىلكىمدى جوبا رەتىندە «قامباراتا» گيدروەلەكتروستانتسياسىنىڭ قۇرىلىسىن اتاپ ءوتتى.

«قازىرگى ۋاقىتتا ەكى ەلدىڭ جالپى وڭىرلىك ماڭىزى بار كولىك-لوگيستيكالىق جانە ەنەرگەتيكالىق جوبالاردى ىسكە اسىرۋداعى ءوزارا ءىس-قيمىلى ستراتەگيالىق تۇرعىدان ماڭىزدى بولىپ وتىر. بيىل ماۋسىمدا بولعان ەكى تاريحي وقيعا بۇعان دالەل: ول «قىتاي - قىرعىزستان - وزبەكستان» تەمىر جولىنىڭ قۇرىلىسى جانە «قامباراتا» گ ە س- ءىن سالۋ جونىندەگى ىنتىماقتاستىق كەلىسىمدەر. بۇل ءىرى جوبالار ورتالىق ازياداعى ينتەگراتسيانىڭ جاڭا دەڭگەيگە شىققانىن ايعاقتايدى»، - دەپ پىكىر قوستى ءو ر پرەزيدەنتى جانىنداعى ستراتەگيالىق جانە ءوڭىرارالىق زەرتتەۋلەر ينستيتۋتى ديرەكتورىنىڭ ورىنباسارى اكرامجون نەماتوۆ.

ايتا كەتەيىك، «وزبەكستان-قىرعىزستان: ستراتەگيالىق ارىپتەستىك سينەرگياسى» كونفەرەنسياسى قىرعىزستان پرەزيدەنتى سادىر جاپاروۆتىڭ وزبەكستانعا جوسپارلانعان مەملەكەتتىك ساپارى قارساڭىندا ءوتتى.