كيىك سانىن رەتتەمەسە نە بولادى - ەكولوگيا مينيسترلىگىنىڭ جاۋابى

استانا. KAZINFORM - ەكولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ مىندەتىن اتقارۋشى دانيار تۇرعامبايەۆ كيىك سانىن مەملەكەت رەتتەمەسە، نە بولاتىنى تۋرالى پايىمىن ايتتى.

«عالىمدار قازاقستان اۋماعىنداعى كيىكتەردى وتە كوپ زەرتتەگەن. سوۆەت زامانىندا ەڭ ۇلكەن پوپۋلياتسيا 1,2 ميلليون باسقا دەيىن عانا جەتكەن. عالىمداردىڭ ەسەبى بويىنشا، قازاقستان اۋماعىنداعى كيىكتىڭ ەڭ وڭتايلى پوپۋلياتسياسى 800-900 مىڭعا دەيىن بولۋ كەرەك. ودان اسسا، ەڭ بىرىنشىدەن، ءبىر-بىرىمەن باسەكە ارتىپ، ەپيزوتيكالىق اۋرۋدان وتە ۇلكەن قاۋىپ بار. ءبىر-بىرىنە جۇقتىرىپ پوپۋلياتسيانىڭ ءبارىن جوعالتىپ الامىز دەگەن قاۋىپ بار»، - دەدى مينيسترلىك وكىلى.

سونداي-اق، ول كيىكتىڭ كوبەيۋى شارۋالارعا زيان تيگىزەدى دەگەن ءۋاج ايتتى.

«ەكىنشىدەن، كيىكتەر اۋىل شارۋاشىلىعىمەن دە باسەكەدە تۇر. اۋىل شارۋاشىلىعىن دا ۇمىتپاۋىمىز كەرەك. قازىر جەر جەتىسپەيدى. سوندىقتان وپتيمالدى تۇردە 800-900 مىڭعا دەيىن عانا دەگەن عالىمداردىڭ ەسەبى بار»، - دەدى دانيار تۇرعامبايەۆ.