كيىك سانىن رەتتەۋگە قاتىستى جاڭا قۇجات جاريالاندى
استانا. KAZINFORM - ەكولوگيا جانە تابيعي رەسۋرستار مينيسترلىگىنىڭ كيىك سانىن رەتتەۋمەن بايلانىستى بۇيرىق جوباسى جاريالاندى.
بۇل قۇجات ارقىلى سانىن رەتتەۋگە جاتاتىن جانۋارلاردىڭ تۇرلەرىن الىپ قويۋعا رۇقسات بەرۋ قاعيدالارىنا وزگەرىس ەنگىزۋ كوزدەلگەن.
بۇيرىق جوباسى سانى رەتتەلەتىن جانۋار ءتۇرىن الىپ قويۋعا مەملەكەتتەن رۇقسات الۋ ءۇشىن جازىلاتىن ءوتىنىم ۇلگىسىنە جانە سول ءوتىنىم نەگىزىندە رۇقسات بەرۋ قۇجاتىنىڭ ۇلگىسىنە وزگەرىس ەنگىزۋگە ارنالعان.
«جانۋارلار سانىن رەتتەۋ ۋچاسكەسىنىڭ اۋدانى جانە شەكاراسى» دەگەن تارماقتىڭ اياعىنا «(اقبوكەننىڭ سانىن رەتتەۋدى قوسپاعاندا)» دەيتىن قوسىمشا تىركەس ەنگىزىلمەك.
ورمان شارۋاشىلىعى جانە جانۋارلار دۇنيەسى كوميتەتىنىڭ ماماندارى بۇل وزگەرىس كيىك سانىن رەتتەۋ ساياساتىنداعى سوڭعى وزگەرىستەرمەن بايلانىستى ۇسىنىلىپ وتىرعانىن ايتادى.
بۇيرىقتاعى وزگەرىس كيىك اتۋعا رۇقساتتى شەكتەگەنىمەن تىيىم سالۋ بولىپ ەسەپتەلمەيدى.
«اقبوكەندەر سانى رەتتەۋگە جاتاتىن جانۋارلاردىڭ تۇرىنە جاتقىزىلعانىن بىلەسىزدەر. ءبىراق سوڭعى كەزدە وسى ماسەلەنىڭ اينالاسىنداعى ۇستانىمدار قايتا قارالىپ جاتىر. وسىعان بايلانىستى سانى رەتتەلەتىن جانۋارلاردىڭ ىشىندە كيىك اتۋعا رۇقسات بەرىلمەيدى. ءبىراق بۇل تولىقتاي تىيىم سالۋ دەگەن ءسوز ەمەس. مەملەكەت تاراپىنان ناقتى شەشىم شىققاننان كەيىن بارىپ كيىك اتۋعا تولىق تىيىم سالىنۋى دا مۇمكىن»، - دەيدى كوميتەتتىڭ جانۋارلار دۇنيەسى جانە اڭشىلىق شارۋاشىلىق باسقارماسىنىڭ باس ساراپشىسى ولجابەك حولوۆ.
بۇعان دەيىن حابارلاعانمىزداي، قازاقستاندا 10-اقپاننان باستاپ كيىك اتۋعا قايتادان تىيىم سالىنعان بولاتىن.
الايدا، بيىل كۇزدە قازاقستاندا كيىك اتۋعا قايتا رۇقسات ەتىلەتىنى تۋرالى سامارقاندا وتكەن ۇنەمى قونىس اۋدارىپ تىرشىلىك ەتەتىن جابايى جانۋار تۇرلەرىن ساقتاۋ كونۆەنتسياسىنىڭ كەزەكتى وتىرىسىندا قر ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ مالىمدەگەن بولاتىن.
ەكولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ مىندەتىن اتقارۋشى دانيار تۇرعامبايەۆ كيىك سانىن مەملەكەت رەتتەمەسە، كيىكتىڭ كوبەيۋى شارۋالارعا زيان تيگىزەدى دەگەن ءۋاج ايتقانىن جازعان بولاتىنبىز.
الايدا، پرەزيدەنت قاسىم-جومارت توقايەۆ قوستاناي وڭىرىندەگى ساپارى كەزىندە اقبوكەندەردى اتۋعا تىيىم سالىناتىنىن مالىمدەگەن بولاتىن.
سونداي-اق، بيىل مامىردا ەلىمىز بويىنشا كيىك ساناعى جۇرەدى.
