كيىك سانىن اتپاي-اق رەتتەۋگە بولادى - ءماجىلىس دەپۋتاتى
استانا. KAZINFORM - ءماجىلىس دەپۋتاتى ەربولات ساۋرىقوۆ كيىك سانىن رەتتەۋگە ارنالعان دوڭگەلەك ۇستەل الدىندا جۋرناليستەرگە وسى ماسەلەگە بايلانىستى ۇستانىمىن ايتتى.
«اۋىل» پارتياسىنىڭ وكىلى قازىر شىنىمەن دە كيىك جايلايتىن وڭىرلەردەگى شارۋالاردان ءتۇرلى شاعىمدار ءتۇسىپ جاتقانىن ايتادى. سوندىقتان كيىك سانىن رەتتەۋدىڭ وڭتايلى جولىن قايتكەندە دە تابۋ كەرەك. ءبىراق ول ءتاسىل كيىك اتۋدان باسقاشا جول بولۋ كەرەك دەپ ەسەپتەيدى.
- جەكە ءوزىم كيىك سانىن اتۋ ارقىلى رەتتەۋگە قارسىمىن. بىلتىر 235 مىڭ باستى اتۋعا رۇقسات بەرىلگەن كەزدە مينيسترمەن سويلەستىم. قاڭتار ايىندا ولار ءالى 85 مىڭ باس اتامىز، 10-اقپانعا دەيىن رۇقسات بار دەگەندى ايتتى. سونىڭ نەگىزىندە پرەمەر-مينيستر ولجاس بەكتەنوۆتىڭ اتىنا حات جولداپ، توقتاتقان ادامنىڭ ءبىرى مەن ەدىم.
ويتكەنى بۋاز كەزىندە، ىشىندە 2-3 لاعى بار باستاردى اتۋ وبال بولادى، - دەيدى ول.
ەربولات ساۋرىقوۆتىڭ سوزىنشە، كيىك سانىن رەتتەۋدىڭ ءۇشىنشى جولى بار.
- ول ءۇشىن ارنايى سەحتەر ۇيىمداستىرۋ نەمەسە بۇقتىرىلعان ەت ءوندىرىسىن جولعا قويۋ قاجەت. ءبىراق ەتكە الىناتىن كيىكتەردى تورمەن اۋلاۋ نەمەسە قاماپ ۇستاۋ تاسىلدەرىن قولدانۋ كەرەك. مىسالى شەتەلدە ۇلكەن-ۇلكەن ارىستانداردى، جولبارىستاردى اتپاي-اق ۇستاپ جاتقاندا كيىكتى ۇستاۋدىڭ ءادىسىن تابۋعا بولادى دەپ ويلايمىن، - دەيدى دەپۋتات.
ەسكە سالساق، بۇعان دەيىن ەكولوگيا جانە تابيعي رەسۋرستار ءمينيسترى ەرلان نسىانبايەۆ مەملەكەت كيىك اتۋ تاسىلىنەن باس تارتپاعانىن ءمالىم ەتكەن ەدى.
