كىتاپ وقىعان ۇرپاق وزىق ويلى بولادى - پرەزيدەنت
استانا. KAZINFORM - پرەزيدەنت قاسىم-جومارت توقايەۆ قازاقستاندىقتاردى 23-ءساۋىر - ۇلتتىق كىتاپ كۇنىمەن قۇتتىقتادى.
بۇل تۋرالى ق ر پرەزيدەنتىنىڭ كەڭەسشىسى - باسپا ءسوز حاتشىسى رۋسلان جەلدىباي مالىمدەدى.
- بىلتىر اتىراۋدا وتكەن ۇلتتىق قۇرىلتايدا مەملەكەت باسشىسى ۇلتتىق كىتاپ كۇنىن بەلگىلەۋ جونىندە تاپسىرما بەرگەن بولاتىن. سوعان سايكەس، بيىلدان باستاپ 23-ءساۋىر - ۇلتتىق كىتاپ كۇنى بولىپ بەلگىلەندى. اتاۋلى كۇنگە وراي پرەزيدەنت قاسىم-جومارت توقايەۆ قازاقستاندىقتاردى قۇتتىقتادى، - دەدى رۋسلان جەلدىباي.
مەملەكەت باسشىسى ءوز قۇتتىقتاۋىندا ۇلتتىق كىتاپ كۇنى - ءبىلىمپازدىق، ىزدەنىمپازدىق، كىتاپقۇمارلىق سياقتى يگى قاسيەتتەردى دارىپتەيتىن كۇن ەكەنىن اتاپ ءوتتى.
- بيىل العاش رەت اتالىپ جاتقان ۇلتتىق كىتاپ كۇنى قۇتتى بولسىن! بۇل - ءبىلىمپازدىق، ىزدەنىمپازدىق، كىتاپقۇمارلىق سياقتى يگى قاسيەتتەردى دارىپتەيتىن كۇن. كىتاپ وقىعان ۇرپاق وزىق ويلى بولادى. ساپالى ۇلت وسىنداي قۇندىلىقتار ارقىلى قالىپتاسادى، - دەلىنگەن قۇتتىقتاۋدا.
وسىعان دەيىن قازاقستاندا كەلەسى جىلدان باستاپ ۇلتتىق كىتاپ كۇنى تويلاناتىنىن جازعان ەدىك.
