كيەۆتە ايدوس سادىقوۆقا قاستاندىق جاسادى دەگەن كۇدىكتىنىڭ بىرەۋى قازاقستاننان تابىلدى
استانا. KAZINFORM — قازاقستاننىڭ باس پروكۋراتۋراسى كيەۆتە قازاقستاندىق جۋرناليست ايدوس سادىقوۆتى اتىپ كەتتى دەپ ايىپتالعان كۇدىكتىلەردىڭ بىرەۋى قامالعانىن حابارلادى.

مەملەكەت باسشىسىنىڭ تاپسىرماسىمەن باس پروكۋراتۋرا 18-ماۋسىمدا كيەۆ قالاسىندا ايدوس سادىقوۆقا جاسالعان قاستاندىق دەرەگى بويىنشا قىلمىستىق ءىس قوزعاعان.
ۋكراينانىڭ قۇقىققورعاۋ ورگاندارى جەدەلدىگى مەن كاسىبيلىگىن كورسەتە وتىرىپ، قىسقا مەرزىمدە وسى قىلمىستى جاساعان تۇلعالاردى انىقتادى.
«باس پروكۋراتۋرا ۋكراينانىڭ قۇزىرەتتى ورگاندارىنا جاقانبايەۆ پەن قاراتايەۆتىڭ جاسالعان قىلمىسقا قاتىسى تۋرالى قىلمىستىق ءىستىڭ ماتەريالدارىن بەرۋ جونىندە حالىقارالىق تەرگەۋ تاپسىرماسىن جولدادى. 21-ماۋسىمدا التاي جاقانبايەۆ قازاقستان رەسپۋبليكاسىنىڭ ىشكى ىستەر ورگاندارىنا ءوز بەتىنشە حابارلاسىپ، ودان ءىستىڭ ءمان-جايى بويىنشا جاۋاپ الىندى. سول كۇنى ول وسى قىلمىستى جاسادى دەگەن كۇدىكپەن ۇستالدى» دەپ حابارلادى ۆەدومستۆودان.
مەيرام قاراتايەۆتىڭ قايدا جۇرگەنىن انىقتاۋ ءۇشىن جەدەل ىزدەستىرۋ شارالارى ءجۇرىپ جاتىر.
«تەرگەۋ مۇددەسى ءۇشىن وزگە اقپارات جاريالانبايدى» دەپ ەسكەرتتى باس پروكۋراتۋرا.
ەسكە سالا كەتەيىك، 18-ماۋسىمدا كيەۆتە تۇراتىن جۋرناليست ايدوس سادىقوۆتى ءۇيىنىڭ جانىندا الدەبىرەۋلەر اتىپ كەتتى. ول قازىر اۋرۋحانادا جاتىر.
ۋكراينا پروكۋراتۋراسى ەكى كۇدىكتىنىڭ سول كۇنى-اق شەكارانى كەسىپ ءوتىپ، ەلدەن كەتىپ قالعانىن حابارلادى.
باس پروكۋراتۋرا ايدوس سادىقوۆتى ولتىرمەك بولعانداردى تابۋ ءۇشىن ءوز بەتىنشە تەرگەۋ باستاعان ەدى.
كەشە، 21-ماۋسىمدا ىشكى ىستەر مينيسترلىگى ايدوس سادىقوۆقا وق اتتى دەگەن كۇدىكتىنىڭ قازاقستان پوليتسياسىندا جۇمىس ىستەمەيتىنىن حابارلادى.
مەملەكەت باسشىسى قاستاندىقتى تەرگەۋ امالدارىن ءجىتى باقىلاپ وتىر.