كيپر مەن قازاقستان اراسىندا اپتاسىنا 14 اۋە رەيسى ورىندالماق
استانا. KAZINFORM - كيپر مەن قازاقستان اراسىندا اپتاسىنا ءار تاراپتان 7 اۋە رەيسى ورىندالۋى مۇمكىن، دەپ حابارلايدى ازاماتتىق اۆياتسيا كوميتەتىنىڭ باسپا ءسوز قىزمەتى.
قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى م. ا. نۇرتىلەۋ كيپر رەسپۋبليكاسىنىڭ سىرتقى ىستەر ءمينيسترى كونستانتينوس كومبوس مىرزامەن رەسمي كەزدەسۋى اياسىندا 2024 -جىلعى 25-ناۋرىزدا ەكى ەلدىڭ اۆياتسيالىق بيلىكتەرى دايىنداعان اۋە قاتىناسى ماسەلەلەرى بويىنشا ءوزارا تۇسىنىستىك تۋرالى مەموراندۋمعا قول قويىلدى.
ءوزارا تۇسىنىستىك تۋرالى مەموراندۋم ءار تاراپتىڭ تاعايىندالعان تاسىمالداۋشىلارى اپتاسىنا 7 رەيسكە دەيىن ورىنداۋ قۇقىعىن كوزدەيدى. سونداي-اق، ءار تاراپتان تاسىمالداۋشىلاردىڭ بىرنەشە تاعايىندالۋى قاراستىرىلعان.
مەموراندۋمعا سايكەس قازاقستاندىق اۋە كومپانيالارى كيپر رەسپۋبليكاسى اۋماعىنداعى - لارناكا جانە پافوس قالالارىنا، كيپر اۋە كومپانيالارى قازاقستان رەسپۋبليكاسىنىڭ اۋماعىنداعى - استانا جانە الماتى قالالارىنا تاسىمالداۋدى ورىنداۋعا قۇقىلى.
ءوزارا تۇسىنىستىك تۋرالى مەموراندۋمعا قول قويۋ ەكى ەل اراسىنداعى ەكونوميكالىق، ىسكەرلىك جانە تۋريستىك ىنتىماقتاستىقتى نىعايتۋعا مۇمكىندىك بەرەدى.
