كينويندۋستريا سالاسىن مەملەكەتتىك قولداۋدىڭ جاڭا تەتىكتەرى ازىرلەنىپ جاتىر

 استانا. KAZINFORM - كينويندۋستريا سالاسىن مەملەكەتتىك قولداۋدىڭ جاڭا تەتىكتەرى ازىرلەنىپ جاتىر. بۇل جايىندا سەنات دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.

«مەملەكەت باسشىسىنىڭ كينەماتوگرافيا سالاسىن رەفورمالاۋ بويىنشا بەرگەن تاپسىرماسىن ورىنداۋ ماقساتىندا ۇكىمەت «كينەماتوگرافيا تۋرالى» زاڭعا تۇزەتۋلەر ەنگىزۋ جانە كينويندۋستريا سالاسىن مەملەكەتتىك قولداۋدىڭ جاڭا مەحانيزمىن ازىرلەۋ جۇمىستارىن جۇرگىزىپ جاتىر. ەنگىزىلەتىن تۇزەتۋلەردىڭ قاتارىندا بالالار انيماتسيالىق فيلمدەرى مەن وتباسىمەن كورۋگە ارنالعان قازاق تىلىندەگى فيلمدەر سانىن ۇلعايتۋ بويىنشا نورمالار قاراستىرىلعان. ءتيىستى زاڭ جوباسى قازاقستان رەسپۋبليكاسى پارلامەنتى ءماجىلىسىنىڭ قاراۋىندا»، - دەپ اتاپ وتەدى ۇكىمەت باسشىسى.

پرەمەر- مينيستر ۇكىمەتتىڭ قاۋلىسىمەن بەكىتىلگەن قازاقستان مادەني ساياساتىنىڭ 2023-2029 -جىلدارعا ارنالعان تۇجىرىمداماسى ىسكە اسىرىلىپ جاتقانىن اتاپ وتەدى. وندا وتاندىق فيلمدەردىڭ، ونىڭ ىشىندە انيماتسيالىق فيلمدەردىڭ كينوپروكات ۇلەسىن 2022 -جىلعى دەڭگەيدەن 2030 -جىلى 35 پايىزعا دەيىن ارتتىرۋ (2023 -جىلى -%18، 2024 -جىلى - %21، 2025 -جىلى - %25، 2026 -جىلى -%28، 2027 -جىلى -%30، 2028 -جىلى -%32، 2029 -جىلى - %35) نىسانالى ينديكاتورى كوزدەلگەن.

«انيماتسيالىق فيلمدەر ءوندىرىسى «كينەماتوگرافيا تۋرالى» زاڭنىڭ نەگىزىندە (فيلمدەردى ىرىكتەۋ جانە قارجىلاندىرۋ قاعيدالارى) رەتتەلەدى. ياعني، انيماتسيالىق ونەر قۇرىلىمى اتالعان زاڭدا كەڭىنەن قاراستىرىلعان»، - دەدى ولجاس بەكتەنوۆ.