كينوگەرلەر ءاليا مولداعۇلوۆا تۋرالى كوركەم فيلمگە باس كەيىپكەر ىزدەيدى
الماتى. KAZINFORM - قازاقستاندىق كينوگەرلەر قازاقتىڭ قاھارمان قىزى ءاليا مولداعۇلوۆا تۋرالى «ءاليا» اتتى جاڭا كوركەم فيلمدى تۇسىرۋگە دايىندالىپ جاتىر.
ءا. مولداعۇلوۆانىڭ 100 جىلدىعىنا جانە جەڭىستىڭ 80 جىلدىعىنا ارنالعان «ءاليا» تولىقمەتراجدى كوركەم فيلمى 2025 -جىلدىڭ مامىر ايىندا جارىققا شىعادى.
«ءاليا» فيلمىنىڭ ستسەناريىن ماسكەۋلىك جۋرناليست، تەلەجۇرگىزۋشى ءارى اكتريسا الەنا كۋلەشوۆا جازدى.
جوبانىڭ باس پروديۋسەرى جانە سەناريستەرىنىڭ ءبىرى الەكساندر شۋحوۆ فيلم ءتۇسىرۋ يدەياسى 2019 -جىلى پايدا بولعانىن اتاپ ءوتتى.
«قازاقتىڭ باتىر قىزى ءاليا مولداعۇلوۆا ەكىنشى دۇنيەجۇزىلىك سوعىسقا اتتانعاندا جاس ءوسىپىرىم بولدى. قولىنا قارۋ الىپ، مەرگەندىك تانىتقان ول 78 جاۋ اسكەرىنىڭ كوزىن جويىپ، كەڭەس وداعىنىڭ باتىرى اتاعىن الدى. بۇل وقيعا ماسكەۋلىك جۋرناليست، تەلەجۇرگىزۋشى جانە اكتريسا الەنا كۋلەشوۆانى باۋراپ العانى سونشالىق، ءومىرىنىڭ ءۇش جىلىن بيوپيكتىڭ سەناريىن جازۋعا ارنادى. ميفتەر مەن اڭىزداردان باس تارتىپ، الەنا ءومىردىڭ شىنايى شىندىعىن ىزدەدى. ول ءاليانى جاقسى بىلەتىن ادامداردى تاۋىپ، ولارمەن اڭگىمەلەستى»، - دەدى الەكساندر شۋحوۆ.
ونىڭ ايتۋىنشا، بۇل قىمبات جوباعا 900 ميلليون تەڭگەدەن استام قاراجات جۇمسالادى دەپ جوسپارلاعان.
فيلم قازاقستاندا تۇسىرىلەدى. بەلارۋس ەلىندە دە ءوتۋى مۇمكىن.
«ءاليا» فيلمىنىڭ رەجيسسەرى — الەن نيازبەكوۆ. ول كوپشىلىككە «كانيكۋلى ۆ تايلاندە»، «مويا بولشايا كازاحسكايا سەميا»، «اگاشكي پو ۆىزوۆۋ»، «الماتى، يا ليۋبليۋ تەبيا» فيلمدەرى ارقىلى تانىمال.
«ءاليا» كارتيناسىنىڭ پروديۋسەرلەرى فيلمدى جاس مامان ءتۇسىرۋ كەرەك دەگەن شەشىم قابىلداعان.
«ءبىز تەك سەنىمدى، ساراپشىلار راستايتىن جانە مويىندايتىن فاكتىلەردى قولدانۋدى ماقسات ەتتىك. ماسكەۋ اسكەري مۇراعاتتارىنداعى جۇمىس ناتيجەسىندە درامالىق ماتەريال ءۇشىن دالەلدەنگەن نەگىز جينالدى»، - دەيدى رەجيسسەر.
ونىڭ سوزىنشە، فيلمگە پسيحولوگيالىق اسكەري درامانىڭ جانرى تاڭدالدى، ەرلىككە بارعان كەيىپكەردىڭ موتيۆاتسياسى اشىلادى. جەكپە-جەك كورىنىستەرى بىرتە-بىرتە لەنتانىڭ ەموتسيونالدى قارقىندىلىعىن كۇشەيتۋ ارقىلى، كەڭ اۋديتورياعا فيلمنىڭ تارتىمدىلىعىن قامتاماسىز ەتەدى.
«ءاليا مولداعۇلوۆا دەگەندە ويعا بىردەن ەكىنشى دۇنيەجۇزىلىك سوعىس ورالادى. ءبىراق بۇل فيلم سوعىس تۋرالى ەمەس، ءاليا تۋرالى. ونىڭ بالالىق شاعى، ەسەيۋ، جاستىق شاعى باياندالادى»، - دەيدى الەن نيازبەكوۆ.
9-مامىردا جالپى ۇلتتىق كاستينگ باستالادى. شىعارماشىلىق توپ باستى رولدە وينايتىن اكتريسانى قازاقستان تۇرعىندارى اراسىنان ىزدەيدى.
«ءبىز سەناريمەن تانىستىق. ءاليانىڭ وبرازىن اشاتىن 15-16 جاستاعى، بويى 150-155 س م بولاتىن قازاق قىزىن ءالى تاپپادىق، بۇكىل قازاقستان بويىنشا كەڭ اۋقىمدى اشىق كاستينگ جاريالايمىز»، - دەدى كاستينگ ديرەكتورى گۇلزۋرا ەسەن.
ءتۇسىرىلىم كۇزدە باستالىپ، قىستا اياقتالادى.
