ەكىنشى رەت تۇرمىس قۇرىپ وتىرعان كەلىننىڭ بەتى اشىلا ما؟ ەتنوگراف جاۋاپ بەردى

بۇرىن تۇرمىستا بولعان كەلىننىڭ بەتى اشىلا ما؟ ماسساگەت بۇل سۇراقتىڭ جاۋابىن ەتنوگراف بولات بوپاي ۇلىنان سۇراپ كوردى.

وسىدان ءبىر اي بۇرىن دۋەت ايتىپ تانىلعان ءانشى ۇيلەندى. ءانشى الەۋمەتتىك جەلىگە تويىنداعى بەتاشار راسىمىنەن ۆيدەو جاريالادى. شاڭىراق كوتەرگەن ءانشىنىڭ تويىنداعى بەتاشار ءراسىمى حالىقتىڭ سىنىنا قالدى. كوپشىلىكتىڭ ايتۋىنشا، بۇرىن تۇرمىستا بولعان كەلىننىڭ بەتى اشىلمايدى، ياعني قازاقتا ەكىنشى رەت تۇرمىسقا شىققان ايەلدىڭ بەتاشارى جاسالىنبايدى.

جەلى قولدانۋشىلارى اشۋلانىپ، ۆيدەو استىنا ءتۇرلى پىكىر قالدىرعان.

«قايتىپ كەلگەن ايەلدىڭ بەتى اشىلمايدى، تەك ورامال اۋىستىرادى»، «ءبىر قىزعا، ەكى جار-جار جوق، ءداستۇردى بۇزباۋ كەرەك»، «اتا-بابا ءداستۇرىن ۇستانۋ، ونى دۇرىس ساقتاۋ، كەلەر ۇرپاققا دۇرىس جەتكىزۋ بارىمىزگە مىندەت. قىز بالاسىنىڭ بەتى ەكىنشى رەت اشىلماعان، اشىلماۋ كەرەك»، «قىزدىڭ بەتى ءبىر اشىلسا، بەتاشار بولمايتىن ەدى عوي»، «مىنا بەتاشاردا وتىرعان ەگدە جاستاعى كىسىنىڭ ءبارى ماڭگۇرت بوپ قالعانبا؟ «ەي، ادامدار» - دەپ بىرەۋى باس كوتەرىپ شىقپاسا، قازاقتىڭ سالت-ءداستۇرى ماقۇرىم قالعانى دا. بۇنداي كوزبوياۋشىلىق نەگە كەرەك؟ ءانشى بولسا ول دا پايعامباردىڭ ۇمبەتى. ايتۋ كەرەك، توقتاتۋ كەرەك باسسىزدىقتى»، - دەپ جازعان ولار.

وسى تۇستا Massaget.kz ءتىلشىسى حالىقتىڭ ايتقان بۇل ءسوزى قانشالىق دۇرىس ەكەنىن ءبىلۋ ءۇشىن ەتنوگراف بولات بوپاي ۇلىنان سۇراپ كوردى.

ەتنوگرافتىڭ ايتۋىنشا، بەتاشار ءراسىمىنىڭ جاسالىنىپ-جاسالىنباۋى تۇرمىس قۇرىپ وتىرعان ايەلدىڭ جاسىنا بايلانىستى.

«بەتاشار دەگەن قازاقتىڭ ەڭ ماڭىزدى سالت-ءداستۇرىنىڭ ءبىرى. تۇسكەن جاس كەلىننىڭ ءبىرىنشى نەسىبەسى دەپ ايتا الامىز. كەلىن جاڭا وتباسىنىڭ ءاربىر مۇشەسىنە دەگەن قۇرمەتىن كورسەتىپ، ولارمەن تانىساتىن سالت.

ەگەر ايەلدىڭ جولداسى قايتىس بولىپ، ول جاستايىنان جەسىر قالسا، ەكىنشى رەت تۇرمىسقا شىققاندا ەگدە جاستا بولماسا، ونىڭ بەتى اشىلا بەرەدى. ياعني بۇرىن تۇرمىستا بولعان جاس كەلىننىڭ بەتاشارى جاسالىنا بەرەدى. ال ەگدە 50-60 جاستاعى، بالالارى ەرجەتىپ-بويجەتىپ قالعان ايەلدىڭ بەتى اشىلمايدى.

قازىرگى كەزدە تۇرمىس قۇرىپ، ءبىر-ەكى جىلدان كەيىن ءبىر بالامەن اجىراسىپ كەتەتىندەر بار عوي، ولاردىڭ جاسى 25-30 اسپاسا، بەتاشار ءراسىمى جاسالىنا بەرەدى»، - دەيدى بولات بوپاي ۇلى.