ۇكىمەتتىڭ كەڭەيتىلگەن وتىرىسى باستالدى
استانا. KAZINFORM - پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى باستالدى.

ءىس-شارادا ەلىمىزدىڭ 2024 -جىلعى الەۋمەتتىك-ەكونوميكالىق دامۋىنىڭ قورىتىندىلارى شىعارىلىپ، ۇكىمەتتىڭ الداعى كەزەڭگە ارنالعان نەگىزگى مىندەتتەرى بەلگىلەنەدى.
بىلتىرعى جۇمىستىڭ قورىتىندىسىن پرەمەر-مينيستر ولجاس بەكتەنوۆ، ۇلتتىق بانك ءتوراعاسى تيمۋر سۇلەيمەنوۆ جانە ءبىرقاتار ءوڭىردىڭ اكىمدەرى باياندايدى دەپ جوسپارلانعان.
ايتا كەتۋ كەرەك، بىلتىر 7-اقپاندا وتكەن كەڭەيتىلگەن وتىرىستا مەملەكەت باسشىسى ۇكىمەتتىڭ الدىنا 10 مىندەت قويعان بولاتىن.
ونىڭ ىشىندە 2029 -جىلعا قاراي ەكونوميكانىڭ كولەمىن 450 ميلليارد دوللارعا جەتكىزۋدى مەجەسى قويىلدى. ال وعان قول جەتكىزۋ ءۇشىن ەلدىڭ جالپى ىشكى ءونىمى جىل سايىن كەمىندە %6 عا ءوسۋى كەرەك ەكەنىن باسا ايتتى. 2024 -جىلدىڭ 11 ايىنداعى قورىتىندىعا سۇيەنسەك، جالپى ىشكى ءونىمنىڭ ءوسىمى %4,4 بولعان.
ۇكىمەتتىڭ ءبىر جىلداعى جۇمىسىنا مەملەكەت باسشىسى «انا ءتىلى» گازەتىنە بەرگەن سۇحباتىندا قىسقاشا باعا بەردى.
- ۇكىمەتتىڭ مىندەتى - ەكونوميكانىڭ ءوسىمىن قامتاماسىز ەتۋ جانە ازاماتتاردىڭ ءال-اۋقاتىن جاقسارتۋ. جالپى العاندا، مينيسترلەر كابينەتى بۇل مىندەتىن ورىنداپ وتىر. ەكونوميكانى ءارتاراپتاندىرۋ، وڭدەۋ ونەركاسىبىن دامىتۋ، ينفراقۇرىلىمدى جاڭعىرتۋ سياقتى باعىتتار بويىنشا بىلتىر اتقارىلعان جۇمىستىڭ ناتيجەلەرى جامان ەمەس. الايدا ءبارى ءمىنسىز دەۋگە كەلمەيدى، پروبلەمالار دا بار. مەن مينيسترلەردەن نەعۇرلىم ءتيىمدى جۇمىس ىستەۋدى جانە شەشىم قابىلداعاندا باتىل بولۋدى ۇنەمى تالاپ ەتەمىن، - دەگەن ەدى پرەزيدەنت.
ەسكە سالساق، وسىعان دەيىن 28-قاڭتاردا قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى وتەتىنىن جازعان ەدىك.