ۇكىمەتتە قىسقى IX ازيا ويىندارىنا دايىندىق شارالارى قارالدى

استانا. KAZINFORM — پرەمەر- مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا قىسقى IX ازيا ويىندارىنا دايىندىق بارىسى قارالدى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.

Үкіметте қысқы IX Азия ойындарына дайындық шаралары қаралды
Фото: ҚР Үкіметі

تۋريزم جانە سپورت ءمينيسترى ەربول مىرزابوسىنوۆ بايانداما جاسادى. قىسقى IX ازيا ويىندارى 2025-جىلدىڭ 7-14-اقپانى ارالىعىندا قىتايدىڭ حاربين قالاسىندا وتەدى. قازاقستان قۇراماسى 10 باعدارلاما بويىنشا 6 سپورت تۇرىنەن باق سىنايدى. بۇگىنگى تاڭدا سپورتشىلار سانى بەكىتىلىپ، 138 سپورتشى قاتىساتىنى بەلگىلى بولدى. الداعى قىسقى ازيا ويىندارى 2026-جىلى ميلاندا وتەتىن وليمپيادا ويىندارىنا ساپالى دايىندىق جۇمىستارىن كۇشەيتۋگە مۇمكىندىك بەرەدى.

ءىرى سپورتتىق ءىس-شارالار وتكىزۋ حالىقتىڭ قىسقى سپورت تۇرلەرىمەن اينالىسۋعا دەگەن قىزىعۋشىلىعىن ارتتىرا تۇسەتىنىن، سونداي-اق تۋريزمگە تىڭ سەرپىن بەرەتىنىن اتاپ ءوتىلدى. بۇل رەتتە قازاقستاندىقتار ءۇشىن سپورت ينفراقۇرىلىمى قولجەتىمدىلىگىنىڭ ماڭىزدىلىعى باسا ايتىلدى.

— بارلىق سپورت وبەكتىلەرى قالىڭ كوپشىلىككە قولجەتىمدى بولىپ قالۋعا ءتيىس. بۇل سپورتپەن شۇعىلدانۋشىلار سانىن ارتتىرىپ، وسى نىساندار اينالاسىندا بيزنەستىڭ دامۋىنا جول اشادى. اكىمدىكتەر مەن كاسىپكەرلەر اتالعان باعىتتا بەلسەندى جۇمىس ىستەۋى كەرەك. تەك سوندا عانا حالىقتى كوپتەپ تارتۋعا مۇمكىندىك تۋادى. ول بيزنەس پەن سپورت-تۋريستىك نىساندار اينالاسىنداعى ەلدى مەكەندەرگە مۋلتيپليكاتيۆتى اسەر بەرەدى، — دەدى ولجاس بەكتەنوۆ.

پرەمەر-مينيستر تۋريزم جانە سپورت مينيسترلىگىنە اكىمدىكتەرمەن بىرلەسىپ ينۆەستورلار تارتىپ، سپورت ينفراقۇرىلىمىن سالۋ ءۇشىن قولايلى جاعداي جاساۋ، ونىڭ ىشىندە الماتىمەن قاتار الماتى وبلىسىندا، شىعىس قازاقستاندا جانە باسقا ايماقتاردا جاڭادان تاۋ شاڭعىسى تراسسالارىن جاساۋ جۇمىستارىن جانداندىرۋدى تاپسىردى. بۇگىندە ەڭ تانىمال قىسقى دەمالىس ورىندارىنىڭ ءبىرى - شىمبۇلاقتىڭ تاۋلىكتىڭ جۇكتەمەسى جوبالىق قۋاتىنان اسىپ ءتۇستى. 2024-جىلى كەلۋشىلەر سانى 1,5 ميلليوننان استى.

جالپى ەلىمىز بويىنشا مەملەكەت باسشىسى تاپسىرماسىمەن سالاۋاتتى ءومىر سالتىن دامىتىپ، حالىقتى دەنە شىنىقتىرۋمەن اينالىسۋعا تارتۋ ءۇشىن كەشەندى شارالار قابىلدانۋدا. رەسپۋبليكا بويىنشا 5 جىل ىشىندە 215 دەنە شىنىقتىرۋ كەشەنى، 17 ءجۇزۋ باسسەينى، 57 سپورت مانەجى جانە 1,5 مىڭنان استام سپورت الاڭى سالىندى. جەكە ينۆەستورلار ەسەبىنەن 92 جوبا ىسكە اسىرىلدى.

پرەمەر-مينيستر وليمپيادالىق ستاندارتتارعا باعدارلانعان ءتيىمدى دايىندىق باعدارلامالارىن قۇرۋ بويىنشا قارقىندى جۇمىس قاجەت ەكەنىن اتاپ ءوتتى.

بۇگىنگى تاڭدا سپورتشىلار دايارلاۋدىڭ ناقتى جۇيەسىنىڭ جوقتىعى، جاتتىقتىرۋشى قۇرامنىڭ جەتىسپەۋشىلىگى، سپورت تۇرلەرى بويىنشا وڭىرلەر اراسىنداعى باسەكەلەستىكتىڭ تومەندىگى بايقالادى.

— مەملەكەت باسشىسى جوعارى جەتىستىكتەر سپورتىنا قاتىستى ناقتى مىندەتتەر قويدى. بۇل رەتتە سپورت تۇرلەرىن تاڭداۋ عىلىمي تۇرعىدا نەگىزدەلىپ، ەلىمىزگە ءتان ەرەكشەلىكتەرگە سۇيەنە وتىرىپ جاسالۋى كەرەك. اتالعان ماسەلەنىڭ شەشىمى سپورت فەدەراتسيالارىنىڭ قىزمەتىن، ولاردىڭ حالىقارالىق، رەسپۋبليكالىق جانە جەرگىلىكتى دەڭگەيلەردەگى جۇمىسىن دا رەتتەۋگە ءتيىس. سونداي-اق تۋريزم جانە سپورت مينيسترلىگى جەرگىلىكتى اتقارۋشى ورگاندارمەن بىرلەسىپ، بالالار مەن جاس وسپىرىمدەر سپورتىن دامىتۋ، سپورت مەكتەپتەرى مەن سەكسيالارىن قۇرۋ جانە قولداۋ جونىندە شارالار قابىلداۋى قاجەت. سپورتتىق مەديتسينانى دامىتۋ جۇمىسىن جانداندىرۋ كەرەك. ءبارىمىز قازاق سپورتىنىڭ باسەكەگە قابىلەتتى بولۋى ءۇشىن كۇش-جىگەرىمىزدى جۇمىلدىرۋعا ءتيىسپىز، - دەپ اتاپ ءوتتى ولجاس بەكتەنوۆ.

تۋريزم جانە سپورت مينيسترلىگىنە اكىمدىكتەر، بارلىق مۇددەلى ۇيىم مەن كومپانيالارعا - قازاقستان قۇراماسىنىڭ قىتايدا ءساتتى ناتيجە كورسەتۋ ءۇشىن سپورتشىلارىمىزعا بارلىق جاعداي جاساۋ تاپسىرىلدى. سىرتقى ىستەر مينيسترلىگىنە ۇلتتىق قۇراماعا ديپلوماتيالىق جەلى بويىنشا ءتيىستى قولداۋ كورسەتۋ مىندەتى قويىلدى.

مادەنيەت جانە اقپارات مينيسترلىگىنە قازاقستاندىق سپورتشىلار قاتىساتىن ازيا ويىندارىنىڭ ۇزدىكسىز ءارى ساپالى كورسەتىلىمىن قامتاماسىز ەتۋ تاپسىرىلدى.

تۋريزم جانە سپورت مينيسترلىگىنە اكىمدىكتەرمەن، ۇلتتىق وليمپيادا كوميتەتتەرىمەن، فەدەراتسيالارمەن بىرلەسىپ، 2026-جىلعى قىسقى وليمپيادا ويىندارىنا ساپالى دايىندىق جۇمىستارىن بارىنشا كۇشەيتۋ بويىنشا تاپسىرما بەرىلدى.

ۇكىمەت وتىرىسى سوڭىندا پرەمەر-مينيستر ايگىلى سپورتشىلار - وليمپيادا جەڭىمپازدارى ۆلاديمير سميرنوۆتىڭ، ليۋدميلا پروكاشيەۆانىڭ، ەلەنا حرۋستاليەۆانىڭ، دەنيس تەننىڭ، يۋليا گالىشيەۆانىڭ قازاق سپورتىنداعى ەتكەن ەڭبەگى مەن جەتىستىكتەرىن اتاپ ءوتتى. ولجاس بەكتەنوۆ سپورتشىلارعا حاربيندە وتەتىن قىسقى ازيا ويىندارىندا ءساتتى ونەر كورسەتۋلەرىنە تىلەكتەستىك ءبىلدىردى.

ەسكە سالا كەتەيىك، قىسقى ازيا ويىندارىندا قازاقستاننان تۋدى كىمدەر ۇستاپ شىعاتىنىن جازعان بولاتىنبىز.

سوڭعى جاڭالىقتار