ۇكىمەتكە جالپى كوڭىلىمىز تولادى، ءبىراق ولقى تۇستار بار - ەلنۇر بەيسەنبايەۆ

ق ر پارلامەنتى ءماجىلىسىنىڭ دەپۋتاتى، «Amanat» فراكتسياسىنىڭ جەتەكشىسى ەلنۇر بەيسەنبايەۆ «حالىقپەن بىرگە!» اتتى سايلاۋالدى باعدارلاماسىندا قانداي جۇمىس جۇرگىزىلىپ جاتقانىن ايتتى، دەپ حابارلايدى Kazinform.

«بىزدە 20 وڭىردە ارنايى جاسالعان باعدارلامالار جانە ءبىر رەسپۋبليكالىق باعدارلاما توپتاماسى بار. 20 وڭىرلىك باعدارلامانىڭ جۇزەگە اسۋىنا 5 جىلدا 30 تريلليون تەڭگە قاراجات كەتەدى. ونىڭ ىشىندە جەرگىلىكتى بيۋجەت بار، رەسپۋبليكالىق ترانسفەرتتەر بار، وڭىرلەردىڭ ينۆەستيتسيالىق جوبالارى دا سونىڭ ىشىنە كىرەدى. وعان قوسا رەسپۋبليكالىق باعدارلامامىز بار. ونىڭ اياسىندا جىل سايىن مەملەكەتتە قارالىپ جاتقان بيۋجەتتىڭ شامامەن 45-50 پايىزى وسى Amanat پارتياسىنىڭ باعدارلاماسىن ورىنداۋعا باعىتتالادى»، - دەدى ە. بەيسەنبايەۆ Jibek joly تەلەارناسىنىڭ «ۋادە» باعدارلاماسىندا.

پارتيا وكىلى بيىلدان باستاپ جاڭا ساياسي ءداستۇر قالىپتاسقانىن، پارلامەنتتە كوپشىلىك داۋىسقا يە بولعان، ياعني سايلاۋدا ايقىن جەڭىسكە جەتكەن ساياسي پارتيانىڭ وكىلدەرى ەندى ۇكىمەت باسشىسىن ۇسىناتىنىن ەسكە سالدى.

«ءبىز ۇكىمەت باسشىسىن ۇسىندىق. تەك قانا ۇسىنىپ قويماي، وسى شاقىرىلىمنىڭ باستالۋىنىڭ الدىندا، جولداۋعا ءبىر كۇن قالعاندا ۇكىمەت باسشىسى ءبىزدىڭ فراكتسياعا كەلىپ، Amanat باعدارلاماسىنىڭ ورىندالۋى، قاي جەرىندە ولقى تۇستار بار، قاي جەردەگى ۋادەلەرىمىزدى ورىنداي الماۋ قاۋپى بار دەگەن سۇراقتاردى تالقىلادى. ۇكىمەتكە جالپى كوڭىلىمىز تولادى، ءبىراق ولقى تۇستارى دا بار. وتكەندە ءوزىمىزدىڭ سىنىمىزدى ايتتىق، سىن بولماسا دا جۇمىس جۇرمەيدى. ءيا، ايتىلاتىن ماسەلە كوپ. مىسالى ءمامس جۇيەسى قوعامداعى ۇلكەن دەرتكە اينالدى. جول توراپتارىنىڭ قۇرىلىسى، الماتى-استانا اراسىنداعى، اتىراۋ-استراحان اراسىنداعى ۇلكەن جولداردىڭ سالىنباۋى، مەكتەپ قۇرىلىسىنىڭ ۋاقىتىلى اياقتالماۋى سەكىلدى پروبلەمالار بار. ءبىزدىڭ اقپاراتىمىز بويىنشا، 50 دەن اسقان مەكتەپتەردىڭ جوندەۋ جۇمىسى تۇرالاپ قالعان، ءبىز ونى باقىلاۋعا الامىز»، - دەپ ءتۇسىندىردى ەلنۇر بەيسەنبايەۆ.