ۇكىمەت مەتاللۋرگيا كەشەنىن دامىتۋ ءۇشىن قانداي شارالاردى قولعا الماق
استانا. KAZINFORM - ۇكىمەتتە وتكىزىلگەن ەكونوميكالىق ءوسۋدى قامتاماسىز ەتۋ جونىندەگى شتاب وتىرىسىندا ۆيتسە-پرەمەر - ۇلتتىق ەكونوميكا ءمينيسترى سەرىك جۇمانعارين ونەركاسىپ جانە قۇرىلىس مينيسترلىگى مەن وڭىرلەردىڭ الدىنا تاۋ-كەن مەتاللۋرگيا كەشەنىنىڭ 2025-جىلعى ناقتى كولەم يندەكسىن (ن ك ي) ۇلعايتۋ مىندەتىن قويدى.
ونەركاسىپ جانە قۇرىلىس مينيسترلىگى 2025-جىلى فيزيكالىق مەتاللۋرگيا يندەكسىنىڭ 5 پايىز، مەتالل كەنىنىڭ 3,1 پايىز، كومىر ءوندىرۋدىڭ وتكەن جىلدىڭ دەڭگەيىندە ءوسۋىن بولجايدى. مىس، التىن، پروكات، فەرروقورىتپا، شويىن ءوندىرۋ كولەمىنىڭ ۇلعايۋى ەسەبىنەن مەتاللۋرگيا كولەمىن ارتتىرۋ جوسپارلانۋدا. سونداي-اق بيىل «Qaragandy Power Silicon» جشس كەشەندى قورىتپا زاۋىتى، «ەkibastuz FerroAlloys» جشس فەرروقورىتپا ءوندىرىسى، «Shagala mining» ج ش س كاتودتى مىسى، ليماننوە كەن ورنى ىسكە قوسىلادى.
ۆيتسە-پرەمەر شتاب وتىرىسىندا اتاپ وتكەندەي، بيىل ەلىمىزدىڭ ەكونوميكالىق ءوسىمىنىڭ 7 پايىزدىق تارگەتتەلەتىن كورسەتكىشى ءۇشىن ت م ك- نىڭ جوسپارلانىپ وتىرعان ءوسۋ كورسەتكىشتەرى جەتكىلىكسىز.
«ەلىمىزدىڭ ەكونوميكالىق ءوسۋى بويىنشا 7 پايىز ماقساتتى باعىت شەڭبەرىندە وڭدەۋشى ونەركاسىپ ءوسىمىنىڭ نىسانالى ينديكاتورى 7,6 پايىزدى قۇرايدى. وڭدەۋشى ونەركاسىپتەگى ۇلەس سالماعى شامامەن 40 پايىزدى قۇرايتىن مەتاللۋرگيا بويىنشا نەگىزگى ءونىم تۇرلەرى بويىنشا ن ك ي- نىڭ جوسپارلانعان كورسەتكىشتەرى نەگىزىندە ءبىز 2-3 پايىزدان اسپايتىن ءوسىمدى كورەمىز. بيىل بارلىق سالالىق وندىرۋشىلەرىمەن بىرلەسىپ، ت م ك- دا جوعارى وسىمگە قالاي قول جەتكىزۋگە بولاتىنىن تالقىلاۋ قاجەت، كورسەتكىشتەردى بارىنشا تاۋەكەلدى تۇردە قويۋ كەرەك»، - دەپ اتاپ ءوتتى ۆيتسە-پرەمەر.
سونداي-اق وتىرىستا اتىراۋ جانە باتىس قازاقستان وبلىستارىنداعى ينۆەستيتسيالىق جوبالاردىڭ ىسكە اسىرىلۋ بارىسى تىڭدالدى.
ب ق و- دا 2025-جىلعى قاڭتاردا نەگىزگى كاپيتالعا ينۆەستيتسيا 28,9 ميلليارد تەڭگەنى قۇرادى. بۇل وتكەن جىلعى قاڭتار ايىمەن سالىستىرعاندا 7,1 پايىزعا ارتىق (26,7 ميلليارد تەڭگە). ونىڭ ىشىندە 90,2 پايىزى جەكە ينۆەستيتسيا، 9,8 پايىزى بيۋجەتتىك ينۆەستيتسيا. 2025-جىلعا ارنالعان نەگىزگى كاپيتالعا ينۆەستيتسيالار بويىنشا وبلىستىڭ KPI- ى 841 ميلليارد تەڭگە. 2024-جىلعى 9 ايدا تىكەلەي شەتەلدىك ينۆەستيتسيا اعىنى $995,5 ميلليوندى قۇرادى. بۇل 2023-جىلعى سايكەس كەزەڭدەگى كورسەتكىشتەن 13,1 پايىزعا ارتىق ($880,1 ميلليون). ت ش ي- دەگى نەگىزگى ۇلەس تاۋ-كەن ونەركاسىبىنە تيەسىلى. 2025-جىلى جالپى قۇنى 44,5 ميلليارد تەڭگە بولاتىن 769 جۇمىس ورنى اشىلاتىن 25 ينۆەستيتسيالىق جوبانى ىسكە اسىرۋ جوسپارلانعان.
اتىراۋ وبلىسىندا ينۆەستيتسيانىڭ نەگىزگى ۇلەسى تاۋ-كەن ونەركاسىبىنە تيەسىلى. 2025-جىلعى قاڭتاردا ينۆەستيتسيا كولەمى 100,9 ميلليارد تەڭگەنى قۇرادى. بۇل 2024-جىلعى قاڭتاردىڭ كورسەتكىشىنىڭ جارتىسىنان تومەن (195,4 ميلليارد تەڭگە). 2025-جىلى جالپى قۇنى 59 ميلليارد تەڭگەنى قۇرايتىن، 595 جۇمىس ورنى اشىلاتىن، 15 ينۆەستيتسيالىق جوبا پايدالانۋعا بەرىلەدى. ولاردىڭ قاتارىندا «ATYRAU CHICKEN» ج ش س قۇس فابريكاسى، «ايدانا-اگرو» ش ق جىلىجاي كەشەنى، «تەكسول-ترانس» ج ش س سۇيىتىلعان گازدى ساقتاۋعا ارنالعان قويما، «جۇماعاليەۆا» ش ق كوكونىس قويماسى جانە باسقالارى بار.
قازىرگى ۋاقىتتا، وڭىرلەردىڭ دەرەكتەرى بويىنشا، ينۆەستيتسيالىق جوبالاردى ىسكە اسىرۋ ءۇشىن ەلەۋلى كەدەرگىلەر بايقالمايدى. وسىعان قاراماستان، ۆيتسە-پرەمەر وڭىرلەردى «بايتەرەك» حولدينگى ارقىلى قولجەتىمدى قارجىلاندىرۋعا ءوتىنىم بەرۋ ۇدەرىسىنە بيزنەستى بەلسەندى تارتۋعا شاقىردى.
وسىعان دەيىن ۇكىمەتتە ساتبايەۆ كانالىنان استاناعا دەيىن سۋ قۇبىرىن سالۋ جوباسى تالقىلانعانى تۋرالى جازدىق.
