ۇكىمەت ەلىمىزدىڭ استىق سالاسىن قولداۋعا 40 ميلليارد تەڭگە ءبولدى
استانا. KAZINFORM - مەملەكەت باسشىسىنىڭ تاپسىرمالارىن جۇزەگە اسىرۋ شەڭبەرىندە ۇكىمەت اۋىل شارۋاشىلىعى تاۋارىن وندىرۋشىلەردى قولداۋ ءۇشىن رەزەرۆتەن 40 ميلليارد تەڭگە ءبولدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
بۇل تۋرالى ۇكىمەتتىڭ باسپا ءسوز قىزمەتى حابارلادى.
قاراجاتتى كوكتەمگى ەگىس جۇمىستارىنىڭ ساپالى جۇرگىزىلۋىن قامتاماسىز ەتۋ، 2025-جىلدىڭ ءونىمىن قابىلداۋ ءۇشىن استىق قويمالارىن بوساتۋ، قازاقستاندىق استىق ەكسپورتىنىڭ باسەكەگە قابىلەتتىلىگىن ارتتىرۋ، سونداي-اق جاڭا وتكىزۋ نارىقتارىن يگەرۋ سياقتى كەشەندى مىندەتتەردى شەشۋگە باعىتتاۋ جوسپارلانىپ وتىر.
2024-جىلى ەلىمىزدە ءداندى داقىلدار بويىنشا 25,2 ميلليون توننا كولەمىندە رەكوردتىق ءونىمى جينالدى. جوعارى ونىمدىلىككە اگروتەحنولوگيانى دۇرىس قولدانۋ ناتيجەسىندە جانە قولايلى اۋا رايىنىڭ ارقاسىندا قول جەتكىزىلدى.
سونىمەن قاتار ىشكى نارىق سۇرانىسى شامامەن 10 ميلليون توننا.
مەملەكەت باسشىسى قاسىم-جومارت توقايەۆ 2024-جىلى اۋىل شارۋاشىلىعى ەڭبەككەرلەرىنىڭ ءبىرىنشى فورۋمىندا اتاپ وتكەندەي، قازاقستاننىڭ ءداندى داقىلدار بويىنشا ەكسپورتتىق الەۋەتى 12 ميلليون توننانى قۇرايدى. بۇل - اۋقىمدى كولەم جانە ۇلكەن جاۋاپكەرشىلىك. ۇكىمەتتىڭ باستى مىندەتى - شارۋالارعا ءوز ونىمدەرىن شەتەلدىك نارىقتاردا وتكىزۋدە جان-جاقتى قولداۋ كورسەتۋ.
- بۇگىندە بۇل ەكسپورتتىق الەۋەتتىڭ 10 ميلليون تونناسى باعىتتارى ازىرلەنگەن ءداستۇرلى وتكىزۋ نارىقتارىنا، ال 2 ميلليون تونناسى الىس باعىتتار مەن جاڭا نارىقتاردا ساتۋ ءۇشىن جونەلتىلدى، - دەلىنگەن حابارلامادا.
وسىلايشا، تاسىمالداۋ شىعىندارىن ازايتۋدى سۋبسيديالاۋ شارۋالارعا استىقتى جاڭا نارىقتارعا دەر كەزىندە ەكسپورتتاۋعا جانە استىق قويمالارىن جاڭا ونىمگە دايىنداۋعا مۇمكىندىك بەرەدى.
ەستەرىڭىزگە سالا كەتەيىك، سوڭعى دەرەكتەر بويىنشا 2024-جىلدىڭ قىركۇيەگىنەن ءساۋىر ايىنا دەيىن استىق ەكسپورتى 6,9 ميلليون توننا بولدى، ول 2023-2024-جىلداردىڭ ۇقساس كەزەڭىنەن 54 پايىزعا ارتىق. 2025-جىلعى قاڭتاردا استىق ەكسپورتى 780,4 مىڭ توننا بولدى، بۇل 2024-جىلعى سايكەس كەزەڭنەن %34,5 عا ارتىق (579,9 مىڭ توننا).
بۇگىندە ەكسپورتتىڭ ءداستۇرلى باعىتتارى - وزبەكستان، تاجىكستان، قىرعىزستان، اۋعانستان. يران مەن ازەربايجانعا جەتكىزۋ كولەمى ۇلعايدى. ترانزيتتىك جولدار رەسەي، لاتۆيا، ليتۆا، ەستونيا، ازەربايجان، گرۋزيا، تۇركىمەنستان جانە قىتاي اۋماقتارى ارقىلى وتەدى.
ايتا كەتەلىك اۋىلشارۋاشىلىق تاۋار وندىرۋشىلەر ق ق س- تان تولىق بوساتىلمايتىنى تۋرالى جازعان ەدىك.
