ۇكىمەت جاساندى ينتەللەكتىنى دامىتۋ ستراتەگياسىن جانە سيفرلىق كودەكستى ازىرلەپ جاتىر - پرەزيدەنت

استانا. KAZINFORM - مەملەكەت باسشىسى قاسىم-جومارت توقايەۆ اقوردادا ءوتىپ جاتقان عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا جاساندى ينتەللەكتىنى ەلىمىزدە دامىتۋ ماسەلەسىنە ەرەكشە توقتالدى.

«ءۇشىنشى. جاساندى ينتەللەكتىنى جەدەل دامىتۋ قاجەت. عىلىمي-تەحنيكالىق پروگرەسس جاھاندىق ەكونوميكانىڭ سيپاتى مەن ادامداردىڭ تۇرمىس سالتىنىڭ جىلدام وزگەرۋىنە ىقپال ەتىپ وتىر. كۇنى كەشە عانا قيال-عاجايىپ بولىپ كورىنگەن تەحنولوگيالار بۇگىن شىندىققا اينالۋدا. مۇنداي جاعدايدا ەلىمىزدىڭ تەحنولوگيالىق جانە عىلىمي-يننوۆاتسيالىق دەربەستىگىن نىعايتۋ ءۇشىن بىزگە بارلىق مۇمكىندىكتى پايدالانۋ ماڭىزدى. جاساندى ينتەللەكتىنى دامىتۋدىڭ پەرسپەكتيۆاسى زور. كەيبىر باعالاۋلار بويىنشا جاساندى ينتەللەكت 2030-جىلعا قاراي الەمدىك ج ءى ءو- ءنىڭ 7 پايىزىن قامتاماسىز ەتەدى. ال 2027-جىلعا قاراي جاھاندىق جاساندى ينتەللەكت نارىعىنىڭ كاپيتاليزاتسياسى 400 ميلليارد دوللاردان اسادى. بۇكىل الەمدە جاساندى ينتەللەكت ادام ەڭبەگىن الماستىرىپ جاتىر. مەديتسينالىق دياگنوستيكا جانە زاڭگەرلىك كەڭەس بەرۋ سياقتى كۇردەلى سالالاردا دا كەڭىنەن قولدانىلا باستادى. ءتىپتى، نەيروجەلىلەر سۋرەت سالىپ، مۋزىكا، ولەڭ جازادى»، - دەدى قاسىم-جومارت توقايەۆ.

پرەزيدەنت سونداي-اق ەلىمىزدە جاساندى ينتەللەكتىنى دامىتاتىن ينستيتۋتتاردىڭ قاجەت ەكەنىن، بۇگىنگى تاڭدا ۇكىمەت جاساندى ينتەللەكتىنى دامىتۋ ستراتەگياسىن جانە سيفرلىق كودەكستى ازىرلەپ جاتقانىن تىلگە تيەك ەتتى.

«ەلىمىزدە جاساندى ينتەللەكت قاۋىپسىزدىك جۇيەسى، مەديتسينا، بانك قىزمەتى، لوگيستيكا، ءبىلىم بەرۋ سالالارىنا ويداعىداي ەنگىزىلىپ جاتىر. وسى تەحنولوگيانى مەڭگەرگەن مىقتى كومپانيالار دا پايدا بولدى. سوعان قاراماستان، جاساندى ينتەللەكت يندۋسترياسىن ودان ءارى دامىتۋ ءۇشىن مەملەكەت كەشەندى قولداۋ كورسەتۋى كەرەك. مالىمەتتەر مەن تەحنولوگيالىق ينفراقۇرىلىم بارىنشا قولجەتىمدى بولۋى كەرەك. سوندىقتان قولايلى ەكوجۇيە قالىپتاستىرۋ قاجەت. سونىمەن قاتار بىزگە جاساندى ينتەللەكتىنى دامىتاتىن ءتيىستى ينستيتۋتتار كەرەك. قازىر ۇكىمەت جاساندى ينتەللەكتىنى دامىتۋ ستراتەگياسىن جانە تسيفرلىق كودەكستى ازىرلەپ جاتىر. بۇل قۇجاتتار اتالعان سالاداعى زەرتتەۋ جۇمىستارىنا جانە ازىرلەمەلەردى ءىس جۇزىندە قولدانۋعا جاعداي جاساۋى كەرەك. سونداي-اق بيزنەس پەن جوعارى وقۋ ورىندارى ءۇشىن تەحنولوگيالىق ينفراقۇرىلىمدار مەن مالىمەتتەر بازاسىن قولجەتىمدى ەتۋگە ءتيىس. جاساندى ينتەللەكتىنى ادامزات يگىلىگىنە قىزمەت ەتۋ ءۇشىن دامىتۋ ماڭىزدى. سوندىقتان ەتيكالىق ستاندارتتاردى بەلگىلەۋ، مالىمەتتەردى قورعاۋ جانە وسى سالاداعى كيبەرقاۋىپتىڭ الدىن الۋ ىسىنە ەرەكشە ءمان بەرگەن ءجون»، - دەدى مەملەكەت باسشىسى.

ءوز كەزەگىندە پرەزيدەنت مەملەكەتتىك ورگاندار مەن ولارعا باعىنىشتى ۇيىمداردىڭ دەرەكتەر قورىن ينتەگراتسيالاۋمەن بەلسەندى اينالىسۋى ءتيىس ەكەنىن ايتتى.

«جاساندى ينتەللەكتىنى رەتتەۋ ماسەلەسى بۇگىندە ۇلتتىق جانە جاھاندىق دەڭگەيدە ءجيى تالقىلانادى. مىسالى، جاقىندا ەۋرووداقتا (Artificial Intelligence Act) ءتيىستى زاڭ قابىلداندى. سيفرلىق ءداۋىر جاڭا اكتيۆتىڭ، ياعني، دەرەكتەردىڭ پايدا بولۋىنا ىقپال ەتتى. ولار جاساندى ينتەللەكت پەن ماشينالىق ۇيرەنۋدىڭ نەگىزگى شيكىزاتى سانالادى. سوندىقتان مەملەكەتتىك ورگاندار مەن ولارعا باعىنىشتى ۇيىمداردىڭ دەرەكتەر قورىن ينتەگراتسيالاۋمەن بەلسەندى اينالىسۋ كەرەك. كۇردەلى عىلىمي مىندەتتەردى شەشۋ جانە قولدانبالى جوبالاردى جۇزەگە اسىرۋ ءۇشىن جاقىن ارادا ەلىمىزدە جاسالىپ، ىسكە قوسىلاتىن سۋپەركومپيۋتەرلەردىڭ مۇمكىندىگىن بارىنشا جۇمىلدىرۋ قاجەت»، - دەدى قاسىم-جومارت توقايەۆ.

ەسكە سالا كەتەيىك، بۇعان دەيىن اقوردادا پرەزيدەنت قاسىم-جومارت توقايەۆتىڭ توراعالىعىمەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسى ءوتىپ جاتقانىن جازعان ەدىك.