ۇكىمەت جاڭا مەملەكەتتىك جوسپارلاۋ جۇيەسىن ازىرلەپ جاتىر
ۇكىمەت نەعۇرلىم ىقشام ءارى يكەمدى بولاتىن جاڭا مەملەكەتتىك جوسپارلاۋ جۇيەسىن ازىرلەپ جاتىر. بۇل تۋرالى پرەمەر- مينيستر ءاليحان سمايىلوۆتىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.

«مەملەكەت باسشىسىنىڭ تاپسىرماسى بويىنشا ۇكىمەت نەعۇرلىم ىقشام ءارى يكەمدى بولاتىن جاڭا مەملەكەتتىك جوسپارلاۋ جۇيەسىن ازىرلەپ جاتىر. جاڭا جۇيە اياسىندا باعدارلامالىق قۇجاتتاردى كوپتەپ بەكىتۋ، ارتىق نىسانالى ينديكاتورلاردى بەلگىلەۋ پراكتيكاسىنان باس تارتۋ ۇسىنىلادى. بۇل قادام مەملەكەتتىك اپپارات قىزمەتىندەگى جەدەلدىكتى ارتتىرۋعا، جوسپارلى كورسەتكىشتەرگە قول جەتكىزۋگە قارايلاماي، جۇمىسىن ناقتى ناتيجەگە قول جەتكىزۋگە باعىتتاي وتىرىپ، مەمورگانداردىڭ ءبىرىنشى باسشىلارىنىڭ جاۋاپكەرشىلىگى مەن دەربەستىگىن كۇشەيتۋگە مۇمكىندىك بەرەدى. ءوز كەزەگىندە ۇكىمەت مەملەكەت باسشىسىنىڭ قازاقستان حالقىنا جولداۋىن ىسكە اسىرۋ ماقساتىندا جىل سايىن جالپىۇلتتىق ءىس- شارالار جوسپارىن ازىرلەيدى. ول پرەزيدەنت جارلىعىمەن بەكىتىلەدى. جالپىۇلتتىق جوسپاردا ناقتى ءىس- شارالار، اياقتالۋ نىسانى، ورىنداۋ مەرزىمى مەن جاۋاپتى ورىنداۋشىلار قامتىلعان»، - دەدى ۇكىمەت باسشىسى جاۋابىندا.
ونىڭ اتاپ وتۋىنشە، ۇكىمەتتىڭ ءىس- قيمىل باعدارلاماسىن ازىرلەۋ تۋرالى نورمالار 2007 -جىلعى كونستيتۋتسيالىق رەفورما اياسىندا قازاقستان رەسپۋبليكاسىنىڭ كونستيتۋتسياسىنان الىنىپ تاستالعان.
«وسىعان بايلانىستى جالپىۇلتتىق جوسپار مەملەكەت باسشىسىنىڭ جولداۋ اياسىندا ايتقان، سونداي- اق بيۋروكراتيادان ارىلتۋ ماقساتىنداعى تاپسىرمالاردى قامتيتىنىن ەسكەرە وتىرىپ، ۇكىمەتتىڭ جەكەلەگەن باعدارلاماسىن ازىرلەۋ ورىنسىز دەپ پايىمدايمىز»، - دەدى ءاليحان سمايىلوۆ.