ۇكىمەت شىمكەنت قالاسىنىڭ 2035-جىلعا دەيىنگى باس جوسپارىن بەكىتتى
قازاقستان رەسپۋبليكاسىنىڭ ۇكىمەتى شىمكەنت قالاسىن دامىتۋدىڭ 2035-جىلعا دەيىنگى جاڭا باس جوسپارىن بەكىتتى. ق ر پرەمەر-ءمينيسترى ءاليحان سمايىلوۆ ءتيىستى قاۋلىعا قول قويدى، دەپ حابارلايدى kazinform ۇكىمەت سايتىنا سىلتەمە جاساپ.
ەلىمىزدىڭ ءىرى ونەركاسىپ، ساۋدا جانە مادەني ورتالىقتارىنىڭ ءبىرىن كەشەندى دامىتۋ اياسىندا تۇرعىن ءۇي قۇرىلىسىنىڭ كولەمى ۇلعايادى، جاڭا ءوندىرىس ايماقتارى، اينالما ت/ج تارماعى جانە وتكىزۋ قابىلەتى تاۋلىگىنە 20 مىڭ جولاۋشى بولاتىن ۆوكزال اشىلماق. سونداي-اق مەگاپوليستى جاپپاي كوگالداندىرۋ جوسپارلانعان.
ونىمدىلىكتى ارتتىرىپ، وتاندىق ءونىمنىڭ باسەكەگە قابىلەتتىلىگى مەن ساپاسىن جاقسارتۋدى، وتاندىق تاۋارلاردى شەتەل نارىقتارىنا شىعارۋدى قولداۋدى، قولدانىستاعى مەملەكەتتىك جانە وڭىرلىك باعدارلامالاردى ىسكە اسىرۋ اياسىندا ءتيىستى ينفراقۇرىلىمدى دامىتۋدى قامتاماسىز ەتەتىن ءتيىمدى ونەركاسىپ، ينفراقۇرىلىمدىق، ينۆەستيتسيالىق جانە ساۋدا ساياساتىن جۇرگىزۋ ارقىلى قالا ەكونوميكاسىنىڭ سالالارىن دامىتۋ جالعاسپاق.
ونەركاسىپ اۋماقتارىن جاڭعىرتۋ ماسەلەلەرىنە كوپ كوڭىل بولىنەتىن بولادى. ولاردىڭ اۋماعىن 2035-جىلعا دەيىن جاڭا يندۋستريالىق ايماقتاردى سالۋ ەسەبىنەن 5 مىڭ گەكتارعا ۇلعايتۋ جوسپارلانىپ وتىر. وندا پەرسپەكتيۆالى 14 ونەركاسىپ كلاستەرى داميتىن بولادى.
قابىلدانعان شارالاردىڭ ناتيجەسىندە 2035-جىلعا قاراي قالانىڭ الەۋمەتتىك-ەكونوميكالىق سالالارىندا 1 ميلليوننان استام جۇمىس ورنى بولادى دەپ كۇتىلۋدە.
قالا شەكاراسى قازىرگى اۋماعىندا قالادى، الايدا تۇرعىندار قالاداعى تىنىس-تىرشىلىك ءۇشىن قولايسىزداۋ اۋماقتاردان قالانىڭ ەكولوگيالىق جاعىنان نەعۇرلىم ورنىقتى جانە اباتتاندىرىلعان اۋداندارىنا كوشىرىلمەك. اۋماقتىڭ ۇشتەن بىرىنەن استامىندا تۇرعىن ءۇي جانە قوعامدىق نىساندار بوي كوتەرمەك.
سونىمەن قاتار ەكولوگيالىق تاۋەكەل ايماقتارى جويىلادى، بادام، قوشقاراتا، قاراسۋ جانە سايرامسۋ وزەندەرىنىڭ سۋ قورعاۋ بەلدەۋلەرى مەن ايماقتارىنىڭ جوبالارىن ازىرلەنەدى.
تۇرعىندارعا اقپاراتتىق-كوممۋنيكاتسيالىق قىزمەتتەردىڭ كەڭ سپەكترىن ۇسىنۋعا مۇمكىندىك بەرەتىن Next Generation Network تەحنولوگياسىن پايدالانا وتىرىپ، تەلەكوممۋنيكاتسيالىق جەلىلەردى كەڭەيتۋ جانە جاڭعىرتۋ ماسەلەلەرى جەكە قارالماق.
سونداي-اق سۋ قۇبىرىنىڭ قولدانىستاعى ايماقتىق جۇيەسىنىڭ ونىمدىلىگىن ارتتىرۋ، تىنىس-تىرشىلىك ەتۋ ورتاسىنىڭ جايلىلىعىن جاقسارتۋ جوسپارلانعان.
